Email ni Trump, na-hack

ni Eli San Miguel @Overseas News | August 11, 2024

Photo: Donald Trump / FB

Inihayag ng kampanya ni U.S. ex-President Donald Trump na na-hack sila at ipinahiwatig na maaaring ang mga Iranian ang nasa likod ng pagnanakaw at pamamahagi ng sensitibong mga dokumento.

Wala silang ibinigay na tiyak na ebidensya sa kaugnayan ng Iran sa hacking, ngunit ang pahayag na ito'y kasunod ng ulat ng Microsoft tungkol sa panghihimasok ng mga dayuhan sa kampanya ng U.S. para sa 2024.

Binanggit nito ang isang insidente noong Hunyo kung saan nagpadala ang isang Iranian military intelligence unit ng "spear-phishing email" sa isang mataas na opisyal ng isang presidential campaign mula sa isang na-hack na email account ng dating senior advisor.

Gayunpaman, bilang tugon sa ulat ng Microsoft, itinanggi ng Iran's United Nations mission na may plano silang makialam o magsagawa ng mga cyberattack sa U.S. presidential election

Eroplano bumagsak, 61 patay

ni Eli San Miguel @Overseas News | August 10, 2024

Photo: Aviators for Aviators / FB

Isang regional turboprop plane ang bumagsak malapit sa São Paulo sa Brazil nitong Biyernes, na nagresulta sa pagkamatay ng lahat ng 61 pasahero, ayon sa airline.

Ayon sa regional carrier na Voepass, umalis mula sa Cascavel sa Paraná ang eroplano patungo sa international airport ng São Paulo at bumagsak bandang 1:30 ng hapon sa lokal na oras sa Vinhedo, mga 80 km (50 milya) sa hilagang-kanluran ng São Paulo.

Sa isang video na ipinost sa social media, ipinakita ang ATR-72 plane na umiikot nang walang kontrol habang bumabagsak sa likod ng isang grupo ng mga puno malapit sa mga bahay, na sinundan ng malaking ulap ng itim na usok.

Sinabi ng mga opisyal ng lungsod sa Valinhos, malapit sa Vinhedo, na walang nakaligtas mula sa pagbagsak ng eroplano at isang bahay lamang sa local condominium complex ang nasira, ngunit walang residente ang nasaktan.

Hindi agad sinabi ng mga otoridad kung ano ang naging sanhi ng pagbagsak ng eroplano.

Israel, oks sa usapang tigil-putukan

ni Eli San Miguel @Overseas News | August 9, 2024

Photo: SupplyChainBrain

Sumagot ang Israel sa mga mediators mula sa Qatar, Egypt, at U.S. nitong maagang bahagi ng Biyernes, na nagsasabing magpapadala sila ng delegasyon upang ipagpatuloy ang pag-uusap tungkol sa isang kasunduan para sa tigil-putukan sa Gaza sa Agosto 15.

Sinabi ng opisina ni Israeli Prime Minister Benjamin Netanyahu sa isang pahayag na magpapadala siya ng negotiation team upang tapusin ang mga detalye para sa pagpapatupad ng framework agreement.

Noong Huwebes, hinimok ng mga pinuno ng Egypt, Qatar, at United States ang Israel at Hamas na huwag nang mag-aksaya pa ng oras upang tapusin ang kasunduan sa tigil-putukan at ipagpatuloy ang pag-uusap sa Agosto 15.

Sa pahayag, nakasaad na, "[the ceasefire agreement] is now on the table with only the details of implementation left to conclude."

"There is no further time to waste nor excuses from any party for further delay. It is time to release the hostages, begin the ceasefire, and implement this agreement," sabi ng tatlong mediators sa pahayag.