HK employers na tatanggalin ang OFWs na COVID-positive, kakasuhan — OWWA

ni Lolet Abania | February 23, 2022

Nakatakdang i-report ng mga opisyal ng Pilipinas sa labor authorities ang mga Hong Kong employers na binitawan na ang kanilang mga tauhan matapos na magpositibo sa test sa COVID-19 ang mga ito, ayon sa Overseas Workers Welfare Administration (OWWA).

Sinabi ni OWWA Administrator Hans Leo Cacdac na sa ngayon mayroong 76 overseas Filipinos sa Hong Kong na nagpositibo sa test sa COVID-19 na karamihan sa kanila ay nasa isolation habang walo ang na-admit sa mga ospital.

Nakatanggap naman si Cacdac ng mga reports na ilan sa mga overseas Filipino workers (OFWs) ang hinayaan nang umalis ng kanilang mga employers, subalit nakumbinsi na ring i-rehire ang mga nasabing manggagawa.

“Sa talaan natin ay parang isa lang ang naka-record sa atin na hindi pa makumbinsi na employer, idudulog na natin ito sa Hong Kong labor authority,” sabi ni Cacdac sa Laging Handa virtual briefing ngayong Miyerkules.

“Under Hong Kong law ay hindi sila dapat i-terminate kasi puwede naman mag-SL (sick leave) o ‘di kaya makabalik after nila mag-recover,” paliwanag ng opisyal.

Ayon kay Cacdac, ang mga Hong Kong employers na itutuloy pa rin ang termination ng mga kontrata ng kanilang mga empleyado dahil sa nagpositibo sa test sa COVID-19 ay mahaharap sa labor cases, at iba-blacklist na sa Pilipinas.

“Kailangan lang siguro ipaliwanag sa mga Hong Kong employers itong sitwasyon na ito at in fairness, marami naman sa kanila ang nakukumbinsi na tanggapin muli ang ating mga OFWs,” sabi ni Cacdac.

Ayon naman kay Philippine Consul General Raly Tejada, aabot na sa 10 OFWs sa Hong Kong ang pinipilit ng kanilang mga employers na matulog sa mga pampublikong lugar matapos na magpositibo sa test sa COVID-19.

Gayunman, sinabi ni Cacdac na pinag-aaralan na ng local labor authorities na mag-deploy ng isang medical team na mag-aasikaso sa mga Pinoy workers na nasa Hong Kong, katuwang ang mga awtoridad sa naturang special administrative region.

Repatriation ng OFWs mula sa Ukraine, naghihintay pa — OWWA

ni Lolet Abania | February 22, 2022

Sa kabila ng umiinit na tensyon sa pagitan ng Russia at Ukraine, hindi pa rin nagpapatupad ng mandatory repatriation ang pamahalaan para sa mga overseas Filipino workers (OFWs) na nasa Ukraine, ayon sa Overseas Workers Welfare Administration (OWWA).

Sa isang interview ngayong Martes kay OWWA Administrator Hans Cacdac, tinatayang may 380 Pilipino ang nasa Ukraine, kung saan marami sa kanila ang naninirahan sa kapitolyo ng Kyiv.

Una nang naiulat na limang Pinoy na, kabilang ang isang sanggol, ang dumating sa bansa na mula sa Ukraine.

Gayunman, ayon kay Cacdac, hindi pa inilalagay ng pamahalaan sa Alert Level 4 ang sitwasyon sa Ukraine, kaya wala pang ipinatutupad na mandatory repatriation o evacuation para sa mga OFWs.

“Sa ngayon, ang approach ay tila wait and see. Tingnan kung ano ang mangyayari. Hindi pa nakataas ang highest alert level sa panig ng pamahalaan natin, sa side ng DFA (Department of Foreign Affairs) at POEA (Philippine Overseas Employment Administration), so wala pang mandatory repatriation,” paliwanag ni Cacdac.

Subalit, sinabi ng opisyal na handa namang tulungan ng Philippine Embassy sa Warsaw ang mga Pinoy sa Ukraine na nagnanais nang umuwi ng bansa.

“Sa huling pagkakaulat sa atin, ay may dalawa na nag-express ng interest na makauwi. Other than that, hindi pa natin nakikita ‘yung tinatawag na mass repatriation dito sa Ukraine,” sabi ni Cacdac.

Samantala, patuloy ang babala ng United States na posibleng salakayin ng Russia ang kalapit na bansa nitong Ukraine.

Batay sa report nitong Lunes (oras sa Russia), inatasan na ni Russian President Vladimir Putin ang kanyang militar na magtungo sa Donetsk at Lugansk, dalawang breakaway regions sa eastern Ukraine, makaraang kilalanin nito ang pagiging “independent” ng mga naturang lugar mula sa Ukraine.

Tiniyak naman ni Cacdac sa publiko na handa ang gobyerno sakaling isagawa na ang evacuation o repatriation para sa mga OFWs na nasa Ukraine.

“We will be ready. We stand ready, of course. This is not the first time that we will be doing this. Meron na ‘yang mga identified relocation points, exit points,” sabi pa ni Cacdac.

Nanawagan din ang opisyal na dapat na magtiwala sa political at security assessment na isinasagawa ng Philippine Embassy sa Warsaw patungkol sa estado ng mga Pinoy sa Ukraine.

“Kaya sila ang nandodoon para sila ang sumuri para sa atin. Siyempre iba pa ‘yung nasasagap natin sa balita, but our people on the ground will make the final call as to whether itataas ‘yung alert level. So far, ang assessment is hindi pa sapat para magkaroon ng Alert Level 4, ‘yung pinakamataas,” giit ni Cacdac.

P5 B budget sa quarantine ng mga OFWS, aprub

ni Lolet Abania | May 27, 2021

Inaprubahan na ni Pangulong Rodrigo Duterte ang karagdagang P5 bilyong badyet para sa mga gastusin sa isinasagawang quarantine ng mga returning Overseas Filipino Workers (OFWs), ayon kay Presidential Spokesperson Harry Roque.

“The President approved an additional P5 billion budget and this was confirmed by Labor Secretary Silvestre Bello III,” ani Roque sa briefing ngayong Huwebes.

“This budget will pay for the quarantine hotel expenses because of the longer quarantine period that we require for our returning OFWs,” dagdag ng kalihim.

Ipinatutupad ng pamahalaan para sa mga returning OFWs ang pagsasailalim sa quarantine sa isang pasilidad ng gobyerno nang 10 araw habang sasailalim sa RT-PCR test sa ika-7 araw ng quarantine.

Sakaling ang kanilang test ay negative, kailangan na lamang tapusin ng mga naturang OFWs ang 14-day quarantine sa kanilang tahanan.

Matatandaang binanggit ni Overseas Workers Welfare Administration (OWWA) Chief Hans Leo Cacdac na ang ahensiya ay mangangailangan ng P9 bilyong karagdagang badyet upang tugunan ang mahabang quarantine period na kailangan ng mga returning OFWs sa gitna ng pagkakaroon pa ng bagong variants ng COVID-19. Mahigit sa 500,000 OFWs ang na-repatriate simula pa ng COVID-19 pandemic kung saan labis na naapektuhan ang mga negosyo at iba pang industriya sa buong mundo.