ni Nympha Miano-Ang - @Life and Style | August 30, 2020
Mangilan-ngilan ang ating naririnig at nababasa na may mga sibilyan at ilang awtoridad ang nagiging biktima ng pananambang. Maging ang mga makapangyarihang tao ay hindi nakaliligtas sa ganitong uri ng krimen. Sa mga sigalot din ng pamilya at negosyo ay nariyan ang pagpaplano ng ilang may tanim na ngitngit o inggit sa kalooban ay kanilang pinagtatangkaan ang buhay at kahit ang kanilang mga kakilala, kaibigan o mahal sa buhay.
Sino ka man sa mga ito ay dapat mong protektahan ang iyong sarili laban sa anumang banta ng kaaway lalo na kung may nasagasaan, napasama mo ang kalooban o mga naiinggit. Heto ang mga sumusunod na hakbangin upang maiwasan mo na matambangan.
1. Huwag tatalikod ng upo mula sa pintuan ng iyong opisina o silid. Mahirap nang hindi mo nakikita ang sinuman na biglang papasok sa iyong lugar. Kapag hindi mo pansin ang sinumang dumarating, higit na mapanganib para sa'yo.
2. Ibahin mo ngayon ang dinaraanan mo sa papasok at paglabas ng bahay. Kailangan ang mga iskedyul mo ay gawin mong lihim at huwag malalaman ng iba para mahirapan sila kung paano ka matatagpuan. Kung ang mismong ang mga kaibigan mo ay alam kung nasaan ka ng alas-6:30 ng gabi ng Miyerkules, tiyak na malalaman din ito ng iyong kaaway. Kapag ang lahat ng tao sa paligid mo ay walang alam kung nasaan ka, maliit ang tsansa ng kaaway na ikaw ay matambangan. Huwag mong ipo-post sa social media ang anumang mga biyahe palabas o paalis ng bansa at huwag ding iaanunsiyo sa publiko ang iyong mga lugar na pupuntahan.
3. Tsekin ang iyong behikulo. Ang mga terorista ay organisado sa paggamit ng car bomb dahil madali nila itong magawa at matunton kung nasaan nakahimpil ang iyong sasakyan. Heto pa, madali nilang maisagawa ang pag-detonate ng remote kahit anong oras. Kaya bago mo ipasok ang susi sa ignition, sumilip ka muna sa ilalim ng iyong sasakyan kung may suspetsa ka na mayroong nakakabit na kakaibang wires o ilaw. Buksan din ang hood ng sasakyan at tsekin kung may anumang pagbabago sa hitsura ng iyong makina, digital devices o plastic explosives (isang nakadikit na bagay).
4. Iwasan ang anumang spotlight kung nasa ibabaw ng entablado. Kung may miting de avance, ‘wag magpalagay ng spotlight kung gusto mong makita ka dahil higit kang mata-target o makikita ng iyong assassin at lalo kang madaling matukoy dahil mamumukhaan ka at makikilala. Iwasan din ang masyadong magpupunta sa mga kontrobersiyal na aktibidad. Mabuti na lang at quarantine period at hindi ka masyadong naglalalabas at mainam nang mag-zoom meeting na lamang.
5. Humiwalay ng ibang sasakyan sa ibang mga kasamahan. Ang pagbibiyahe na kasama ang mga mahal sa buhay ay peligroso rin, kaya kasama mo man sila ay sa ibang sasakyan ka sumakay.
6. Ibahin mo rin ang behikulo na iyong ginagamit sa tuwing may pupuntahan kang lugar.
7. Limitahan ang pagpunta-punta sa mga pampublikong lugar lalo na kung walang seguridad ang pupuntahan.
8. Kung may natanggap kang pagbabanta, agad kang mag-report sa mga awtoridad.
9. Gumamit ng iba pang safety device at tamang security system sa opisina o bahay at kumuha na ng mga mapagkakatiwalaang bodyguards.