Kahulugan ng softdrinks

ni Estrellia de Luna @Panaginip gabay ng buhay | November 20, 2023

Analisahin natin ang panaginip na ipinadala ni Ramon ng Roxas City.

Dear Maestra,

Napanaginipan ko na kumain ako ng tinapay nang may nakita akong isang bote ng soft drink sa mesa. May bawas na ito pero ininom ko pa rin. Hindi ako nasiyahan dahil kaunti lang aking nainom. Binuksan ko ang refrigerator, at mabuti na lang ay meron pa ru’ng hindi pa nababawasan.

Ano ang ibig sabihin ng panaginip ko?

Naghihintay,

Ramon

Sa iyo, Ramon,

Ang ibig sabihin ng panaginip mo na kumakain ka ng tinapay ay malalampasan mo ang matinding suliraning dinaranas mo sa ngayon na kung saan pati pamilya mo ay nadadamay na.

Ang may nakita kang soft drink sa mesa pero bawas na, ito ay paalala na mag-ingat ka sa iyong mga kilos at pananalita. May babala na masasangkot ka sa gulo na maghahatid sa iyo upang makagawa ka ng karahasan sa iyong kapwa.

Samantala, ang hindi ka nasiyahan dahil kaunti lang ang soft drink na ininom mo, binuksan mo ang refrigerator at nakakita ka ng wala pang bawas ay nangangahulugan na may nakalaan sa iyong kaligayahan at pagpapala kung patuloy kang magiging matiyaga.

Matapat na sumasaiyo,

Maestra Estrellia de Luna

Sign na habambuhay ng magiging single mom

ni Estrellia de Luna @Panaginip gabay ng buhay | November 19, 2023

Analisahin natin ang panaginip na ipinadala ni Gemma ng Albay.

Dear Maestra,

Napanaginipan ko na umiiyak ang baby ko. Magtitimpla sana ako ng gatas pero ubos na pala ito. Sumakay ako sa kotse para lumabas at bumili ng gatas. Pagdating ko sa tindahan, may nakilala akong binata, at nagkagusto umano ito sa akin. Nag-usap kami sandali at umuwi rin agad ako. Pinainom ko agad ang baby ko, tumigil na siya sa pag-iyak at tumawa na nang tumawa.

Ano ang ibig sabihin ng panaginip ko?

Naghihintay,

Gemma

Sa iyo, Gemma,

Ang panaginip mo na umiyak ang baby mo, magtitimpla ka sana ng gatas pero ubos na, ito ay nagpapahiwatig na may paparating na kalungkutan sa buhay mo at madadagdag pa ang mga problema mo sa kasalukuyan. Ang sumakay ka sa kotse para bumili ng gatas ay nagpapahiwatig na maaari kang makaranas ng matitinding pagsubok at paghihirap sa buhay. Magiging mailap ang pera sa iyo at kakapusin ka lagi sa budget.

Ang tumigil sa pag-iyak ang baby mo dahil binigyan mo na siya ng gatas, tumawa siya nang tumawa ay nangangahulugang marami kang tapat at maaasahang kaibigan na handang dumamay sa iyo. Samantala, ang may nakilala kang binata, nagkagusto siya sa iyo at nag-usap kayo ay senyales na may posibilidad na maging solo parent ka habambuhay.

Matapat na sumasaiyo,

Maestra Estrellia de Luna

Kahulugan ng birthday party at tirang pagkain

ni Estrellia de Luna @Panaginip gabay ng buhay | November 18, 2023

Analisahin natin ang panaginip na ipinadala ni Gerald ng Tondo.

Dear Maestra,

Napanaginipan ko na umattend ako ng birthday party. Nagpalipad sila ng mga lobo habang nagsasalu-salo kami. Ang dami pagkaing masasarap na nakahanda sa table.

Pagtapos ng kainan, nagkalat ang mga tirang pagkain maski ang mga silya ay nagkagulu-gulo rin.

Naiwan din ang mga maruruming plato sa mesa.

Ano ang ibig sabihin ng panaginip ko?

Naghihintay,

Gerald

Sa iyo, Gerald,

Ang panaginip mo na dumalo ka sa birthday party at nagpalipad ng mga lobo ay tanda na hindi mo agad makakamit mo ang iyong tagumpay. Ang nagsalu-salo kayo sa table, ang daming masasarap na pagkain ay nangangahulugan na may nakalaan sa iyong magagandang bagay pero hindi mo agad ito makakamit dahil ang sabi mo ay nagkalat ang mga tirang pagkain, maruming plato, at ang silya ay magulo. May mga hadlang ka ring mararanasan sa iyong mga binabalak pero sa dakong huli, sasaiyo rin ang tagumpay, pagpapala at kaligayahan.

Huwag kang susuko sa buhay, laban lang, at ituloy mo lang ang iyong pagsusumikap at pagiging masipag upang makamit mo ang iyong pinapangarap.

Sadyang ganyan ang buhay sa mundo may mga pagsubok na sa sandaling malampasan mo, mayroong naghihintay sa iyong kaligayahan, pagpapala at biyaya.

Matapat na sumasaiyo,

Maestra Estrellia de Luna