Imee, inalok mag-Senate president

ni Mylene Alfonso @News | May 24, 2025

File Photo: Sen. Imee Marcos - FB

Ibinuking ni reelected Senator Imee Marcos na kinausap siya ng ilang kasamahang senador para kumbinsihin na sumabak sa Senate presidency sa darating na 20th Congress sa Hulyo.

"Some senators have approached me with the proposal to be their candidate for Senate president," sabi ni Imee sa isang pahayag ngunit hindi siya nagbigay ng anumang detalye tungkol sa kanyang tugon sa nasabing kahilingan.

"Whoever will be elected by our peers, whether it is me or not, there are certain congressional reforms that need to be undertaken," ayon sa senadora.

Kaugnay nito, binigyang-diin ni Marcos na kinakailangan nang repormahin ang proseso ng badyet, partikular ang mga tradisyon noong bicameral conference committee sa annual national spending plan bill.

"The most important is reform in the budgetary process. Tigilan na ang mahiwagang bicam. The right priorities in spending, considering our recurring fiscal deficits and huge indebtedness, must be legislated: food security and support to our farmers and fishermen; education; health and truly necessary social services," punto ng Presidential sister.

Tinutulan din niya ang naging pahayag ng Department of Budget and Management (DBM) na uupo sa budgetary process ang kanyang kapatid na si Pangulong Ferdinand Marcos, Jr., bilang observer na labag sa konstitusyon.

"Parenthetically, once the OP (Office of the President) has submitted the NEP (National Expenditure Program) to Congress, the power of the purse must be respected. The DBM statement that the president will involve himself in the budgetary process after the NEP is submitted is infirm and unconstitutional," giit pa nito.

Kailangan na rin aniya ang electoral reform sa bansa kabilang ang reporma sa political party na aniya ay naging kasangkapan lamang para sa personal na ambisyon kaysa sa pampublikong interes.

"Above all, the Senate as the guardian of national interest must always be upheld; its independence non-negotiable," patuloy pa niya.

Bukod kay Imee, ang iba pang senador ng 20th Congress na umano’y nag-aagawan para sa pinakamataas na pwesto ng Senado ay sina Senate President Francis 'Chiz' Escudero at Senator-elect Vicente 'Tito' Sotto III.

Ipinadidiin ako at si ex-PDu30 — Bato... EX-PNP OFFICIALS, TINATAKOT NG ICC

ni Mylene Alfonso @News | May 24, 2025

File Photo: Ronald Bato Dela Rosa - FB

Nais paimbestigahan ni reelected Senator Ronald 'Bato' dela Rosa ang sinasabing pananakot ng mga imbestigador mula sa International Criminal Court (ICC) sa mga retiradong pulis sa pagbubukas ng 20th Congress sa Hulyo. 

Ibinunyag ni Dela Rosa na may nangyayaring misyon ang ICC sa isang hotel sa Pasay City kung saan pinipilit nila ang mga retiradong opisyal ng Philippine National Police (PNP) na pumirma sa affidavit na magbibitbit sa kanya at kay dating Pangulong Rodrigo Duterte

“Magka-conduct kami ng hearing at ‘yung mga tao na involved d'yan, ‘yung mga Pilipino na mga taksil sa ating soberanya ay mananagot ‘yan,” ani Dela Rosa. 

Ginawa ni Dela Rosa ang pagsisiwalat makaraang tanungin kaugnay sa sinabi ni Pangulong Ferdinand Marcos, Jr. na bukas siya sa pakikipagkasundo sa pamilya Duterte.

“Kung sinsero talaga siya sa kanyang sinasabi, ang unang-una niyang gawin is palayasin niya ‘yung mga ICC investigators na 'andiyan ngayon sa mga hotel d'yan sa Pasay na nananakot sa mga retired na mga pulis na pinipilit nila mag-sign ng affidavit na ididiin na kami ni Pangulong Duterte, otherwise, sila daw ang ididiin, ‘yung mga pulis na pinagtatawag nila,” patuloy ni Dela Rosa.

Bunsod nito, kinondena ng senador ang pananakot sa mga retiradong pulis. 

Puro pulitika, walang serbisyo... Marcos: Pinoy, dismayado sa gobyerno

ni BRT @News | May 20, 2025

File Photo: Bongbong Marcos podcast with Anthony Taberna - FB

Dalawa ang nakikitang rason ni Pangulong Ferdinand Marcos, Jr. kung bakit anim lang sa senatorial admin slate ang nanalo sa katatapos na 2025 midterm election.

Una, dahil umano sa nagsawa na ang mga Pilipino sa pulitika, at ang pangalawa ay disappointed ang mga tao sa serbisyo ng gobyerno.

Hindi umano nararamdaman ng publiko at masyadong mabagal ang galaw ng pagbuo ng mga proyekto.

“Ang mensahe sa aming lahat, hindi lamang sa akin, kung hindi sa aming lahat: 'Tama na ang pamumulitika n'yo at kami naman ang asikasuhin ninyo'," paliwanag ng Pangulo.

Aminado rin si PBBM na meron siyang pagkukulang. “Hindi natin nabigyan ng sapat na atensyon 'yung mas maliliit na bagay, 'yung para maging mas maginhawa ang pang-araw-araw na buhay ng tao”.