Babala na mas mahihirapan sa lilipatang trabaho

ni Maestra Estrellia de Luna @Panaginip Gabay ng Buhay | September 7, 2024

Analisahin natin ang panaginip na ipinadala ni Dorothy ng Nueva Ecija.

Dear Maestra,

Napanaginipan ko na nag-aayos ako ng kama, nang may biglang pumasok na bubuyog sa kuwarto ko. Nagpaikut-ikot ito sa akin, at para bang gusto akong kagatin. Mabuti na lang ay nagising ako.

Ano ang ibig sabihin ng panaginip ko?

Naghihintay,

Dorothy

---

Sa iyo, Dorothy,

Ang ibig sabihin ng nag-aayos ka ng kama mo ay mapipilitan kang maghanap ng ibang trabaho. Mag-a-apply ka sa ibang kumpanya na mas magbibigay sa iyo ng mas malaking suweldo.

Samantala, ang may pumasok na bubuyog sa kuwarto mo ay nagpapahiwatig na magiging mas mahirap ang trabaho mo. Pero, maghahatid naman ito sa iyo ng karangalan at kaligayahan.

Ang nagpaikut-ikot ang bubuyog, at para bang gusto kang kagatin ay nangangahulugan na marami kang pagsubok na kakaharapin, lalo na pagdating sa trabaho, darating ka rin sa puntong halos sumuko ka na. Subalit ‘wag kang mag-alala, dahil mapapansin din ng boss n’yo ang pagiging masipag mo, kaya naman agad kang mapo-promote at mabibigyan ng award. 

Matapat na sumasaiyo,

Maestra Estrellia de Luna

Kahulugan ng pumunta sa sabungan at nanalo ng P50K

ni Maestra Estrellia de Luna @Panaginip Gabay ng Buhay | September 6, 2024

Analisahin natin ang panaginip na ipinadala ni George ng Malate, Manila.

Dear Maestra,

Napanaginipan ko na pumunta ako sa sabungan. May dalawang manok na maglalaban, isang kulay puti at isang itim. Pumusta ako sa manok na kulay puti, at nanalo ako ng P50,000. 

Ano ang ibig sabihin ng panaginip ko?

Naghihintay,

George

---

Sa iyo, George,

Ang ibig sabihin ng panaginip mo na pumunta ka sa sabungan. May dalawang manok na naglalaban, at pumusta ka sa manok na kulay puti ay madadamay ka sa isang transaksyon na maghahatid sa iyo sa kapahamakan, at maaaring malagay sa panganib ang iyong buhay. 

Ang kulay puti ay nagpapahiwatig na pagod na pagod ka na kumayod at gusto mo na sanang mamahinga, pero hindi naman puwede dahil doon nanggagaling ang inyong ikinabubuhay.

Ang itim na manok ay babala ng conflict. May mga magiging problema sa mga lakad at pagpapasya mo. 

Samantala, ang nanalo ka ay nangangahulugan na mawawalan ka ng malaking halaga. Ito ay senyales na malulugi ka sa negosyo mo o maloloko ka.

Ang P50,000 ay tanda na makakapaglakbay ka sa ibang bansa upang makipag-deal ng negosyo. Ito rin ay nagpapahiwatig na puwede kang magnegosyo ng mga bagay na may kaugnayan sa computer, agricultural products at communications and transportations.

Matapat na sumasaiyo,

Maestra Estrellia de Luna

Kahulugan ng namasyal sa Laguna De Bay

ni Maestra Estrellia de Luna @Panaginip Gabay ng Buhay | September 5, 2024

Analisahin natin ang panaginip na ipinadala ni Dolores ng Laguna.

Dear Maestra,

Napanaginipan ko na namasyal ako sa Laguna de Bay. 

Ang ganda pagmasdan ng mga sariwang halaman, berdeng-berde ang mga dahon roon, at maski ang mga damo ay basa pa ng hamog.

Habang naglalakad ako, sa‘di kalayuan, may natanaw akong maruming tubig at puro putik. 

Maya-maya ay nakakita naman ako ng mga tupa sa paligid.

Ano ang ibig ipahiwatig ng panaginip ko?

Naghihintay,

Dolores 

---

Sa iyo, Dolores,

Ang ibig sabihin ng panaginip mo na namasyal ka sa Laguna de Bay ay kaligayahan at tagumpay sa iyong buhay. Susuwertehin ka sa negosyo at igagalang ka sa inyong lugar.

Magiging masaya rin ang iyong love life, may tsansa ka pang pakasalan ng lalaking itinitibok ng iyong puso. 

Subalit ang sabi mo ay naglakad ka, at nakakita ka ng maruming tubig, ito ay babala ng kaguluhan at ‘di pagkakasundu-sundo.

Samantala, ang may nakita kang mga tupa sa paligid ay nangangahulugan na ang mapapangasawa mo ang isang lalaking mabait, mahinahon magsalita, may pagtitimpi sa sarili at malawak ang pananaw sa buhay. Ito rin ay tanda na magiging malusog ang mga anak n’yo at sila rin ang magbibigay sa inyo ng karangalan.

Matapat na sumasaiyo,

Maestra Estrellia de Luna