Mga hakbang para yumaman sa negosyo base sa zodiac sign

ni Maestro Honorio Ong - @Kapalaran ayon sa Numero| May 06, 2021

Dear Maestro,

Naisipan kong sumangguni sa inyo upang alamin kung ano ang aking kapalaran sa aspetong pinansiyal? Isinilang ako noong September 11, 1979, gusto kong malaman kung masuwerte ba ako sa negsoyo at may pag-asa rin ba akong yumaman?

Umaasa,

Devie ng San Agustin, San Simon, Pampanga

Dear Devie,

Para suwertehin ang isang tao sa negosyo, anuman ang zodiac sign at birth date, ang unang tanong dapat ay ganito, “Sino ba ang makakasama niya sa nasabing negosyo?”

Sa katulad mong Virgo, mapalad ka sa mga kasama sa negosyo na may zodiac sign na Taurus, Capricorn, Libra at kapwa mo Virgo, higit lalo silang may mga birth date na 5, 14, 23, 8, 17, 26, 1, 10, 19 at 28.

Ang ikalawang tanong naman ay, “Ano ang nature o uri ng kanyang negosyo?”

Ikatlong tanong, “Matipid ba siyang tao o siya ay isang bulaksak o magastos na nilalang? Mayabang ba siya o low profile sa lipunang kanyang ginagalawan?”

Sa mga inilahad na katanungan sa itaas, nangangahulugan na susuwertehin lang ang isang tao sa negosyong kanyang pinasok kung ka-compatible o suwerte sa kanyang buhay ang mga taong makakasama rito. Halimbawa, suwerteng tindera, ahente, sekretarya o sinuman ang kasa-kasama sa kanyang business office o site.

Pangalawa, suwerte ba sa iyo ang negosyo o kalakal na ibinebenta mo? Halimbawa, kung ikaw may zodiac sign na Virgo, “earth or lupa” ang elemento mong tinataglay. Kaya ang dapat mong maging negosyo ay may kaugnayan din sa earth o lupa. Bukod sa “earth” ang iyong elemento, dapat ding isaalang-alang kung ano naman ang suwerteng negosyo sa ruling planet ng Virgo na Mercury.

Pangatlo, saang lugar ka ba magnenegosyo? Ito ay dahil may mga negosyong minamalas dahil mali ang lugar o puwesto. Habang madali namang pinagpapala ang isang negosyo kapag suweto o angkop na lugar ang napuwestuhan o napuntahan niyang business site.

At ang pang-apat, pinakamahalaga sa lahat ay ang attitude o ugali ng taong nagnenegosyo.

Halimbawa, mayabang ang nasabing tao kung saan pinipilit niyang imintina ang kanyang negosyo kahit “tulak” o “paluwal” na siya dahil sa sobrang laki ng upa sa puwesto, ayaw niyang bitiwan ang nasabing negosyo, masabi lang kasi na may negosyo siya kahit na baon na siya sa utang. Dahil mayabang, imbes na umasenso, hindi lamang ang negosyo kundi pati ang buhay niya, lalo lang nababaon sa mga pagkakautang.

Kung ganu’n ang ugali ng isang tao, na nagnenegosyo lang para magmayabang at masabing may negosyo kahit tadtad na ng utang, ikaw na ang sumagot sa tanong na, “Susuwertehin ba sa negosyo ang ganu’ng klase ng tao na ang tunay na motibo ng kanyang unconscious na isipan ay ang magmayabang lang?”

Tunay ngang marami pang bagay na dapat isaalang-alang upang mabatid kung ang isang tao ay susuwertehin sa negosyo at ang mga bagay na ‘yan ang ipaglilikod natin sa susunod na mga araw.

Samantala, Devie, sundin mo muna ang mga “sure tips” na inilahad sa itaas at makikita mo na sa susunod na taong 2022 at sa edad mong 43 pataas, susuwertehin, uunlad at tuloy-tuloy ka nang sasagana sa kahit anong negosyong maisip mo hanggang sa tuluyan ka na ring yumaman at umangat ang kabuhayan na nakatakdang maganap sa taong 2034 sa edad mnong 55 pataas.

Ayaw tumandang dalaga, dapat sumama sa lahat ng gala para makilala si Mr. Right

ni Maestro Honorio Ong - @Kapalaran ayon sa Numero| May 05, 2021

Dear Maestro,

Naisipan kong sumangguni sa inyo upang malaman kung ano ang masuwerte kong araw, buwan at taon, gayundin ang kulay at numero at kung paano gagamitin ang mga ito? Sana ay malaman ko rin kung makapag-aasawa ako o habambuhay na talaga akong tatandang dalaga? December 10, 1974 ang birthday ko.

Umaasa,

Connie ng Rosario, Rodriguez, Rizal

Dear Connie,

Sa praktikal na pag-aanalisa, wala munang hula, sa totoo lang ay mahirap nang makapag-asawa kung ang edad ng isang babae ay tumuntong na sa 40, lalo pa sa iyo dahil 46-anyos ka na ngayon. Kumbaga sa bolitas ng hueteng ay gradweyt ka na, gayunman, abot na abot pa naman sa bolitas ng lotto.

Kung gusto mo talagang makapag-asawa, dapat seryoso ka sa paghahanap ng mga lalaking makakatugma mo sa buhay at makatutugon sa iyong pangangailangang seksuwal at emosyunal.

Ibig sabihin ng seryoso ay maging priority mo talaga ang pag-aasawa. Halimbawa, may isang grupo na nag-iimbita sa iyo, ‘wag kang mag-inarte pa, kung saan sasabihin pang, “Sige, pag-iispan ko muna kung sasama ako,” o kaya naman, “Sige, susunod na lang ako,” pero hindi naman pala sasama o susunod sa isang okasyong napag-usapan.

Kung ganu’n ang istayl ng pakikisalamuha mo sa iyong mga kaibigan at kakilala, paano ka nga ba makapag-aasawa? Parang takot ka sa mga activities na may kaugnayan sa lipunan, gayung dapat ay alam mo na sa paglabas-labas ng bahay, puwedeng makatalisod ka ng isang lalaking mapapangasawa.

Halimbawa namang may activities sa inyong lugar, anumang gawain ‘yun at niyaya ka, ‘wag kang tatanggi. Hindi dapat mamutawi sa bibig mo ang “Hindi ako makakasama kasi marami akong ginagawa.” Maaari ring ang iyong alibi ay, “Sige, kayo na lang dahil bawal akong mapuyat.” Kung ganyan ang attitude mo, paano ka nga ba makapag-aasawa?

Sa halip, para makapag-asawa ang isang tumatandang babae na tulad mo, kapag may nagyaya, wala nang pagdadalawang-isip pa, gora na! Pero siyempre, dahil mayroon pang pandemya, kapag lalabas ng bahay, sumunod pa rin sa health protocols na pinaiiral ng ating gobyerno.

Tandaan mo, sa bawat pagtitipon, okasyon, gawaing panlipunan o paglabas mo ng bahay, dagdag na oportunidad ang mga ito upang makatagpo ka ng lalaking makakasama habambuhay.

At para mabilis makatagpo ng lalaking mapapangasawa, dapat palagi ka ring magsuot ng kulay na dilaw na siyang kulay ng birth date mong 10 o birth date mong 1 (dahil ang 10 at 1+0=1) o kulay na pula, pink at iba pang kulay na hinango sa pula. Puwede rin ang asul at lila paminsan-minsan bilang pamalit sa pula.

Ganito ang paggamit, tuwing sasapit ang mga petsang 1, 10, 19, 28, 4, 13, 22, 31, 7, 16, 25, 2, 11, 20 at 29, lalo na at natapat sa araw ng Lunes, Linggo at Sabado ang nasabing mga petsa, dilaw ang suotin mong kulay. Habang tuwing sasapit naman ang petsang 3, 12, 21, 30, 6, 15, 24, 9, 18 at 27, lalo na at natapat ang nasabing mga petsa sa araw ng Martes, Huwebes at Biyernes, pula o asul ang gamitin mo. Sa ganyang paraan, mas madali mo nang mahahatak ang magandang kapalaran, lalo na sa larangan ng pag-ibig at pakikipagrelasyon. Hinggil naman sa mapalad mong numero, ang lahat ng petsa sa itaas ay siya ring mapalad mong numero, sila ang mga numerong may sumatotal na 4, 1 at 3, 6, 9.

Dagdag pa rito, upang mas madali kang makapag-asawa, palagi kang magsasama sa mga taong may zodiac sign na Leo, Aries, Gemini at kapwa mo Sagittarius, higit lalo kung ang petsa ng kanilang birth date ay ang mga petsa na binaggit na sa itaas. Sapagkat darating ang isang pagkakataon sa iyong buhay na sa nasabing mga birth date huhugot ang kapalaran ng iyong mapapangasawa at makakasama habambuhay.

Habang, ayon sa iyong Love Calendar, sa sandaling sinunod mo ang mga simpleng rekomendasyong inilahad, tiyak ang maganap— kahit 46-anyos ka na, makapag-aasawa ka pa rin at magkakaroon ng simple at masayang pamilya na nakatakdang mangyari sa susunod na taong 2022 sa edad mong 47 pataas.

Pramis ng pamilyadong BF, ‘di dapat asahan dahil magiging forever kabit

ni Maestro Honorio Ong - @Kapalaran ayon sa Numero| May 03, 2021

Dear Maestro,

Paano malalaman kung mahal ka ng isang pamilyadong tao? Puwede bang mangyari na ako ang piliin niya kaysa sa kanyang legal wife? ‘Yun kasi ang sabi at pangako niya sa akin, kumukuha lang daw siya ng tiyempo at iiwanan niya ang kanyang asawa para kami na ang magsama habambuhay.

Compatible ba kami at kami na ang magsasama habambuhay? October 1, 1996 ang birthday ko at January 12, 1973 naman ang birthday niya.

Umaasa,

Althea ng San Gabriel, Teresa, Rizal

Dear Althea,

Alam mo, mukhang malabo ang pangako ng boyfriend mong may asawa at pamilya na dahil kahit saang anggulo mo tingnan, sakali mang manaig ang relasyon n’yo, hangga’t hindi niya hinihiwalayan nang legal ang kanyang misis, ang inyong relasyon ay mananatiling immoral. Kaya para makaiwas ka sa kasalukuyan mong sitwasyon, mas mainam kung ‘wag ka nang makipagkita sa kanya kahit mahal n’yo ang isa’t isa.

Sapagkat sa pag-aanalisang Astro-Numerology, sadyang hindi naman compatible ang zodiac sign mong Libra na pinangingibabawan ng elementong air o hangin sa zodiac sign niyang Capricorn na may elementong earth o lupa, ganundin ang birth date mong 1 at 12 o 3 (ang 12 ay 1+2=3) naman ang boyfriend mo ay hindi rin compatible sa isa’t isa.

Sa tanong mo namang puwede ka bang piliin ng isang taong may pamilya na, ang sagot ay hindi dahil kung magagawa niya ‘yun, dapat ay ngayon na.

Dahil hindi niya kayang iwanan ang kanyang pamilya, the best way ay gagawa siya ng pangako at dahilan, at ang pinakamagandang rason para hindi muna mangyari ang “pangako” ay sasabihin niya sa iyong maghintay ka muna dahil humahanap lang siya ng tamang pagkakataon.

Pero pustahan tayo, ang “tamang pagkakataon” na hinahanap niya ay hindi na darating pa kahit kailan hanggang sa malibang ka nang malibang at mawili sa pakikisama at pakikisalamuha sa isang lalaking may asawa at pamilya na.

Tulad ng nasabi na, Althea, siguradong lilipas ang maraming mga taon, habang tuloy-tuloy ka niyang napagpapasasaan, hindi darating ang hinihintay mong pagkakataon na mas pipiliin ka niya kaysa sa kanyang pamilya, hanggang sa matagpuan mo na lang ang iyong sarili na losyang at habambuhay na naging kerida at ang masaklap pa nito, baka mabuntis ka niya at sa bandang huli ay magiging single mom ka pa.

Kaya kung hindi ka naman makakapayag na maging habambuhay na kabit, ano pa ang hinihintay mo? Habang bata ka pa, maganda at may hitsura, mas makabubuting humanap ka ng isang binata, na pakakasalan ka at habambuhay na mamahalin.

Sa ganyang paraan, hindi lang sariling landas mo ang iyong itinutuwid, bagkus, tinutulungan mo rin ang iyong karelasyon na magbagong buhay, na maging mabuting magulang sa kanyang mga anak at responsableng ama ng tahanan.

Kapag umiwas ka sa ka-immoralan, kasabay nito ay ginagabayan mo ang iyong kapwa na gumawa ng kabutihan, mahalin at maging tapat sa kanyang pamilya, darating ang panahong gagantimpalaan at pagpapalain ka ni Lord. Sa aspetong pag-ibig at pakikipagrelasyon, bibiyayaan ka ng isang maunlad at maligayang pag-aasawa, hatid ng lalaking isinilang sa buwan ng Pebrero, na nakatakdang mangyari at maganap sa taong 2023 sa edad mong 27 pataas.