P50K pautang sa OFW, inihirit

ni Mylene Alfonso @News | August 31, 2023

Isinusulong ni Sen. Lito Lapid ang Credit Assistance Program (CAP) para sa mga overseas Filipino workers (OFWs).

Sa inihaing Senate Bill No. 2390, makaka-avail ang mga OFW ng pautang na hanggang P50,000 mula sa Overseas Workers Welfare Administration(OWWA).

Ito’y upang magkaroon ng panggastos ang pamilya ng OFWs sa loob ng tatlong buwan, kabilang na rin ang bayad sa recruitment process at plane tickets.

Sa ilalim pa ng panukala, ang utang ay puwedeng bayaran sa loob ng 12 buwang installments o higit pa pero hindi lalagpas sa 24 na buwan na may interest rate na anim na porsyento kada taon.

OFW sa Saudi, hinatulan ng bitay

ni BRT @News | July 21, 2023

Kinumpirma ng Department of Migrant Workers (DMW) na isang overseas Filipino worker (OFW) sa Saudi Arabia ang nahatulan ng bitay.

Sa panayam kay DMW Undersecretary Hans Cacdac, nakikipag-ugnayan na umano sila sa Department of Foreign Affairs (DFA) kaugnay sa naturang kaso ng OFW na nasa death row.

Mayroon umanong hinihinging "blood money" ang pamilya ng biktima para hindi mabitay ang OFW na nagkakahalaga ng 30 milyong Saudi riyal.

Samantala, sa huling datos ng DFA, nasa 83 Pinoy sa iba't ibang bansa ang nasa death row o nasentensiyahan ng parusang kamatayan.

'Pinas, pasok sa visa-free travel sa Canada

ni BRT | June 8, 2023

Kwalipikado na ang Pilipinas para sa visa-free travel program ng Canada.

Ito ay matapos na ianunsyo ng Canada ang 13 mga bansa, kabilang ang Pilipinas sa mga napasama sa pagpapalawak pa nito ng kanilang visa-free travel program.

Ayon kay Canadian Minister for Immigration, Refugees and Citizenship Sean Fraser, ang naturang kautusan ay epektibo na.

Aniya, ang mga bisitang mayroong Canadian visa sa nakalipas na 10 taon o ang mga kasalukuyang mayroong hawak na valid United States non-immigrant visa ay pahihintulutan na ring bumisita sa pamamagitan ng pag-a-apply para sa electronic travel authorization.

Ito aniya ay nangangahulugan lamang na mas marami pang mga indibidwal mula sa Pilipinas ang maaari nang magtungo at makabisita sa kanilang bansa nang walang nararanasang hirap sa pagsasaayos ng mga requirements para magkaroon ng visa.