Halos 200 dayuhan, sinita sa anti-scam operasyon sa Zamboanga Sibugay

by BRO @News | October 2, 2026

Photo: The Philippine Army’s 1st Infantry Division

Halos 200 dayuhan ang sinita ng mga awtoridad sa isinagawang operasyon laban sa umano’y cyber scams at paglabag sa immigration laws sa Alicia at Siay, Zamboanga Sibugay.

Kabilang sa iniimbestigahan ang posibleng koneksyon ng mga dayuhan sa mga organisadong grupo ng cyber fraud. Narekober din sa operasyon ang tinatayang 2,000 cellphone, computer, laptop at iba pang electronic devices.

Sinusuri ngayon ng NBI at Bureau of Immigration ang kanilang mga papeles at posibleng pananagutan.

Tinitingnan din ng mga awtoridad kung may ilan sa mga dayuhang ito na biktima ng human trafficking, sapilitang pagtatrabaho at ilegal na recruitment.

Ayon sa militar, poprotektahan ang karapatan ng mga dayuhan habang isinasagawa ang imbestigasyon at bibigyan ng due process ang mga mapapatunayang lumabag sa batas.

Mga mayors, kasabwat, kakastiguhin sa illegal logging at mining

ni Ronalyn Seminiano Reonico | November 25, 2020

Maaaring matanggal sa puwesto at makasuhan ang mga mayors na sangkot sa illegal logging at mining operations, ayon sa Malacañang.

Matatandaang ang illegal logging at mining ops ang itinuturong dahilan ng matinding pagbaha sa ilang lugar nang manalasa ang sunud-sunod na bagyo sa bansa.

Ayon kay Department of Interior and Local Government Secretary Eduardo Año, sangkot ang ilang mayor sa naturang gawain at nagsasagawa na rin umano ng imbestigasyon ang ahensiya sa tulong ng Philippine National Police at local government units upang mabantayan ang illegal logging at mining sa ilang lugar.

Saad pa ni Presidential Spokesperson Harry Roque, “Depending on the final results of the investigation, pupuwede pong matanggal sa puwesto iyang mga mayor na iyan at pupuwede ring kasuhan ng kasong kriminal.”

Mensahe naman ni Roque sa mga mayors, “Well, mga mayors, ‘no, nandiyan po kayo para ipatupad po ang batas, hindi para kayo ang lumabag ng batas. Hindi po dapat ginagamit na para sa negosyo ang inyong posisyon.

“Nakita naman po natin ang danyos na dulot ng illegal logging at illegal mining lalung-lalo na riyan sa probinsiya ng Cagayan, you will have blood in your hands kung poprotektahan ninyo po ang mga illegal miners at illegal loggers.”