Signal No. 1 sa Eastern Samar Bagyong Agaton, hataw

ni Lolet Abania | April 9, 2022

Nananatiling nakataas sa Tropical Cyclone Wind Signal (TCWS) No. 1 ang buong Eastern Samar sa Visayas at Dinagat Islands, Siargao at Bucas Grande Islands sa Mindanao ngayong Sabado ng hapon dahil ito sa Tropical Depression Agaton, ayon sa 2PM bulletin ng PAGASA.

Kasalukuyang dumaranas ang mga nasabing lugar ng malalakas na bugso ng hangin at asahan na maaaring magtuluy-tuloy ito sa susunod na 36 oras. Gayunman, sinabi ng PAGASA na magiging bahagya lamang ang banta nito sa mga indibidwal at kabuhayan.

Asahan na ngayong Sabado hanggang umaga ng Linggo na makararanas ng katamtaman hanggang sa malakas at paminsang matinding pag-ulan sa buong Eastern Visayas, Dinagat Islands, at Surigao del Norte.

Habang ang Masbate, Sorsogon at ang natitirang lugar sa Visayas at Mindanao ay makararanas naman ng mahina hanggang sa katamtaman at paminsang malakas na pag-ulan. Samantala, ala-1:00 ng hapon, namataan ang sentro ni Agaton sa layong 125 kilometers east southeast ng Guiuan, Eastern Samar.

Ang Bagyong Agaton ay may maximum sustained winds na 45 km/h malapit sa sentro, gustiness na aabot hanggang 55 km/h, at central pressure ng 1004 hPa. Subalit, ayon sa PAGASA, ang Bagyong Agaton ay halos nakapirme lamang.

Pinapayuhan naman ang mga residente na maging mapagmatyag sa posibleng pagbaha at landslides. “Under these conditions and considering significant antecedent rainfall, scattered to widespread flooding (including flooding) and rain-induced landslides are expected especially in areas that are highly or very highly susceptible to these hazard as identified in hazard maps,” sabi ng PAGASA.

LPA malapit sa Mindanao posibleng pumasok sa PAR ngayong Linggo o Lunes

ni Jasmin Joy Evangelista | April 3, 2022

Isang low pressure area (LPA) ang namataan malapit sa Mindanao at maaaring pumasok sa Philippine Area of Responsibility (PAR) ngayong Linggo o sa Lunes, ayon saPhilippine Atmospheric Geophysical and Astronomical Services Administration (Pagasa) nitong Sabado.

Ang LPA na namataan 2,115 kilometers east of Mindanao, ay posibleng pumasok sa PAR ngayong gabi o bukas nang umaga, ayon kay Pagasa weather specialist Samuel Duran.

Gayunman, sinabi ni Duran na ang naturang low pressure area ay mababa ang tsansa na maging bagyo.

Sa ngayon, patuloy na mararamdaman sa bansa ang shear line at easterlies, ayon pa sa Pagasa.

Ang shear line o ang tail end of a cold front ay magdadala ng maulap na papawirin na may panaka-nakang pag-ulan sa Batanes, Cagayan, Isabela, Apayao, Kalinga, Ifugao at Mountain Province.

Makararanas din ng parehong panahon ang Eastern Visayas at Caraga bunsod ng easterlies o warm winds na nagmumula sa Pacific Ocean.

Samantala, ang Metro Manila at mga natitirang bahagi ng bansa ay makararanas naman ng magandang panahon na may maulap na kalangitan at isolated rain showers at thunderstorms.

Maulap na kalangitan at panaka-nakang pag-ulan sa ilang parte ng bansa ngayong araw — Pagasa

ni Jasmin Joy Evangelista | April 2, 2022

Makararanas ng maulap na kalangitan at panaka-nakang pag-ulan ang bansa ngayong araw, ayon sa Philippine Atmospheric, Geophysical and Astronomical Services Administration (Pagasa) nitong Biyernes.

“Shearline affecting the eastern section of Northern Luzon. Easterlies affecting the eastern sections of Southern Luzon, Visayas and Mindanao,” pahayag ng Pagasa sa latest advisory nito.

Ang Batanes, Cagayan, Isabela, Apayao at Ilocos Norte ay makararanas ng maulap na kalangitan na may panaka-nakang pag-ulan, kulog at kidlat dala ng shearline at tail end of a cold front.

Inaasahan din ang ganitong panahon sa Caraga at Eastern Visayas dahil sa easterlies o mainit na hangin mula sa Pacific Ocean.

Samantala, makararanas naman ng bahagyang maulap hanggang sa maulap na papawirin na may isolated rain showers at thunderstorms ang buong Metro Manila at sa natitirang bahagi ng bansa.