Mapapanood online o sa drive in ng mall… Giant Lantern Festival tuloy kahit may pandemya

ni Jasmin Joy Evangelista | September 27, 2021

Muling mapapanood ang Giant Lantern Festival sa San Fernando City, Pampanga ngayong taon pero ito ay idaraos virtually o sa pamamagitan ng drive in dahil laganap pa rin ang COVID-19.

Tulad noong nakaraang taon, bawal ang live audience sa festival dahil exhibition na lang ng mga lantern ang mangyayari.

Kasali rito ang 7 parol na may taas na 20 talampakan, na galing sa 7 barangay sa San Fernando.

"Digital edition pa rin ang isasagawa, meaning mapapanood ito sa livestream," ani San Fernando tourism officer Ching Pangilinan.

"Bagama't ganu’n 'yung kinakaharap natin (pandemya) ngayon, ayaw naman natin na mawala 'yong tradition natin na sa paggawa ng mga higanteng parol," dagdag niya.

Ang tema ng mga parol ay nakasentro sa COVID-19 pandemic.

Makatatanggap ang bawat barangay ng P142,000 subsidy mula sa lokal na pamahalaan.

Sa Disyembre 16, 2021 nakatakda ang opening ng festival sa Robinsons Starmills sa lungsod kung saan bukod sa live-streaming, may option ding makita ang mga higanteng parol nang aktuwal sa pamamagitan ng drive-in viewing ng mall.

"There's gonna be a pre-booking to be able to witness the giant lantern this year and we're gonna have a drive-in concept," sabi ni Jodee Arroyo, manager ng Robinsons Starmills kung saan idaraos ang festival.

"We could only accommodate a maximum of 150 to 200 cars every show. And every night, we're gonna have 2 shows po," dagdag ni Arroyo.

Sa mga nais manood, maaaring magparehistro para sa drive-in viewing online o sa on-site registration sa mall.

Pagpasok sa Pampanga at Bulacan, sinimulan nang higpitan

ni Ronalyn Seminiano Reonico | August 2, 2021

Nagsimula nang magpatupad ng mahigpit na border control sa ilang probinsiya sa Luzon katulad ng Pampanga at Bulacan. Isinailalim sa general community quarantine (GCQ) "with heightened restrictions" ang NCR hanggang sa Agosto 5.

Ipatutupad naman ang enhanced community quarantine (ECQ) sa rehiyon sa Agosto 6 hanggang 20. Sa Malolos, Bulacan, mahigpit na sinusuri ng mga awtoridad ang mga dokumento ng mga motorista sa mga checkpoints.

Sa Pampanga naman, simula ngayong araw, Agosto 2 hanggang sa 15, kailangang magpakita ng negative RT-PCR o antigen test result upang makapasok sa naturang lugar ang mga non-residents.

Mahigpit ding binabantayan ang mga borders at mga barangay sa Pampanga dahil sa banta ng COVID-19 Delta variant. Samantala, umabot na sa 1,597,689 ang kabuuang bilang ng kaso ng COVID-19 sa bansa matapos maitala ang karagdagang 8,735 bagong kaso noong Linggo.

Sa naturang bilang, 63,646 ang aktibong kaso habang 1,506,027 naman ang mga gumaling na at 28,016 ang mga pumanaw.

100% percent ang target maturukan… Baka para sa bakuna sa Pampanga

ni Ronalyn Seminiano Reonico | May 27, 2021

Hinihikayat ng lokal na pamahalaan ng San Luis, Pampanga ang mga residente nito na magpabakuna laban sa COVID-19 at kabilang sa kanilang paraan ay ang pagpapa-raffle ng baka buwan-buwan.

Inianunsiyo ni Mayor Jayson Sagum na maaaring manalo ng baka ang residenteng magpapabakuna laban sa COVID-19 sa isasagawang pa-raffle buwan-buwan na magsisimula sa September hanggang sa Agosto 2022 sa ilalim ng kanyang programang “Baka para sa Bakuna”.

Aniya pa, “Every end of the month magra-raffle tayo ng isang baka para roon sa mga nabakunahan nating kababayan.

“This is one of our ways to encourage more residents to get vaccinated against COVID-19.”

Target umano ng lokal na pamahalaan na makakuha ng 100-percent vaccination rate sa mga residente nito at maideklara bilang COVID-free municipality.

Sa mga nais makasali sa naturang raffle, ayon kay Sagum ay ipakita lamang ang vaccination card na magsisilbing proof of entry maging sa mga first dose pa lamang ng bakuna ang natatanggap at aniya pa, ang gagamiting pondo ay hindi kukunin sa lokal na pamahalaan, kundi mula sa mga private donors.

Saad pa ni Sagum, "We are looking at around P20,000 to P25,000 worth of live cow per month so I am really knocking at the hearts of my friends and anybody who wants to help us in our little program. Let us be instruments in encouraging others to have themselves protected against Covid-19.”