Bagyong Egay, next

ni Mai Ancheta @News | July 17, 2023

Isa na namang namumuong sama ng panahon ang namataan ng PAGASA sa silangang bahagi ng Mindanao na maaaring maging bagyo kapag pumasok sa Philippine Area of Responsibility (PAR).

Kapag lumakas at nakapasok sa PAR sa Martes, tatawagin itong Bagyong Egay.

Lalakas din ang habagat sa kalagitnaan ng susunod na linggo dahil sa masamang panahon na maaaring higupin ng low pressure area mula sa silangan patungo sa direksyon ng Luzon.

Bagama't nakalabas na ang Bagyong Dodong, sinabi ng PAGASA na makararanas ang bansa ng hindi kagandahang panahon dahil sa patuloy na pag-iral ng habagat at magdadala ito ng mga pagkulog at pagkidlat sa Metro Manila at ilang bahagi ng Luzon.

Makararanas naman ng mga manaka-nakang pag-ulan sa ilang bahagi ng Visayas dahil sa southwest moonsoon, habang ang Mindanao ay makararanas ng mga pag-ulan.

Nananatili namang lubog sa baha ang ilang lugar sa bansa pati na sa Metro Manila dahil sa iniwang buhos ng ulan ng Bagyong Dodong.

Tubig sa Angat Dam, bumaba na sa minimum operating level

ni BRT @News| July 9, 2023

Bumaba na sa minimum operating level ang tubig sa Angat Dam sa Norzagaray, Bulacan.

Ayon sa PAGASA, nasa 179.99 meters na lamang ang tubig, mas mababa sa 180-meter minimum operating level.

Mas mababa ito ng 0.46 meter kumpara sa 180.45 meter na naitala kahapon ng umaga, Hulyo 7.

Nabatid na nasa 210 meters ang normal high water level o spilling level ang Angat Dam.

Nasa 90 porsyento ng residente ng Metro Manila ang sinusuplayan ng tubig ng Angat Dam.

Ayon sa National Water Resources Board, babawasan pa ang water allocation sa Metro Manila kapag bumaba ang water level sa Angat Dam.

Samantala, nasa 98.76 meters ang water level sa Ipo Dam sa Bulacan

Nasa 745.32 meters naman ang water level sa Ambuklao Dam sa Benguet habang nasa 236.85 meters ang water level sa San Roque Dam sa Pangasinan at Benguet.

Nasa 179.39 meters naman ang water level sa Pantabangan Dam sa Nueva Ecija habang ang Magat sa Ifugao at Isabela provinces ay nasa 164.81 meters.

El Niño, nagsimula na — PAGASA

ni Mai Ancheta | July 5, 2023

Inanunsyo ng Philippine Atmospheric, Geophysical and Astronomical Services Administration (PAGASA) na nagsimula na ang El Niño phenomenon sa bansa.

Kasunod ito ng inilabas na El Niño advisory batay sa climate monitoring at analysis kaugnay sa mainit na temperatura sa karagatan na nangangahulugang mararamdaman ang epekto ng mas kaunting pag-ulan sa ilang bahagi ng Pilipinas simula ngayong buwan na tatagal hanggang taong 2024.

Ayon kay Ana Liza Solis, hepe ng Climate Monitoring and Prediction Section ng Climatology and Agrometeorology Division ng PAGASA, sa ngayon ay "weak El Niño" pa ang mararamdaman subalit mataas ang posibilidad na maging katamtaman hanggang sa malakas ang epekto nito sa huling quarter ng taon.

Gayunman, inaasahan aniya na magkakaroon ng above-normal rainfall o bahagyang malakas na mga pag-ulan.

Sinabi ng opisyal na inaasahang unang maaapektuhan sa El Niño phenomenon ang sektor ng agrikultura na nakadepende sa paggamit ng tubig sa kanilang mga pananim.

Mararamdaman din ang epekto ng El Niño ng mga ordinaryong mamamayan na gumagamit ng tubig mula sa mga dam para sa kanilang pang-araw-araw na gawain at pangangailangan.

Matatandaang iniutos ni Pangulong Ferdinand Marcos, Jr. sa lahat ng ahensya ng gobyerno na magtipid ng tubig sa harap ng napipintong epekto ng El Niño.