ICI, kung babagal-bagal sa pag-aksyon vs. Zaldy Co, iisiping pinuproteksyunan ito ng Marcos admin

ni Pablo Hernandez @Prangkahan | October 25, 2025

‘DI LANG PALA SALN NG GOV’T. OFFICIALS PINAKATAGO-TAGO NI EX-OMBUDSMAN MARTIRES, PATAGO RIN SIYANG NAG-AABSUWELTO SA KASO NG AKUSADO -- Hihilingin na sana ni Ombudsman Boying Remulla kay Senate President Tito Sotto na ipatupad na ang desisyon noong November 2016 ni dating Ombudsman Conchita Castro-Morales na nagtatanggal kay Sen. Joel Villanueva bilang senador ng bansa dahil sa pagkakasangkot nito sa pork barrel scam ni Janet Napoles, pero na-shock siya (Ombudsman Remulla) nang i-post ni Sen. Villanueva sa social media kamakalawa na hindi na siya puwedeng tanggalin sa pagka-senador dahil noong Sept. 2019 pa ay inabsuwelto na siya ng noo’y Ombudsman Samuel Martires.

Ang ikina-shock ni Ombudsman Remulla, ng mga mamamahayag at maging ng taumbayan ay inabsuwelto ni Martires si Sen. Villanueva nang hindi man lang ito isinapubliko, na dapat daw ay inanunsyo ito ng dating Ombudsman para kung mayroong tututol dito ay makapagsampa ng petisyon sa Supreme Court (SC).

Hay naku, hindi lang pala mga Statement of Assets, Liabilities and Net Worth (SALN) ng mga public officials ang pinakatago-tago noon ni Martires sa Ombudsman, kundi patago o sikreto rin pala siyang nag-aabsuwelto sa kaso ng akusado na tulad ng ginawa niyang pag-acquit kay Sen. Villanueva, pwe!

XXX

KUNG BABAGAL-BAGAL ANG AKSYON NG ICI LABAN KAY ZALDO CO, IISIPIN NG PUBLIKO NA PINUPROTEKSYUNAN NG MARCOS ADMIN ANG ‘SCAMMER’ NA DATING KONGRESISTA -- Dapat bilisan ng Independent Commission for Infrastructure (ICI) ang pagsasampa ng kaso sa Ombudsman laban kay resigned Ako Bicol Partylist Rep. Zaldy Co para makapaglabas na agad ng warrant of arrest at hulihin ito ng Interpol kung saang bansa man siya nagtatago upang maibalik sa Pilipinas at maikulong sa Quezon City jail.

Kapag nagpatuloy ang babagal-bagal na aksyon ng ICI laban kay Zaldy Co ay iisipin talaga ng publiko na pinuproteksyunan ng Marcos administration ang scammer na kongresistang ito, boom!

XXX

KUNG LAGING WALANG HEARING ANG ICI DAHIL MAY ABSENT NA COMMISSIONER, ASAHAN NANG AABUTIN NG SIYAM-SIYAM BAGO MAPANAGOT ANG MGA SANGKOT SA FLOOD CONTROL PROJECTS SCAM -- Sabi ni ICI spokesman Brian Hosaka na wala raw hearing ang ICI next week dahil isang linggong absent daw si ICI Commissioner Rogelio Singson.

Ang panawagan ng publiko ay bilisan ng ICI ang imbestigasyon para agad-agad mapanagot na ang lahat ng mga sangkot sa flood control projects scam, pero kung ganyan ang sistema ng ICI na kapag may isang komisyoner na a-absent ay wala munang hearing, asahan nang aabutin ng siyam-siyam bago maparusahan o mapanagot ang mga sangkot sa pang-i-scam sa kaban ng bayan, buset!

XXX

NAKIKINI-KINITA NA NG PUBLIKO NA MALAPIT NANG MAKALAYA ANG PORK BARREL QUEEN -- Inabsuwelto ng Sandiganbayan sa 15-counts ng kasong graft na may kaugnayan sa P172 million pork barrel scam sina Presidential Legal Counsel, former Sen. Juan Ponce Enrile, Gigi Reyes na dating chief of staff ni Enrile, pork barrel queen Janet Napoles at dalawang anak niyang sina Jo at James Napoles.

Sa pamamagitan ng piyansa ay matagal nang nasa laya sina Enrile, Reyes at dalawang anak ni Janet Napoles, at tanging siya (Janet Napoles) na lang ang nakakulong, at dahil sa desisyon na iyan ng Sandiganbayan na pumabor sa kanila ay nakikini-kinita na ng publiko na malapit nang makalaya ang tinaguriang pork barrel queen, pwe!

Zaldy Co at mag-asawang Discaya, mistulang nagpaligsahan sa rami ng ‘nai-scam’ sa kaban ng bayan

ni Pablo Hernandez @Prangkahan | October 24, 2025

MGA TANONG NG ICI MEMBERS KAY CONG. ROMUALDEZ SA CLOSED-DOOR HEARING NOON DAPAT ULITIN SA LIVE TELECAST -- Sinabi ni ret. Justice Andres Reyes, chairperson ng Independent Commission for Infrastructure (ICI) na next week daw ay isasapubliko na nila ang hearing o imbestigasyong isinasagawa nila sa flood control projects scam.

Kaya’t sana sa susunod na pagharap ni Leyte Rep. Martin Romualdez ay kung ano ang mga naging katanungan sa kanya ng ICI members noong closed-door hearing ay ulitin sa live telecast investigation para makita at marinig ng taumbayan ang mga kasagutan niya kasi nga siya ang pinararatangan ni Sen. Chiz Escudero na mastermind daw sa flood control projects scam, period!

XXX

DAPAT PAGHARAPIN SINA SEN. ESCUDERO AT CONG. ROMUALDEZ PARA MAKITA NG PUBLIKO KUNG SINO SA KANILA ANG ‘MASTERMIND’ SA FLOOD CONTROL PROJECTS SCAM -- Sa social media, ang depensa naman ng mga pro-Martin Romualdez ay hindi raw ang dating House speaker ang maituturing na mastermind sa flood control projects scam dahil wala raw itong pirma sa year 2025 Bicam Budget report, at anila, ang posible pa na mastermind raw ay si Sen. Escudero na may lagda dito (2025 Bicam report).

Mainam na gawin ng ICI sa kanilang live telecast ay sabay nilang ipatawag at pagharapin sina Sen. Escudero at Cong. Romualdez para makita at marinig ng publiko kung sino sa kanilang dalawang ang nagsisinungaling at nagsasabi ng totoo, boom!

XXX

MISTULANG NAGPALIGSAHAN SINA ZALDY CO AT MAG-ASAWANG DISCAYA SA RAMI NG KANILANG IN-SCAM SA KABAN NG BAYAN -- Sa mga nagsusulputang balita ay lumalabas na ang Sunwest Corporation na pag-aari ng pamilya ni resigned Ako Bicol Partylist Rep. Zaldy Co at mga construction firm ng mag-asawang Curlee at Sarah Discaya ang may pinakamaraming nakopong flood control projects mula year 2016 hanggang 2025.

Ibig sabihin niyan, ito palang sina Zaldy Co at mag-asawang Discaya ay lumalabas na mistulang nagpaligsahan sa rami ng ‘nai-scam’ sa kaban ng bayan, mga pwe!

XXX

KUNG ITINATAGUYOD TALAGA NI MAYOR RUFFY BIAZON ANG ‘GOOD GOVERNANCE’, DAPAT IPA-STOP NIYA ANG STL-CON JUETENG AT SAKLA SA MUNTINLUPA CITY -- Dapat bago sumapi si Muntinlupa City Mayor Ruffy Biazon sa "Mayor’s for Good Governance" ay ipina-stop na muna niya ang mga raket na Small-Town Lottery (STL)-con jueteng nina "Touche" at "Jojo" at sakla ni "Walter" sa nasasakupan niyang lungsod.

Ang sagwa kasing tingnan na kaisa siya sa "Mayor's for Good Governance" tapos wala siyang aksyon sa mga ilegalista na nangraraket sa kanyang mga kababayan.

Para talagang masabi na itinataguyod ni Mayor Biazon ang "good governance" sa kanyang nasasakupan, ay dapat atasan na niya si Muntinlupa City chief of police, Col. Robert Domingo na dakpin ang mga ilegalistang sina "Touche," "Jojo" at "Walter" at kapag nagawa niya iyan, ay masasabing karapat-dapat talaga siyang maging kaisa sa "Mayor's for Good Governance," period!

Atong Ang, Gretchen Barretto sa kulungan magpa-Pasko?

ni Pablo Hernandez @Prangkahan | October 23, 2025

MISIS AT MGA ANAK NI ZALDY CO, DAPAT ISAMA SA KASO, NAKINABANG DIN SA ‘IN-SCAM’ NG KANILANG KUMPANYA SA KABAN NG BAYAN -- Bukod sa higit P86 billion Dept. of Public Works and Highways (DPWH)-flood control projects na ‘na-scam’ ng Sunwest Corporation na pag-aari ng pamilya ni resigned Ako Bicol Partylist Rep. Zaldy Co mula year 2016 hanggang 2025, ay nakapang-scam din daw ang kumpanya ng dating kongresista ng P1.3B medical supplies sa Dept. of Health (DOH) noong year 2020 (panahon ng pandemya), P2.4B overprice sa laptop contract sa Dept. of Education (DepEd) noong year 2021 at ang latest na nabulgar ay ang P2B contract sa IT Hub, Central Command at Road Safety ng LTO (Land Transportation Office) noong year 2021.

Sa kumpanya na pag-aari ng pamilya ni Zaldy Co, pumasok ang na-scam ng dating kongresista sa kaban ng bayan, na ibig sabihin, ang kanyang misis at mga anak ay nakinabang at ‘nagpasasa’ sa pera ng bayan.

Ang nais nating ipunto rito ay dapat hindi lang si Zaldy Co ang sampahan ng kasong plunder, kundi pati ang kanyang misis at mga anak na nasa legal age na, period!

XXX

MARCOS ADMIN AT DUTERTE ADMIN, BINEYBI SI ZALDY CO SA ‘PANG-I-SCAM’ SA KABAN NG BAYAN -- Hindi lang sa panahon ni Pres. Bongbong Marcos (PBBM) nakapang-scam sa kaban ng bayan si Zaldy Co mula 2023 hanggang 2025 (flood control projects scam), kundi kahit noong panahon ng Duterte admin, kasi ang pangulo ng Pilipinas mula year 2016 hanggang 2022 (2016 onwards nag-start ang flood control projects scam, 2020 medical supplies scam, 2021 laptop scam at 2021 LTO contract scam) ay si former Pres. Rodrigo Roa Duterte (FPRRD).

Ibig sabihin niyan, bineybi ng Marcos admin at Duterte admin ang ginawang ‘pang-i-scam’ ni Zaldy Co sa kaban ng bayan, pwe!

XXX

SA TEMA NG STATEMENT NI ICI SPOKESMAN BRIAN HOSAKA TILA PALULUSUTIN NILA SA IMBESTIGASYON SI FL LIZA -- Matapos hilingin ng isang nagngangalang John Santander sa Independent Commission for Infrastructure (ICI) na imbestigahan din si First Lady Liza Araneta-Marcos sa flood control projects dahil may mga larawan na kasama ng First Lady sa mga events si Special Envoy to China Rep. Maynard Ngu na pinangalanan ni resigned DPWH Usec. for Operations Roberto Bernardo na ito (Maynard Ngu) ang “bagman” sa kickback ni Sen. Chiz Escudero, ay sinabi ni ICI spokesman Brian Hosaka na kapag may matibay daw na ebidensya na sangkot sa flood control projects scam ang Unang Ginang ay saka na lang daw nila ito iimbestigahan.

Dapat imbitahan ng ICI si FL Liza, kasi may isang John Santander na humiling na imbestigahan ang Unang Ginang, pero sa tema ng statement ni ICI Spokesman Hosaka ay tila walang plano ang ICI na imbitahan para imbestigahan ang First Lady sa kaugnayan niya kay Maynard Ngu na umano’y bagman sa kickback sa flood control projects ni Sen. Escudero, tsk!

XXX

ATONG ANG, GRETCHEN BARRETTO AT IBA PANG SANGKOT SA MISSING SABUNGEROS, SA KULUNGAN MAGPA-PASKO? -- Ayon kay Assistant State Prosecutor Charlie Guhit ng Dept. of Justice (DOJ) na sa loob daw ng 2 buwan ay isasampa na nila ang kaso sa korte laban sa mga sangkot sa missing sabungeros.

Kung sa loob ng dalawang buwan, eh October na ngayon, next month November na at sa susunod na buwan ay Disyembre na.

Kumbaga, parang sinabi na rin ng DOJ na sa kulungan magpa-Pasko sina gambling tycoon Atong Ang, dating actress Gretchen Barretto at iba pang sangkot sa ‘pagpapapatay’ sa mga missing sabungeros, abangan!