Taga-CAAP, mga ‘inutil’ sa puwesto, nalusutan, naipuslit ni Zaldy Co palabas ng ‘Pinas ang 3 air assets

ni Pablo Hernandez @Prangkahan | October 31, 2025

SA MGA SANGKOT SA FLOOD CONTROL PROJECTS SCAM, UNANG BATCH MAKUKULONG SA CITY JAIL SINA SEN. JINGGOY, SEN. JOEL, ZALDY CO AT 3 PA? -- Inirekomenda na ng Independent Commission for Infrastructure (ICI) kay Ombudsman Boying Remulla na sampahan ng mga kasong plunder at graft and corruption na may kaugnayan sa flood control projects scam sina Sen. Jinggoy Estrada, Sen. Joel Villanueva, former Ako Bicol partylist Rep. Zaldy Co, Dept. of Public Works and Highways (DPWH) former Usec. Roberto Bernardo, Commission on Audit (COA) Commissioner Mario Lipana at Caloocan City former Rep. Mitch Cajayon.

Dahil diyan ay nakikini-kinita na ng publiko na sa mga sangkot sa flood control projects scam ay sina Sen. Jinggoy, Sen. Joel, Zaldy Co, Bernardo, Lipana at Cajayon ang unang batch na makukulong sa Quezon City jail, ang kulungang inihanda ni Dept. of the Interior and Local Government (DILG) Sec. Jonvic Remulla sa mga sangkot sa pang-i-scam sa kaban ng bayan, abangan!

XXX

KAPAG NAGKATAON, SEN. JINGGOY, KULONG NA SA PORK BARREL SCAM, KULONG PA SA FLOOD CONTROL PROJECTS SCAM -- Ibinasura ng Supreme Court (SC) ang hirit ni Sen. Jinggoy Estrada na i-dismiss na rin ang kinakaharap pa niyang 11-counts ng kasong graft and corruption na may kaugnayan sa pork barrel scam, dahil ayon sa senador, ang mga kaso niyang ito (graft and corruption) ay kahalintulad din daw ng kaso niyang plunder na dinismis na noon ng korte.

Ayon sa SC, magkaiba ang mga kasong graft at plunder ni Sen. Jinggoy, na ibig sabihin na-dismiss man siya sa kasong plunder, ay tuloy pa rin ang paglilitis sa kanya sa mga kasong graft and corruption.

Naku, kapag nagkataon na guilty ang maging hatol sa korte sa mga kasong ito kay Sen. Jinggoy ay makukulong pala siya sa dalawang isyu na may kinalaman sa pang-i-scam sa kaban ng bayan, kulong na sa pork barrel scam, kulong pa sa flood control project scam, boom!

XXX

PARANG IBINIDA NG MGA TAGA-CAAP NA MGA ‘INUTIL’ SILA DAHIL WALA SILANG KAALAM-ALAM NA NAIPUSLIT NI ZALDY CO PALABAS NG ‘PINAS ANG ISANG PRIVATE PLANE AT 2 HELICOPTER -- Kinumpirma ni Civil Aviation Authority of the Philippines (CAAP) Director General Raul Del Rosario na naipuslit na ni Zaldy Co palabas ng Pilipinas ang tatlo nitong air assets. Unang naipuslit patungong Singapore noong Aug. 16, 2025 ang Gulfstream 350 private plane, magkasunod naipuslit noong Aug. 20 at Sept. 11, 2025 ang dalawang Agusta Westland helicopter na ngayon ay nasa Malaysia.

Mantakin n’yo, sa panahon na iyan ay kainitan na ng imbestigasyon sa flood control projects scam na kinasasangkutan ni Zaldy Co, tapos nagawa pa ng "tulisang" kongresista na ito na maipuslit palabas ng bansa ang kanyang tatlong air assets nang walang kaalam-alam ang mga taga-CAAP. Kumbaga, sa inanunsyong ito ni Del Rosario ay para na rin nilang ibinida sa publiko na silang mga taga-CAAP ay mga ‘inutil’ sa puwesto, mga pwe!

XXX

SA CITY JAIL DIN KAYA IPAPAKULONG NI SEC. JONVIC REMULLA SINA ATONG ANG, GRETCHEN BARRETTO AT IBA PANG SANGKOT SA MISSING SABUNGEROS -- Matapos ianunsyo ni Senior Asst. State Prosecutor Charlie Guhit ng Dept. of Justice (DOJ) Charlie Guhit na submitted na for resolution ang mga kasong kidnapping with serious illegal detention at multiple murder laban sa mga sangkot sa missing sabungeros, ay agad inatasan ni PNP Chief, Gen. Jose Melencio Nartatez, Jr. ang Criminal Investigation and Detection Group (CIDG) at mga local police units na kapag may warrant of arrest na ay dakpin agad sina gambling tycoon Atong Ang, dating actress Gretchen Barretto at iba pang sangkot sa kasong ito.

Kung sakali na arestado na sila, sa city jail din kaya sila ipakulong ni DILG Sec. Jonvic Remulla? Abangan!

Mas safe at maayos na public transport ngayong Undas, tiyakin

ni Leonida Sison @Boses | October 31, 2025

Mas abala ngayon ang mga lansangan, kung saan bumabalik ang mga tanawin ng nagmamadaling mga pasahero bitbit ang malalaking bag, pasalubong, at panalangin para sa paggunita ng Undas. 

Mula sa mga terminal hanggang sa pantalan, makikita ang libu-libong Pilipinong sabik makauwi sa kani-kanilang probinsya. Isang taunang eksena na sumasalamin hindi lang bilang tradisyon, kundi sa katotohanang ang mga pampublikong transportasyon ang mas kailangan at maghahatid ng maayos sa ating mga kababayan sa kanilang patutunguhan. 

Sa Baliwag Bus Terminal sa Quezon City, umabot na sa 1,000 pasahero ang naitala mula alas-3 hanggang alas-7 ng umaga pa lang nitong Huwebes, at inaasahang aabot pa sa 10,000 sa buong araw. Ang biyahe ng mga bus ay may pagitan ng 30 hanggang 45 minuto, habang pinapayagan pa rin ang mga walk-in passenger. 

Sa Batangas Port naman, mahigit 68,000 pasahero na ang bumiyahe mula pa noong Oktubre 23, at inaasahang tataas pa ang bilang nito bago sumapit ang Undas weekend, na noong nakaraang taon ay umabot sa 78,000. Ayon sa pamunuan ng naturang port, nananatiling maayos ang operasyon at walang naitalang insidente, salamat sa mahigpit na seguridad at tuluy-tuloy na inspeksyon. Gayunman, hindi rin maiiwasan ang mga aberya, at problema sa tuwing tayo ay bumibiyahe. 

Sa paliwanag ng Department of Transportation (DOTr), tinitiyak ni Assistant Secretary Maricar Bautista na nagdagdag sila ng tauhan para mas maging maayos ang biyahe ngayong Undas. 

Kasunod ito ng direktiba ni Acting Secretary Giovanni Lopez, matapos ang inspeksyon sa mga terminal sa Cubao kung saan natuklasan ang ilang kakulangan tulad ng sira o flat na gulong, kulang sa upuan, at mainit na waiting areas. Gayundin, tatlong bus driver ang nahuling positibo sa ilegal na droga, at agad na kinumpiska ang lisensya. 

Sa gitna ng mga ulat na ito, malinaw na ang Undas ay hindi lang panahon ng paggunita, kundi panahon din ng pagharap sa realidad ng ating transport system. Sa bawat pila ng pasahero, sa bawat bus na umaalis kada 30 minuto, nakikita ang pangangailangan para sa mas episyente, ligtas, at maayos na pampublikong transportasyon. Isang sistemang dapat hindi lang gumagana tuwing Undas, kundi buong taon. 

Nawa ay dagdagan pa ang mga pampublikong sasakyan upang makauwi nang ligtas ang ating mga kababayan sa kanilang mga pamilya, at makaiwas din sa mga trahedya o insidente na maaaring mangyari.

Sa kinauukulan, nararapat lamang na bigyan ng maayos, maginhawa, at maaliwalas na biyahe ang ating mga pasahero. 

Sa mga kababayan, magbaon tayo ng mahabang pasensya sa kabila ng siksikan at pagod dahil sa huli ay makakasama naman natin ang ating mga pamilya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Ginawa ni Vice Ganda para sa public school, tulong o paandar?

ni Ka Ambo @Bistado | October 30, 2025

Matagal na nating binabanggit-banggit sa kolum na ito ang pagiging plastic at pakitang-tao ng ilang “pilantropo” kuno.

Kung tutulong ka sa kapwa, dapat ay lihim na lihim lang.

----$$$--

KAPAG iniyabang at ipopropaganda ang charity — hindi charity ‘yan at hindi pagtulong.

Ang popularidad na inaani ng pilantropo kuno — ay awtomatikong singil o bayad sa kanyang ipinopropagandang pagtulong.

----$$$--

MARAMING ganyan sa social media, ang “bayad sa tulong” -- ay paghigop ng maraming engagement, views, like at comment.

Iyan ang monetization.

----$$$--

IYAN mismo ang inilalarawan sa isyu na kinasasangkutan nina Vice Ganda at Heart Evangelista.

Ano ang moral high ground ni Vice Ganda sa pagtulong kuno sa isang public elementary school na idinidikit kay Heart?

Tulong o paandar?

----$$$$--

IKINUWENTO kasi ng komedyante sa noontime show na may “bulok na paaralan” daw sa “probinsya ni Heart Evangelista”.

Iniyabang niya na nagpagawa siya ng eskwelahan dito at nagkaloob ng reading materials.

Ano ang motibo ng kanyang pagyayabang?

----$$$---

TAMA lang ang pagpalag ng ayudante ni Heart na si Resty Rosell sa patutsada ni Vice.

May malisya ang “propaganda” ng komedyante lalo pa’t may tsismis na posibleng kumandidato itong senador.

Maaari ring umaakto siyang “attack dog”.

----$$$--

KUNG nais niyang umagaw ng publisidad at manatiling pinag-uusapan  -- bago mag-eleksyon, huwag siyang sumakay sa personalidad ng ibang tao.

Pinakamahalaga, huwag niyang sakyan ang “sitwasyon” ng isang pobreng public school.

----$$$--

DAPAT unawain ni Vice na may sariling pondo ang public school — at imposibleng siya ang “magpagawa ng gusali” — at kung tumulong man siya — iyan ay kusa niya, pero hindi nakasandal sa kanyang tulong ang “operasyon” ng public school.

Dapat siyang humingi ng paumanhin sa mga guro, opisyal at mga magulang ng mga estudyanteng matagal nang nag-aaruga ng naturang institusyon.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.