NFA tiniyak na may sapat na suplay ng bigas para sa mga nasalanta ng bagyong Odette

ni Jasmin Joy Evangelista | December 23, 2021

Tiniyak ng National Food Authority na may sapat na suplay ng bigas para sa mga biktima ng Bagyong Odette.

Ayon kay NFA Administrator Atty. Judy Carol Dansal, gagamitin nila ang stocks mula sa ibang mga warehouse na hindi naapektuhan ng bagyo.

Nasira 'yun [bigas sa Taytay, Palawan warehouse] pero may supply na manggagaling sa Narra at sa bodega namin sa Puerto Princesa [Palawan],” pahayag ni Dansal.

Bukod sa Taytay at Palawan, mayroon din daw mga stock ng bigas sa NFA warehouses sa Negros Occidental, Cebu, at Iloilo na nasira dahil sa bagyong Odette.

Sinabi rin ni Dansal na hindi dapat mangamba ang mga apektadong residente hinggil sa suplay ng bigas dahil nakapag-pre-position na ng stocks ang NFA bago pa man manalanta ang bagyo.

“Hindi dapat matakot ang ating mga kababayan doon sa mga areas sa Southern Leyte, sa Region 6, Region 7, at saka sa Palawan, meron po kaming naka-preposition,” aniya.

Sinabi ng National Disaster Risk Reduction and Management Council (NDRRMC)nitong Martes na nasa 1,113,373 katao o 304,837 pamilya ang apektado ng bagyong Odette.

Bulok na bigas sa relief goods sa Catanduanes, inireklamo

ni Thea Janica Teh | November 17, 2020

Inulan ng reklamo ang Barangay Igang sa Catanduanes matapos makatanggap ang mga residente ng relief goods na puno ng bulok na bigas.

Ayon kay Igang Barangay Chairman Ronnie Clemente, noong ipinamimigay nila ang sako-sakong bigas, may bumalik na mga residente at ipinakita ang mga natanggap na relief goods.

Nakitang may amag na ang bigas, maitim na at mabaho kaya hindi na puwedeng kainin. Inipon umano ni Clemente ang lahat ng bigas at halos 40 plastic ang ibinalik sa kanila.

Agad namang itinanggi ni Virac Mayor Sinforoso Sarmiento na sa kanila galing ang bulok na bigas. Aniya, “Hindi po galing sa amin iyon kasi ang ipinamimigay namin ay puti ang balot hindi yellow. Tapos wala po kaming old stock, nawawalan nga kami ng stock eh… Sa amin po yung mga nagpa-pack, inaano namin na mag-check ng quality.”

Samantala, sinabi naman ng National Food Authority sa Catanduanes na mayroon umano itong ilang toneladang bigas na ipamimigay sana sa mga nasalanta ng bagyo ngunit nabasa ng ulan. Sa ngayon ay iimbestigahan na ng mga lokal na awtoridad ang nangyaring insidente.