ni Pablo Hernandez @Prangkahan | Abril 1, 2024
BUNGANGA NI HARRY ROQUE DAPAT BUSALAN NI EX-P-DUTERTE, KASI NAPAPAHAMAK ANG DATING PRESIDENTE SA MGA KADALDALAN NG EX-PRESIDENTIAL SPOKESMAN -- Dapat busalan ni ex-P-Duterte ang bunganga ni former presidential spokesman Harry Roque, kasi sa kadaldalan ng kanyang dating spokesman ay ang dating presidente tuloy ang napapahamak.
Mantakin n’yong ibida ni Roque na noong panahon daw ng Duterte administration ay walang harassment na ginagawa ang China Coast Guard (CCG) sa mga Philippine Coast Guard (PCG) vessels na naghahatid ng supply sa BRP Sierra Madre na nakadaong sa Ayungin Shoal, kasi nga raw ay may gentleman agreement daw si ex-P-Duterte kay Chinese Pres. Xi Jinping na mga pagkain lang ng mga sundalong Pinoy ang dadalhin dito (BRP Sierra Madre), at sa panahon daw ngayon ng Marcos admin ay bukod sa pagkain ay nagdadala na rin daw ng mga repair equipment ang PCG kaya raw nagagalit ngayon ang China sa ‘Pinas.
Ang pabidang statement na ‘yan ni Roque ay kay ex-P-Duterte nag-boomerang kasi siya ang nababatikos ngayon at sinasabihang traydor sa ‘Pinas, tsk!
◘◘◘
INUUNGGOY LANG NG MGA SURVEY FIRM ANG MAMAMAYAN, KASI MAGKAKASALUNGAT ANG RESULTA NG KANILANG MGA SURVEY --Magkakasalungat ang inilalabas na resulta ng survey ng mga survey firm, at kabilang sa halimbawa ay ang survey na inilabas ng Tangere firm noong Marso 24, 2024 na 52% daw ng Pinoy ang pabor sa Charter change (Cha-cha), 10% lang daw ang tutol, at 38% daw ang no-comment, pero sa survey naman na inilabas kahapon ng Pulse Asia ay 74% Pinoy daw ang tutol sa Cha-cha, at 26% lang daw ang pabor.
Patunay ang magkasalungat na survey na ‘yan na “inuunggoy” lang ng mga survey firm ang mamamayan, kasi kung totoo ang mga inilalabas nilang mga survey, dapat pare-pareho ang resulta, at hindi magkasalungat, period!
◘◘◘
MGA SURVEY FIRM, MAY MGA ‘MANOK’ SA SENATORIAL ELECTION? -- Kahit sa resulta ng senatorial survey para sa 2025 midterm elections ay magkakasalungat din ang resulta ng inilalabas nilang survey, magkakaibang pangalan ang mga ipinapasok nila sa top 12.
Sa totoo lang, itong mga suvey firm ay tila may mga “manok” sa senatorial election, na kung sino ang kanilang mga “manok” na gusto nilang manalo sa pagka-senador, ay iyong mga ‘yun ang ipinapasok nila sa kanilang top 12 senatoriables, boom!
◘◘◘
TAPOS NA ANG MAHABANG BAKASYON NG HOLY WEEK AT DAHIL LUNES NA MAY TRANSAKSYON NA SA GOBYERNO, KAYA BALIK NA NAMAN ANG KURAKUTAN SA PAMAHALAAN -- Lunes na ngayon, tapos na ang mahabang bakasyong Holy Week.
At dahil may mga transaksyon na naman sa mga tanggapan ng pamahalaan, asahan nang balik na naman ang kurakutan sa pamahalaan, tsk!