Pagsasaayos ng simbahan ng Notre-Dame, patapos na

ni Angela Fernando - Trainee @News | April 13, 2024

Malapit nang makumpleto ang pagsasaayos sa Notre-Dame Cathedral matapos itong matupok sa sunog limang taon ang nakararaan.

Matatandaang nu'ng gabi ng Abril 15, 2019, biglaang nagliyab ang bubong ng simbahan na agad kumalat sa gusali.

Nilinaw naman ni Emmanuel Macron, presidente ng France, na gusto niyang mailagay sa ayos ang estado sa pamamagitan ng tuluyang pagkakabuo ng simbahan.

Kasalukuyang hindi pa rin malinaw kung paano nagsimula ang sunog na tumupok sa cathedral ngunit sinabi ng mga otoridad na maaaring kuryente o sigarilyo ang naging mitsa ng nasabing insidente.

Halos 55M katao, nakakaranas ng gutom sa West, Central Africa

ni Eli San Miguel - Trainee @News | April 13, 2024

Nagbabala ang mga U.N. humanitarian agencies noong Biyernes, na nagpapalubha sa krisis sa pagkain ang pagtaas ng mga presyo ng bilihin sa West at Central Africa, kung saan mahigit sa 55 milyong katao ang mahihirapang magkaroon ng makakain sa mga susunod na buwan.

Ayon sa World Food Programme, UNICEF, at Food and Agriculture Organization, kasama sa pinakaapektadong mga bansa ang Nigeria, Ghana, Sierra Leone, at Mali, kung saan inaasahang 2,600 katao sa mga lugar sa hilaga ang magdaranas ng kritikal na gutom.

Dahil sa kakulangan sa pagkain, sinabi rin ng mga ahensya na humigit-kumulang sa 16.7 milyong mga bata sa ilalim ng limang taong gulang ang nakakaranas ng malnutrisyon sa buong West at Central Africa.

Bukod dito, lumalala rin ang sitwasyon dahil sa matinding pagdepende ng rehiyon sa importasyon ng pagkain, lalo na sa mga bansang nakararanas ng mataas na inflation tulad ng Ghana, Nigeria, at Sierra Leone.

Japanese interpreter ng MLB star na si Shohei Ohtani, kinasuhan ng pagnanakaw

ni Angela Fernando - Trainee @News | April 12, 2024

Sinampahan ng kasong bank fraud ang dating Japanese interpreter ng Major League Baseball (MLB) star na si Shohei Ohtani nu'ng Huwebes at inakusahan ng pagnanakaw ng $16-milyon mula sa Los Angeles Dodgers power-hitting pitcher upang bayaran ang mga utang sa sugal.

Ayon sa reklamo at affidavit na isinumite sa United States District Court sa Los Angeles, si Ippei Mizuhara, ang akusado, ay nagnakaw ng pera mula sa isang account ni Ohtani na tinulungan niyang buksan at ipinadala nito ang nakulimbat nang walang kaalaman ng player sa isang iligal na sports gambling operation.

Binigyang-diin naman ni U.S. Attorney E. Martin Estrada sa kanyang pagbibigay impormasyon sa ginawang imbestigasyon na walang kinalaman si Ohtani sa nangyari.

Hindi rin nakalimutan ni Atty. Estrada na magpaabot ng kanyang simpatya kay Ohtani na naging biktima sa maituturing na mainit na scandal ngayon sa larangan ng baseball.