123 positive sa Covid dahil sa concert sa simbahan

ni Lolet Abania | June 12, 2021

Itinuturong dahilan ng pagtaas ng kaso ng COVID-19 sa lalawigan ng Northern Samar ang naganap kamakailan na konsiyerto sa simbahan sa isa sa mga munisipalidad nito, ayon sa gobernador ng probinsiya.

Sa Laging Handa briefing ngayong Sabado, ayon kay Northern Samar Governor Edwin Ongchuan, nakapagtala ang lalawigan ng pagtaas ng COVID-19 cases noong June 10 na may 123 active cases sa loob lamang ng isang araw sa munisipalidad ng Victoria, kung saan umabot sa kabuuang 218 ang mga aktibong kaso.

Agad isinailalim ang mga bayan sa granular lockdowns, kabilang ang kabisera ng lalawigan na Catarman. Ayon kay Ongchuan, batay sa isinasagawang contact tracing, lumalabas na ang pagtaas ng kaso ng COVID-19 ay dahil sa isang church concert kamakailan.

“May iba pong mga kababayan natin mula sa ibang bayan, dito po nagsipunta sa Victoria at sa kasamaang palad, may naitala pong dalawang nasawi sa COVID,” ani Ongchuan.

Gayunman, inatasan na ni Ongchuan ang mga mayors ng buong lalawigan na ipatigil ang pagsasagawa ng mga mass gatherings, partikular na ang church gatherings.

Pulis, patay sa panabong na manok

ni Thea Janica Teh | October 28, 2020

Patay ang isang pulis sa Northern Samar matapos i-raid nitong Lunes ang isang ilegal na sabungan at matamaan ng blade ng manok ang kanyang femoral artery o pinakamalaking ugat sa hita.

Kinilala ang pulis na si Lieutenant Christian Bolok. Ayon kay Provincial Police Chief Colonel Arnel Apud, kumukuha umano ito ng mga panabong na manok bilang ebidensiya nang tamaan ang kanyang kaliwang hita ng blade.

Aniya, "I could not believe it when it was first reported to me. This is the first time in my 25 years as a policeman that I lost a man due to a fighting cock's spur."

Tatlong katao ang inaresto at nakuha sa pinangyarihan ng insidente ang dalawa pang panabong na manok. Ipinagbabawal ang sabong at iba pang cultural events sa panahon ng pandemya upang maiwasan ang pagkalat ng COVID-19.