Tips para 'di lumaking todo-asa sa parents at maging mabuting ehemplo

ni Nympha Miano-Ang - @Life and Style | April 16, 2021

Kung responsibilidad man ng magulang na palakihin ka, habang teenager ka pa lang dapat, kahit paano ay marunong ka nang tumayo sa sariling mga paa, maging independent kumbaga sa iba pang aspeto. Okey, basahin ninyo guys ang artikulo na ito, para hindi ka masyadong umasa sa iyong magulang habang pinagbubuti mo ang relasyon sa kanila.

1. MAG-APLAY NG TRABAHO. Kung may edad ka na, o 18-anyos na, ang magkaroon ng trabaho ay isang mainam na paraan para madama mo ang kasiyahan sa mundong ito at magkaroon ka ng mahalagang karanasan na kailangan mo mula nang magtapos sa kolehiyo. Magsikap at magsipag ka sa trabaho at maging responsable, pero huwag ka masyadong magpapakapagod. Tandaan na ang pera ay hindi lang maghahatid ng kasiyahan, ito ang maghahatid sa iyo ng pinansiyal na seguridad.

2. MAG-IMPOK NG PERA. Mag-impok ng at least 50 porsiyento ng iyong tinatanggap na suweldo. Lalago ang iyong pera sa savings account at ligtas ito. Imbes na mawawalan ka ng pera, higit itong tutubo kung magbubukas ng savings account sa mapagkakatiwalaang bangko.

3. MAGTIPID. Huwag gagastahin ang iyong pera sa maliliit na bagay na hindi mahalaga sa iyo at hindi mo kailangan. Isa pa, huwag mo ring gagastahin ang iyong pera sa mga “pinakabago o anumang nauusong bagay” anuman ito. At dahil mabilis ang pagbabago ng teknolohiya, maraming umuusbong na bago, mahirap magsisi sa dakong huli. Maraming iba pang bagay na kailangan mo sa kinabukasan, gaya ng sasakyan, pera para pampaenrol sa kolehiyo, pera pampakasal, bagong unang bahay etc. Ang mga malalaking bagay na ito ay higit na mahalaga kaysa sa video games, alahas, magagandang damit, sapatos, bisikleta o skateboards. Ang mga malalaking bagay ay mas mahalaga para sa iyong kinabukasan. Kailangan mo na ngayon na magsimula na mag-impok. Pinakamahalaga ngayong pandemya ang may ilalaan ka para sa anumang pangangailangang medikal.

4. MAG-BOLUNTARYO. Mag-alok ng tulong sa ilang araw o linggo/buwan nang walang kapalit na bagay. Magboluntaryo sa mga charitable institutions etc, magbantay sa mga lockdown checkpoints o magbantay sa bahay ng kapitbahay na iiwan nila ng ilang araw, mag-security officer sa inyong barangay. Habang wala kang natatanggap na bayad, may sapat kang karanasan, matuto kang magtrabaho sa iyong sarili, magkaroon ng karanasan sa labas ng iyong bahay at magkaroon ng dagdag na impormasyon mula sa iyong resume. Ang pagboluntaryo ng trabaho na nakasaad sa resume ay mainam dahil ipinakikita nito na aktibo ka sa iyong komunidad.

5. MAGLUTO NG HAPUNAN. Kung minsan ay tumulong ka sa iyong magulang, ikaw na ang magluto ng hapunan, maski isang beses sa isang linggo. Iwasang kumain ng fast food. Kapag magluluto ka, matuto ka kung paano ito gawin habang ikaw ay nagiging expert na, para pagtanda mo, wala man sa tabi mo ang nanay mo, maging handa ka sa buhay mo. Isipin kung paano mo mapagluluto ang buong pamilya lalo na kung gutum na gutom sila at paborito nila ang iyong lulutuin. Mag-eksperimento na rin ng iba’t ibang resipe at kung mahihirapan ka, subukan uli. At least malalaman mo sa susunod kung ano na ang dapat mong gawin.

6. TUMULONG SA GAWAING BAHAY. Kung may sarili kang kuwarto, kailangan mong matutunan na maglinis nito. Gawin na lahat ng gagawin na maglinis at pag-aayos ng sarili mong kuwarto habang nagkakaedad ka.

7. HUWAG KA NANG MAGPABILI NANG MAGPABILI NG KUNG ANU-ANO SA IYONG MAGULANG. Puwede kang bilhan ng magulang mo ng damit, sapatos, pagkain etc. Gayunman, hindi na nila obligasyon kung gusto mo pa ng Ipods, computer o bagong cellphone. Bilhin na ang mga ito buhat sa sarili mong pera, kung talagang kailangang-kailangan ito.

8. ALAGAAN ANG NAKABABATANG KAPATID. Pagdating ng araw, mag-aalaga ka rin ng sariling mga anak.

9. TANDAAN na gusto ka pa rin nilang makita, makapiling at alagaan, mahalin ng iyong mga magulang. Habang teenager ka, nasa poder ka pa rin nila bilang anak. Huwag mo silang babalewalain, tulungan mo sila sa lahat ng bagay.

10. Ang paglayas mula sa inyong tahanan ay hindi nagpapakita ng iyong responsibilidad at tiyak na sa kalye ka titira at magpapalaboy-laboy. 11.Tandaan bata ka pa, kaya sikaping maging masaya habang bata pa, dahil pagtanda mo hindi mo na magagawa ang lahat ng magagawa ng isang bagay. Mag-enjoy ka sa iyong kabataan at mangarap.

Ngayong mainit ang panahon, marami ring imbiyerna...

Tips para 'di umabot sa sakitan ang pakikipagtalo.

ni Nympha Miano-Ang - @Life and Style | April 15, 2021

Tag-init na ngayon. Pati ulo ng tao, ang daling kumulo at mag-init. Konting kibo, naha-highblood na! Ang sigalot ay bahagi ng bawat isang relasyon. Gaano man kaayos ang relasyon ng dalawang tao dumarating ang sandali na mayroon din silang hindi napagkakasunduan at isang bagay ang kailangang lutasin sa pagitan nilang dalawa. Pag-aralan lamang kung paano makipagtalo nang hindi hahantong sa malalang away ay makatutulong na ito upang tagumpay ninyong maresolba ang lahat nang walang nasasaktang ibang tao at makasakit ng inyong relasyon.

1.Alamin ang isyu na kailangang lutasin. Gumawa ng mga plano para maresolba ito. Ang isang mainam na plano ay makatutulong upang malutas ang anumang alitan nang mapayapa.

2.Trabahuhing mabuti kung paano lulutasin ang problema, hindi ang magkonsentra sa pagkadismaya at magagalit. Kapag ang layunin ng isang argumento ay para isumbat ang dati nang sama ng loob, walang tiyak na mangyayaring magandang solusyon sa problema. Tiyakin na hindi mo magagawang mambato ng anumang maliit na problema sa gitna ng pagtatalo. Lutasin ang isang problema sa pagbibigay ng tamang panahon na ikalulutas nito.

3.Pigilan ang panggigigil na siraan ang karakter o pagkatao ng iba. Oo, talagang nakagigigil na idiin ang tao sa kanyang masamang ugali o kaya ay saktan ang loob niya sa mainitang pagtatalo, tiyak na wala namang kahahantungang resulta ang lahat kapag pinairal ang panunumbat at siraan ng ugali.

Siguradong kapag may nasaktan man sa bawat isa, matatanim pa rin sa damdamin ng isa ang sama ng loob sa mahabang panahon at iyan ngang mga salitang tumarak sa kanyang dibdib ay gawa ng away na naganap.

4. Oo, nangyari na ang pagtatalo. Sarado na ang mga isipan kung sino ang tama at mali sa bawat isa. Nararapat na bago pa lamang na uminit ang sitwasyon ay agad nang ayusin ang pinagtatalunan. Huwag makikipag-aaway kung ipipilit lamang ang sarili na lagi kang tama sa bandang huli.

5. Ihinto na rin ang pambabato ng akusasyon sa naturang tao. Ang mga pangungusap na gaya ng, “lagi ka na lang” at “hindi ka kahit kailan” ay dapat na mga salitang iiwasang masambit. Sa halip mas mabuti pang bitiwan ang mga salitang,” Nararamdaman ko,” sa halip na “Masyado mo akong…”

6. Magkaroon ng malayong pagitan sa bawat isa. Okey lang na habang nakikipagtalo ay lumalayu-layo ka ng hakbang para mapalamig ang sarili. Ito’y para mapigilan mo rin naman ang sarili na makapagbitaw ng masamang salita o makapanakit na maaaring ikasisi sa dakong huli.

7.Tapusin na lamang ang away na tiyaking walang nasira ang pagkatao ng bawat isa. Kung maaari, bigyan muna ng tsansa ang isa’t isa na makapagpalamig at saka mag-usap sa ibang araw at iyan ay kung kapwa na kayo nakapag-isip-isip ng inyong kamalian pareho at makahingi na rin ng tawad sa bawat isa.

Oils na pampaalis ng stress, kirot at pag-aalala

ni Nympha Miano-Ang - @Life and Style | April 14, 2021

Alam n’yo bang ayon sa mga siyentipiko, malaki ang naitutulong ng essential oils sa katawan at isipan? Ito iyong mga extracts o katas buhat sa buto, talulot ng bulaklak, dahon o prutas na kapag naamoy o nagpahid sa katawan ay naiiwasan ang sakit, pumapatay ng mikrobyo, nagpapakalma at gumaganda ang mood ng tao.

KUNG MASAKIT ANG ULO. Mabisa riyan ang lavender oil, nakapagpaparelaks at nagpapaalis ng sakit ng ulo – kahit migraine tanggal! Ang taglay na linalool at lavanduly acetate nito ay napatunayan nang nagpapakalma. Nilalabanan ang nai-stress at natetensiyong masel at mga ugat dahilan kaya sumasakit ang ulo. Subukan: Magpatak ng lavender oil sa cottonball at amuy-amuyin kapag masakit ang ulo.

KAPAG DI MAKA-CONCENTRATE. Mainam ang peppermint oil para madali kang umalerto at makapag-concentrate! Kahit ang mga atleta habang nasa treadmill na lumalanghap ng peppermint oil ay higit na lumalakas. Ang amoy ng peppermint oils ang nagpapakilos sa parte ng utak na responsable sa pagkaalerto. Subukan: Magpatak ng peppermint oil sa bulak at amuy-amuyin habang pagod o habang nage-exercise.

KUNG NAG-AALALA KA. Ilang-ilang oil ang sagot diyan. Ang amoy ng ilang-ilang ay nagpapababa ng blood pressure. Higit na nakare-relaks, sumasaya ang isang nalulungkot kapag nakaamoy nito. Subukan: Magpatak sa cotton ball at langhap-langhapin kapag sobra kang nag-aalala.

KAPAG BARADO ANG ILONG SA SIPON SANHI NG ALLERGY. Swak diyan ang amoy ng eucalyptus oil. Pinaluluwag ng extract na ito ang nasal at bronchial passages natin at ang mucus, pampatanggal din ng pamamaos, nababawasan ang plema at mabisang decongestants. Kaya ito rin ang pangunahing sangkap sa mga over-the-counter cold and cough medicines. Napatunayang nakatutulong sa asthma at sinusitis. Subukan: Maglagay ng ilang patak ng eucalyptus oil sa isang kalderong kumukulong tubig at ang usok nito ang siyang singhut-singhutin sa loob ng ilang minuto.

PAANO KUNG BAD MOOD? Kaya kang pangitiin ng chamomile oil. Kung ang chamomile tea ay nakarerelaks. Ang aroma at chemical compounds ng essential oil na ito ay nagpapaganda ng mood. Pinabababa ang stress hormones at inilalabas ang serotonin (pampakalma) sa utak. Subukan: Maglagay ng 5 patak ng chamomile oil sa maligamgam na pampaligo. Ang amoy nito ay nakapagpapakalma. Papasok sa balat ang chemical compound nito at tiyak agad kang marerelaks. TIP: Ang essential oils ay mabibili sa health food stores at sa ilang malalaking grocery stores.