Babaeng miyembro ng NPA, arestado

ni Lolet Abania | January 15, 2021

Isang hinihinalang miyembro ng New People's Army (NPA) ang nadakip ng tropa ng militar at kapulisan sa Talisay City, Negros Occidental kahapon.

Sa nakalap na impormasyon mula sa Philippine Army's 3rd Infantry Division, nakilala ang suspek na si Ruffa "Reniel" Baynosa, residente ng Barangay San Jose, Toboso.

Sa isinagawang operasyon ng 79th Infantry Battalion at ng Talisay police, napag-alaman nilang si Baynosa ay nagtungo sa bahay ng isang Marilyn Dianton.

Agad na pinuntahan ng awtoridad si Baynosa at kinuwestiyon. Ayon sa awtoridad, si Baynosa ay may warrant of arrest sa kasong murder at frustrated murder na inisyu ni Presiding Judge Ma. Rita Bascos Sarabia ng Regional Trial Court Branch 58 ng San Carlos City.

Sinasabing si Baynosa ay sangkot umano sa nangyaring ambush sa mga sibilyan sa Barangay Salamanca sa Toboso noong July 2009, kung saan tatlong civilians ang namatay at tatlong iba pa ang nasaktan.

Pinasalamatan naman ni Lt. Col. Gerard Alvaran, commanding officer ng 79IB, ang ginawang pagsisikap ng tropa ng militar at mga kawani ng Talisay City Police Station para madakip si Baynosa.

Grupo ng NPA, patay matapos pasabugin ang kampo sa araw ng Kapaskuhan

ni Thea Janica Teh | December 26, 2020

Patay ang isang grupo ng New People’s Army (NPA) nitong Kapaskuhan matapos matamaan ang kanilang kampo sa Daguma Mountain Range sa Sultan Kudarat ng GPS-guided smart bomb na hinulog ng Philippine Air Force FA-50 jet.

Ayon kay Major General Juvymax Uy, commander ng Joint-Task Force Central’s 6th Army Division, mayroon umanong nagsumbong na mga residente at local officials sa militar na may movement ang mga NPA sa kanilang lugar at nagpaplanong ipagdiwang ang Communist Party ng ika-52 anibersaryo ngayong Disyembre 26.

Agad itong inaksiyunan ng militar at natagpuan ang base camp ng NPA sa Sitio Kalumutan sa boundary ng Palimbang, Lebak, Kalamansig at parte ng bayan ni Senator Ninoy Aquino.

Nakuha sa kampo ang 3 labi ng hindi pa nakikilalang miyembro ng NPA, 100 bandolier bags, improvised explosive device components, laptop, generators, sirang mga baril at mga dokumento.

Dagdag pa ni Uy, ito umano ang kauna-unahang beses na nakakita ang militar ng Far South Regional Committee base camp matapos ang ilang taong operasyon sa Daguma Range.

‘Most wanted’ na opisyal ng NPA, arestado sa Pampanga

ni Ronalyn Seminiano Reonico | December 6, 2020

Inaresto sa Mexico, Pampanga ang hinihinalang high-ranking member ng New People’s Army (NPA) sa Central Luzon, ayon sa Philippine Army's Northern Luzon Command (NolCom).

Biyernes nang umaga nang maaresto ang suspek na kinilalang si Jose Bernardino a.k.a. Oying na hinihinalang NPA secretary ng Central Luzon’s Regional White Area Committee sa isinagawang joint operations ng Armed Forces of the Philippines (AFP) at Philippine National Police (PNP) sa Pampanga.

Pahayag ni PBGEN Valeriano De Leon, Police Regional Office 3 director, “Matagal din ito na minanmanan at nakakuha nga tayo ng impormante at saka nakakuha rin tayo ng pagkakakilanlan sa kanya at mga activities niya at mga kasamahan niya na ngayon ay nanunungkulan na sa gobyerno.”

Kasama umano si Bernardino sa most wanted list ng Department of National Defense (DND) at Department of the Interior and Local Government (DILG). Pahayag ni Commander of the Army’s 7th Infantry Division Maj. Gen. Alfredo Rosario, “[He] is at the forefront of extortion, labor organizing and youth recruitment in Region 3’s urban areas.”

Narekober naman ng awtoridad ang Cal. 45 pistol, hand grenade, NPA flag atbp. dokumento sa suspek. Haharap din si Bernardino sa kasong illegal possession of firearms and explosives. Samantala, dahil sa pagkakaaresto kay Bernardino, tatanggap ng P4.7 million pabuya ang informant ng awtoridad.