Alice Guo, habambuhay na kulong sa qualified trafficking

by Info @ News | November 20, 2025

Photo File: Office of the Senate

Sinentensiyahan ng habambuhay na pagkakakulong o reclusion perpetua si dating Bamban Mayor Alice Guo o Guo Hua Ping.

Kasunod ito ng paghahatol ng Pasig Regional Trial Court (RTC) Branch 167 kay Guo na guilty sa qualified human trafficking.

Convicted din sa parehong kaso sina Rachelle Malonzo Carreon, Jaimielyn Cruz, at Walter Wong Rong at pinatawan sila kabilang si Guo ng P2 milyong multa.

Ang kaso ay konektado sa pagsalakay sa isang Philippine Offshore Gaming Operator (POGO) hub sa bayan ni Guo noong Hunyo 2024, kung saan mahigit 800 Pilipino at dayuhan ang nailigtas.

Pagkamatay ni Gina Lima, ‘di dahil sa pambubugbog; ex-bf natagpuang patay — QCPD

by Info @ News | November 19, 2025

Photo File: Gina Lima at Ivan Ronquillo - FB

Batay sa resulta ng autopsy, hindi namatay ang freelance model na si Gina Lima dahil sa pambubugbog, ayon sa Quezon City Police District (QCPD).

Sinabi ni QCPD spokesperson Police Major Jennifer Gannaban na natuklasan sa autopsy ang "non-fatal external injuries." Bukod sa mga ito, nakita rin sa resulta ang paninikip ng puso at paninikip ng baga ni Lima.

“According po rito sa medico-legal certification, ang findings po ng autopsy is presence of non-fatal external injuries, presence of heart congestion and congested lungs. 'Yun po 'yung nakalagay,” ani Gannaban.

Binanggit din nito na hinihintay pa ang resulta ng toxicology at histopathology test para malaman ang tunay na sanhi ng pagkamatay.

Samantala, natagpuan namang patay ang ex-boyfriend ni Lima na si Ivan Ronquillo ngayong Miyerkules, Nobyembre 19, sa parehong condominium kung saan nasawi si Lima.

Ayon sa QCPD, isinugod pa ito sa Quezon City General Hospital ngunit idineklara itong dead-on-arrival alas-7 ng umaga.

Pahayag nina Sen. Imee, Rep. Pulong, halatang planado, scripted — Castro

by Info @News | November 19, 2025

Photo File: Claire Csstro, Imee Marcos at Pulong Duterte

Sinabi ni Palace Press Officer at Presidential Communications Office (PCO) Usec. Claire Castro na halatang planado at scripted ang mga pahayag nina Sen. Imee Marcos at Cong. Paolo ‘Pulong’ Duterte laban kay Pangulong Ferdinand Marcos at sa First Family.

“Ano bang tinutumbok ni Senator Imee rito? Halata namang planado, halata namang scripted, tingnan n’yo ‘yung papel niya gaano kakapal, binasa niya pa,” ayon kay Castro.

Dagdag pa niya, “Ibig sabihin, coordinated ang moves nila — desperado para masira ang Pangulo.”

“Anong magagawa ng paninira sa Pangulo? Ang Pangulo na nagpapaimbestiga ng korupsiyon, nagpapaimbestiga ng maaaring sangkot sa korupsiyon, gusto niyang patigilin? At gusto niyang pauwiin ang Pangulo, saan? Mawala sa pwesto? Sino ipapapalit niya? Si VP Sara?” saad pa nito.

Binigyang-diin din niya na si Vice President Sara Duterte ay isa umanong anak ng korap na umamin mismong nagnakaw sa bayan at sangkot sa mga isyu sa korupsiyon na hanggang ngayon ay hindi pa rin umano nareresolba.

“‘Yun ba ang gusto nating ipalit ngayon sa Pangulo?” tanong pa nito.