Suwerteng panahon para tumaya at manalo sa lotto

ni Maestro Honorio Ong - @Kapalaran ayon sa Numero| July 08, 2021

Dear Maestro,

Ako ay jeepney driver at halos nawalan na ako ng kinikita mula nang magkaroon ng pandemya. Sa edad kong 29, may girlfriend ako at mag-aapat na taon na kami. Gusto niya nang magpakasal, kaso hindi ko pa kayang magpamilya at wala rin akong ipong pampakasal. Ang tanging inaasahan ko lang para magkapera ng malaki-laking halaga ay ang pagtaya sa lotto, pero hindi naman ako tumama. Kaya sana ay mabigyan n’yo ako ng gabay kung ano ang dapat kong gawin upang magkaroon ako ng malaking halaga para mapakasalan ang aking nobya at makapagsimula ng sariling pamilya.

Gusto ko ring malaman kung compatible ba kami ng girlfriend ko na isinilang noong May 3, 1991? September 18, 1992 naman ang birthday ko.

Umaasa,

Virgo Boy ng Bancal, Meycauayan, Bulacan

Dear Virgo Boy,

Ang birth date mong 18 o 9 (ang 18 ay 1+8=9) at 3 naman ang birth date ng girlfriend mo ay nagsasabing compatible kayo dahil kapwa kayo nasasakop ng numerong tinatawag na series of 3-6-9, kung saan habang patuloy kayong nagmamahalan, patuloy ding darating ang suwerte at magandang kapalaran sa inyong buhay.

Ganito ang paggamit ng inyong numero na 9 at 3 na may ruling planetang na Mars at Jupiter upang higit n’yong mapakinabangan nang husto ang kanyang kapangyarihan.

Pagkatapos n’yong mag-date, halimbawa ay maghapon kayong magkasama at masayang-masaya kayong dalawa na halos ayaw n’yo nang matapos ang araw at ayaw n’yo nang maghiwalay, kapag ganu’n ang feeling o pakiramdam, saka kayo makipagsapalaran sa kahit anong number games. Sa ganu’ng paraan, walang mintis na tatama kayo ng malaking halaga.

Isa pang halimbawa, nanood kayo ng sine at buong pagmamahalang nagromansahan kayo at dahil du’n, pakiramdam n’yo ay ang sarap-sarap talaga na tila bitin na bitin pa nga, ang senaryong nabanggit ay napakaganda ring pahiwatig o pahimakas. Kaya bago kayo tuluyang maghiwalay upang umuwi, dumaan muna kayo sa lotto outlet na may pulang dingding o pinto at may teller na mahaba ang buhok. Kapag nagawa n’yo ‘yan, mas madali n’yong masasapol ang jackpot.

Mapalad para sa inyong magkarelasyon ang kulay na red, violet, lavender, purple at maroon, higit lalo sa mga petsang 3, 12, 21, 30, 6, 15, 24, 9, 18 at 27, partikular kung ang mga petsang nabanggit ay natapat sa araw ng Martes, Huwebes at Biyernes.

Maganda namang magpakasal sa susunod na taong 2022 hanggang 2023, sa mga piling buwan ng Abril, Mayo, Setyembre at Oktubre sa katulad ding petsa at araw na binaggit na sa itaas.

Ayon sa Decadens ng Kapalaran, kung susundin n’yo ang mga rekomendasyong inilahad sa itaas, tiyak ang magaganap sa susunod na taong 2022 hanggang 2023, sa edad mong 30 pataas at 31 naman ang girlfriend mo, may malaking halagang maibubulsa, sapat upang matuloy ang simple ngunit masayang kasalan na hahantong sa pagbuo ng maunlad at maligayang pagpapamilya habambuhay.

Live-in partner na kapwa may strong number, makakatuluyan kung magpapaka-weak ang isa

ni Maestro Honorio Ong - @Kapalaran ayon sa Numero| July 05, 2021

Dear Maestro,

Malaki na ang dalawang anak ko, binata at dalaga na sila, ngunit hindi kami kasal ng kanilang ama at naghiwalay na kami, matagal na panahon ang nakakaraan. Sa ngayon ay may kinakasama ako na hiwalay din sa asawa dahil may iba nang lalaki ang misis niya. Gusto kong malaman kung ano ang magiging kapalaran namin habang kami ay nagsasama? September 17, 1970 ang birthday niya. Nais ko ring malaman kung kailan ako makakaahon sa mga problemang pampinansiyal? February 10, 1972 naman ang birthday ko.

Umaasa,

Glo ng Iba Oeste, Calumpit, Bulacan

Dear Glo,

Sa totoo lang, nagtataka rin ako kung bakit ang Aquarius na tulad mo at Virgo na tulad ng lalaking kinakasama mo minsan ay pinagtatagpo ng tadhana gayung sa katotohanan ay hindi naman sila talaga gaanong compatible sa isa’t isa. Posibleng ang dahilan ay hindi ang zodiac sign na inyong tinataglay kundi ang mga numerong bumabalot sa inyong pagkatao.

Sa kaso mo at ng iyong kinakasama, pansining kapwa strong number ang birth date mong 10 o 1 (ang 10 ay 1+0=1) at ang birth date na 17 o 8 (1+7=8) ng partner mo, kung saan ang basic rule sa Numerology — ang parehong strong number ay kusang naghihigupan ng lakas kaya hindi nila naiiwasang nagkakalapit talaga sila ng loob.

Sa madaling salita, kung mananatili o palaging may magpapaka-weak sa inyo, sa kabila ng kapwa strong number ang inyong mga birth date, siguradong magtatagal at magiging maligaya ang inyong relasyon.

Dagdag pa rito, kapag ang mag-asawang kapwa may strong number ay nagpasensiyahan talaga sa isa’t isa, palagi namang natatagpuan sa bandang huli na yumayaman, higit lalo sa panahong nagtatrabaho na sa abroad ang kanilang mga anak.

Ang eksaktong salita, nagtatrabaho na sa abroad ang kanilang mga anak o may kani-kanya nang negosyo, dahil karamihan sa mga mag-asawa na kapwa may strong number ay nagiging successful tulad ng nakapag-a-abroad ang mga anak. At dahil sa mga anak na nakapangibang-bansa o nakapagnegosyo, ang mga anak na ‘yun ang nagpapayaman at nagpapasagana ng kanilang kabuhayan.

Kaya sa pagbubuod ng pag-aanalisang ito, isa lang ang dapat tandaan ng mag-asawang kapwa nagtataglay ng strong number. Tandaang una, bago maging matagumpay at maligaya ang inyong samahan, babayuhin muna kayo ng maraming mga pagsubok, pero dahil pareho kayong may strong number, nand’yan ang pambababae ni mister o panlalaki ni misis.

Ngunit kapag nalampasan n’yo ang nasabing mga balakid o hindi kayo naghiwalay at nanatiling magkakapit-bisig at nagmamahalan at nagawa ng isa sa inyo ang magpaka-weak kahit strong ang numero niya, ibig sabihin ay walang masama kung medyo magpa-under sa asawa. Sa puntong ‘yun, unti-unting gigitaw ang maunlad, maligaya at masaganang pamumuhay, kasabay ng pagtatagumpay ng kanilang mga anak sa career at propesyon habambuhay.

Sa panahong ‘yun o sa taong 2025 at sa edad mong 53 pataas habang 55 naman si mister, tiyak ang magaganap — unti-unti ka nang makakaahon sa mga probelmang pampinansiyal hanggang sa tuluy-tuloy nang umunlad at yumaman ang inyong pamilya.

Bebot na naiwanan ng mga pinsan sa ‘pinas, makapag-a-abroad din

ni Maestro Honorio Ong - @Kapalaran ayon sa Numero| July 03, 2021

Dear Maestro,

Mula nang magkaroon ng pandemya at nawalan ako ng trabaho, lalong nagkahirap-hirap ang buhay namin. Kaya nais kong malaman kung sa edad kong 37, may pag-asa pa ba akong makarating sa ibang bansa at makapagtrabaho roon kahit na bilang katulong? ‘Yung dalawang pinsan ko ay nakaalis na at ako na lang ang natira dahil may kaunting problema sa papeles ko, pero sabi ng agency namin, makakaalis din ako.

Sa ngayon ay tinutulungan ako ng tiyahin ko para sa mga papeles at panggastos. Kausap ko na rin ‘yung isang pinsan ko na nasa abroad at nangako rin siyang tutulungan niya ako. October 10, 1985 ang birthday niya. Compatible ba kami at kapag nasa abroad na ako, tototohanin ba niya ang kanyang pangako na tutulungan ako roon? Isinilang ako noong April 13, 1984.

Umaasa,

Ms. Aries ng Bagbag, Novaliches, Quezon City

Dear Ms. Aries,

Madalas, sa hindi inaasahang pagkakataon, ang mga kaibigan natin ang siyang nagiging blessing sa ating buhay at minsan naman, sila rin ang hindi sinasadyang nagpapahamak sa atin.

Ganu’n talaga ang buhay dahil kadalasan, hindi mo naman mapipili ang kaibigan, kumbaga sa kamag-anak, kusa rin silang dumarating sa ating karanasan. Ang kaibahan lamang ng kaibigan sa kamag-anak, ‘yung kaibigan ay puwede mong iwasan at hindi mo na siya gawing kaibigan, pero ang kamag-anak, kahit anong iwas ay mananatiling kadugo at kamag-anak habambuhay.

Samantala, nakatutuwang isiping compatible ang birth date mong 13 o 4 (1+3=4) sa birthday ng pinsan mo na 10 o 1 (ang 10 ay 1+0=1) kung saan, kadalasan ang mga numerong uno (1, 10, 19, at 28) na tulad niya ay siyang nakatutulong sa mga numerong kuwatro (4, 13, 22 at 31) tulad mo. Kaya siyento-porsyento, bibigyan ka niya ng suwerte at sa kabilang banda, suwerte rin siya sa iyo. ‘Ika nga sa wikang English, “vice-versa” ang inyong kapalaran – bigayan ng suwerte at bawasan ng kamalasan.

Hindi lang ang numerong uno (1) at kuwatro (4) ang magkatugma. Sa halip, ang zodiac sign mong Aries ay angkop din sa zodiac sign na Libra ng iyong pinsan, sapagkat ang Aries at Libra ay “complementary compatible” sa isa’t isa. Ibig sabihin, ang mga bagay na nawawala sa iyo ay maibibigay niya habang ang mga bagay na hinahanap niya ay sa iyo naman niya matatagpuan. Gayundin, ikaw ang huhusto sa kanya sa mga bagay na wala siya at siya rin naman ang huhusto sa iyo sa mga bagay wala ka.

Kaya ngayon pa lang, magsaya ka at buuin mo na ang iyong loob na makakaalis at makapag-a-abroad ka. Ayon sa iyong Travel Calendar, basta magtiwala ka lang sa iyong pinsan, hindi ka niya pababayaan, tiyak na ang magaganap — sa huling hati ng taong ito, sa buwan ng Oktubre hanggang Disyembre, matutupad na ang iyong pangarap. Sa tulong ng iyong kaibigan, makapag-a-abroad ka hanggang sa tuluy-tuloy nang umunlad ang iyong career at kabuhayan.