ni Jenny Rose Albason @World News | June 10, 2026
Nais pigilan ng isang federal judge sa Washington ang planong Ultimate Fighting Championship (UFC) event sa White House na inorganisa ni US President Donald Trump at nakatakdang idaos sa susunod na linggo.
Kasama rin sa nais ipahinto ang pagtatayo ng malaking metal na estrukturang tinawag na “The Claw” sa South Lawn ng White House.
Sa reklamong inihain noong Sabado, hiniling ng dalawang residente ng Washington sa korte na maglabas ng temporary restraining order upang mapigilan ang event na tinawag na “UFC Freedom 250.”
Photo: File / BBC
Nakatakda itong ganapin sa Hunyo 14, kasabay ng pagdiriwang ng ika-80 kaarawan ni Trump.
Ayon sa mga ulat, isasagawa ang mga laban sa loob ng isang 92-talampakang taas na octagon-shaped cage, habang ang weigh-in ng mga kalahok ay nakatakdang gawin sa Lincoln Memorial.
Kinuwestiyon ng mga nagsampa ng kaso ang paggamit ng mga pampublikong lugar tulad ng White House South Lawn at Lincoln Memorial para sa isang pribadong sporting event.
Iginiit nila na labag umano ito sa umiiral na mga patakaran at nangangailangan ng pahintulot ng Kongreso ang pagtatayo ng ganoong kalaking estruktura sa naturang lugar.
Agad namang tumugon ang White House at tinawag ang kaso na isang “obstructionist, baseless, and dilatory lawsuit.” Iginiit din nito na ang UFC event ay maituturing na katulad lamang ng iba pang opisyal na aktibidad na regular na idinaraos sa White House grounds at National Mall.
BUS TUMAOB AT NASUNOG, 21 DEDBOL
PATAY ang hindi bababa sa 21 katao, habang 19 naman ang nasugatan matapos maaksidente at masunog ang isang pampasaherong bus malapit sa lungsod ng Nassiriya sa Iraq noong Linggo.
Ayon sa mga otoridad, nawalan ng kontrol ang driver habang binabagtas ang isang highway. Dahil dito, tumagilid at tumaob ang bus bago tuluyang nilamon ng apoy.
Kinumpirma ng mga pulis at health officials na 21 katao ang nasawi sa insidente, habang 19 naman ang nasugatan at agad na isinugod sa ospital. Karamihan sa mga sugatan ay nasa kritikal na kondisyon dahil sa matitinding paso na kanilang tinamo.
Iniutos ni Iraqi Prime Minister Ali al-Zaidi ang agarang pagsasagawa ng imbestigasyon upang matukoy ang sanhi ng trahedya. Inatasan din niya ang mga kinauukulang ahensya na magsumite ng ulat hinggil sa buong pangyayari.
Patuloy pa ring iniimbestigahan ng mga otoridad ang eksaktong dahilan ng aksidente.
Karaniwan ang mga aksidente sa kalsada sa Iraq dahil sa mabilis na pagpapatakbo ng mga sasakyan, sirang imprastraktura ng mga kalsada, at kakulangan sa mahigpit na pagpapatupad ng mga batas-trapiko.
LALAKI NAMARIL, 1 PATAY, 5 NADALE
ISA katao ang patay habang lima pa ang sugatan matapos umanong magpaputok ng baril ang isang lalaki mula sa kanyang sasakyan sa ilang lugar sa Israel.
Ayon sa Magen David Adom (MDA), nasawi ang isang 35-anyos na lalaki dahil sa tama ng bala. Dalawa sa mga sugatan ang nasa malubhang kondisyon, habang tatlo naman ang nagtamo ng katamtamang pinsala.
Kinilala ng mga otoridad ang suspek bilang isang Arabong Israeli. Napatay siya ng mga puwersang panseguridad malapit sa bayan ng Kokhav Yair, na nasa malapit sa West Bank.
Sinabi ng pulisya na may rekord ng kriminal na kaso ang suspek at may isa pang indibidwal na inaresto dahil sa hinihinalang pagkakasangkot sa insidente.
Ayon sa pulisya, narekober din ang ginamit na baril at sasakyan sa pag-atake.
Samantala, iniulat ng official news agency na Wafa na isinara ng mga puwersang Israeli ang ilang checkpoint sa Tulkarem at Qalqilya bilang bahagi ng pinaigting na seguridad kasunod ng insidente.
