70M target na fully vaxxed Pinoy, nakamit ng gobyerno — NTF

ni Lolet Abania | June 19, 2022

Nakamit ng gobyerno ang kanilang target na 70 milyong Pilipino na mabakunahan kontra COVID-19, dalawang linggo bago bumaba sa puwesto si Pangulong Rodrigo Duterte, ayon sa National Task Force (NTF) Against COVID-19.

Hanggang noong Hunyo 17, nasa kabuuang 70,005,247 indibidwal ang fully vaccinated o 77.8% ng target population, base sa latest report ng National Vaccination Operations Center (NVOC).

Ayon kay NTF chief implementer Carlito Galvez Jr., ang pinakabagong record na ito ay isang patunay sa naging pangako o commitment ng gobyerno na mabakunahan ang mas marami pang mga Pilipino laban sa viral disease.

“This is our parting gift to the next administration. We hope that our new leaders will also prioritize our vaccination program and continue to build an immunity wall among our people,” ani Galvez sa isang statement.

Nasa kabuuang 153,013,072 COVID-19 vaccine doses na ang na-administer ng gobyerno, na mayroong 74,813,407 indibidwal na nakatanggap ng first dose hanggang nitong Hunyo 17.

Una nang sinabi ng pamahalaan na target nilang makapagbakuna ng tinatayang 77 milyong indibidwal, o 85% ng eligible population sa pagtatapos ng Hunyo, bago ang termino ni Pangulo Duterte na magtapos sa Hunyo 30.

Giit ni Galvez ang pagkakaroon ng mataas na vaccination rate at patuloy na pagsunod sa minimum health protocols ay maaaring makaiwas sa isa pang surge ng COVID-19 cases.

“We have had many superspreader events in the past months, including the national elections, but we still managed to keep our new COVID-19 cases low because of our high vaccination rate,” sabi ni Galvez, na siya ring vaccine czar ng bansa.

“But vaccination alone is not enough. We still have to follow our public health protocols, including frequent washing of hands and wearing of best fitted face masks,” dagdag ni Galvez.

Nai-report din ng NVOC na mayroon nang 14,704,514 indibidwal na nabigyan ng kanilang unang booster shots, habang nasa 648,555 ang nakatanggap ng ikalawang booster dose.

Para sa pediatric vaccination, may kabuuang 3,217,367 kabataan edad 5 hanggang 11 ang mga fully vaccinated na, habang may kabuuang 9,487,745 minors naman na edad 12 hanggang 17 ang natanggap na rin ang kanilang full doses.

Muling hinimok ni Galvez ang publiko na tanggapin na ang kanilang booster shots upang madagdagan ang proteksyon na naibibigay ng primary doses.

“Napakahalaga pong makakuha ng booster shot para mapalakas ang proteksyon na dulot ng bakuna. Para sa mga pwede na ring kumuha ng second booster shot, magpabakuna na agad,” saad pa ni Galvez.

Matatandaang unang inilunsad ng Pilipinas ang COVID-19 vaccination program noong Marso 2021.

NTF: 3M COVID-19 vaccines, donasyon ng 'Pinas sa kalapit-bansa

ni Lolet Abania | May 13, 2022

Inihahanda na ng pamahalaan ang tinatayang 3 milyong COVID-19 vaccines na donasyon ng Pilipinas sa kalapit na mga bansa, ayon sa National Task Force (NTF) Against COVID-19.

Sinabi ni NTF special adviser Ted Herbosa na una nang ipinaalam sa kanya na ang Sputnik V vaccines ay ido-donate sa mga bansa sa Association of Southeast Asian Nations.

“I think Laos Cambodia, Myanmar ang mga target countries to receive it kasi kulang sila ng vaccine. Myanmar, I think, specifically for Sputnik,” ani Herbosa sa Laging Handa briefing ngayong Biyernes.

“And then may na-mention din na African countries that want them. So ‘yun ang current situation. I’m sure kung meron pang pwedeng i-donate, ido-donate natin,” dagdag ng opisyal.

Matatandaan noong Abril, binanggit ni Department of Health (DOH) Undersecretary Maria Rosario Vergeire na ang gobyerno ay nakikipag-ugnayan na sa Myanmar at Papua New Guinea para i-finalize ang gagawing donasyon.

Samantala, ayon kay Herbosa nasa tinatayang 1 milyon doses ng AstraZeneca vaccine na donasyon ng COVAX facility ang nag-expired mula sa iba’t ibang rehiyon.

“Pero ito ay pinangako ng COVAX na papalitan nila. So, hinihintay lang natin ‘yung replacement noon because there were donations naman,” sabi ni Herbosa.

“Naka-distribute ‘yan sa iba’t ibang region na, 'no. So, ang shelf life naman nila, after dumating sila from donation by COVAX, dini-distribute ‘yan from our national warehouse to the different regions,” dagdag pa niya.

50K doses ng Sputnik COVID-19 vaccine, na-postpone

ni Lolet Abania | June 23, 2021

Darating ang tinatayang 50,000 doses ng Sputnik V COVID-19 vaccine na nakatakdang i-deliver sa Pilipinas sa susunod pang mga araw, ayon kay Vaccine Czar Carlito Galvez, Jr.. Ipinaalam ng Russian Direct Investment Fund (RDIF) sa National Task Force Against COVID-19 vaccine cluster noong June 20 na ang pagdating ng vaccine doses ay ipinagpaliban, ani Galvez, “due to ongoing upgrades and latest developments on the vaccine.”

“RDIF has committed to update the Philippine Government on the definite date of delivery of the vaccines,” sabi pa ni Galvez.

Ang 50,000 shots ay nakalaan para sa second dose ng mga indibidwal na naunang nabakunahan nito lamang buwan ng Component I vaccines ng naturang brand. “We have already informed all local government units who have administered the first dose of Sputnik V to their constituents that the schedule for the second shot will likewise be pushed back and will be rescheduled,” saad ni Galvez.

Tiniyak naman ni Galvez sa publiko na ang nangyaring “unforeseen delay” sa pagdating ng mga bakuna ay hindi magkakaroon ng anumang kompromiso sa efficacy ng vaccines.

“We seek your kind understanding that this development is beyond the control of the Philippine government. The manufacturer is seeking more ways to improve and upgrade the vaccine that would be more beneficial and would be more effective in battling the emergence of new variants,” sabi ni Galvez. Sa ngayon, nakatanggap na ang Pilipinas ng 180,000 doses ng Sputnik V vaccine.