National vaccination sa mga lugar na hahagupitin ng bagyong Odette, kanselado

ni Jasmin Joy Evangelista | December 14, 2021

Ipagpapaliban ng Department of Health (DOH) ang ikalawang yugto ng “Bayanihahn Bakunahan” Program sa mga lugar na posibleng daanan ng tropical depression na Odette.

Ayon kay DOH Secretary Francisco Duque III, imbes na gawin sa darating na Disyembre 15 hanggang 17 ay gagawin na lamang ito mula Disyembre 20 hanggang 22 sa mga lugar na tatamaan ng bagyong Odette.

Kabilang sa mga lugar kung saan postponed ang bakunahan ay ang Southern Tagalog region, Central at Eastern Visayas at Northern Mindanao.

"Kailangan po malayo sa peligro ang ating mga kababayan sa panahon nitong bagyong Odette," ani Duque.

Ang mga lugar naman sa Northern at Central Luzon ganundin sa Calabarzon ay itutuloy ang Bakunahan 2 sa Disyembre 15 hanggang 17.

Nauna nang sinabi ni PAGASA weather forecaster Chris Perez na inaasahang magdudulot ng malakas na pag-ulan ang bagyong Odette sa Eastern Visayas at Caraga regions.

LPA sa Mindanao, ganap nang tropical depression – PAGASA

ni Lolet Abania | December 12, 2021

Ganap nang tropical depression ang namataang low pressure area (LPA) sa Mindanao kung saan papasok ito sa Philippine Area of Responsibility (PAR), habang posibleng maging bagyo sa mga susunod na araw, batay sa ulat ng PAGASA ngayong Linggo.

Sa latest bulletin ng PAGASA, bandang alas-10:00 ng umaga, ang tropical depression ay nasa layong 2,095 kilometro sa silangan ng Mindanao na nasa labas pa ng PAR.

May maximum sustained winds ito na aabot sa 45 kilometers per hour (kph) malapit sa gitna habang may pagbugso ito ng hanggang 55 kph.

“The tropical depression is forecast to gradually intensify and may reach tropical storm category within the next 24 hours,” ayon sa PAGASA.

Sinabi rin ng PAGASA na inaasahang papasok ang tropical depression sa bansa sa Martes na papangalanang “Odette” na posibleng tumama sa ilang lugar sa Visayas at Mindanao.

“By Wednesday evening or Thursday morning, the tropical cyclone will begin to move westward and may make landfall over the Eastern Visayas-Caraga area. Due to favorable environmental conditions, the tropical cyclone will likely continue to intensify and may reach typhoon category by Tuesday evening or Wednesday early morning,” pahayag ng ahensiya.

“Considering these developments, the public and disaster risk reduction and management offices concerned are advised to continue monitoring for updates related to this tropical cyclone,” sabi pa ng PAGASA.

Lalong paglamig ng panahon, posible sa mga susunod na araw — PAGASA

ni Jasmin Joy Evangelista | December 7, 2021

Nagpaalala ang PAGASA na lalo pang lalamig ang temperatura sa mga susunod na araw dahil sa pag-iral ng northeast monsoon.

Maaga umanong umiral ang hanging amihan dahil ito ay dating nangyayari tuwing buwan ng Enero, ayon kay PAGASA weather specialist Aldczar Aurelio.

Ayon pa sa PAGASA, posibleng makapagtala ng 18 hanggang 19 degrees celsius sa Metro Manila sa mga susunod na araw habang sa Baguio City at mga kalapit na lugar naman ay posibleng maitala ang 10 degrees celsius o mas mababa pa.

Samantala, nagpapaalala rin ang PAGASA sa pagsusuot ng makakapal na damit lalo na kung umuuwi nang gabi o lumalabas tuwing madaling araw dahil sa posibleng sakit na dulot ng sobrang lamig na panahon.