Medical exams para FPRRD, ipinag-utos ng ICC

by Info @News | October 18, 2025

Photo: FPRRD sa ICC

Ipinag-utos ng International Criminal Court (ICC) Pre-Trial Chamber I na sumailalim sa medical examination si dating Pangulong Rodrigo Duterte upang matukoy kung ito ay “fit to stand trial” o nasa maayos na kalusugan para humarap sa mga paglilitis.

Inatasan ng Chamber ang Registry na magsagawa ng medikal na pagsusuri at isumite ang buong rekord ng dating Pangulo sa panel ng tatlong independent medical experts — isang forensic psychiatrist, neuropsychologist, at geriatric and behavioral neurologist.

Susuriin ng mga ito si Duterte kung dumaranas ito ng anumang kondisyong medikal na maaaring makaapekto sa kanyang paglahok sa nagpapatuloy na pre-trial phase at ang pagkumpirma ng mga kaso.

Inaasahan din silang magrekomenda ng anumang mga espesyal na hakbang na kailangan upang mapaunlakan ang kanyang posibleng kondisyon sa panahon ng paglilitis bilang bahagi ng "fair trial rights" para sa dating pinuno ng Pilipinas.

Itinakda naman ang paghahain ng joint o individual record sa Registry bago ang Oktubre 31.

Romualdez, ‘di kinukonsidera bilang state witness —DOJ

by Info @News | October 18, 2025

Photo: Martin Romualdez - DOJ

Mariing itinanggi ng Department of Justice (DOJ) na kinukonsidera nila si dating House Speaker at Leyte 1st District Rep. Martin Romualdez para maging state witness sa imbestigasyon sa flood control projects anomalies.

Giit ng DOJ, walang kahit anong makatotohanan o legal na basehan ang anila'y "misinformation" na ito.

Nilinaw din nila na hindi pa umano nag-a-apply si Romualdez upang maging state witness.

Binalaan din ng DOJ ang publiko laban sa mali, mapanlinlang na mga katotohanan o pampulitika na propaganda na binabaluktot o maling ginagamit ang mga legal na termino upang lituhin ang publiko.

‘People power na, tama na, sobra na’ — Roque

by Info @News | October 13, 2025

File Photo: Harry Roque / FB

Hinikayat ni dating Presidential spokesperson Atty. Harry Roque ang publiko na makiisa sa mga malawakang protesta at panawagan kontra-korupsiyon.

Naniniwala si Roque na people power ang natatanging solusyon sa tindi ng katiwalian sa pamahalaan.

Dagdag pa nito, walang mangyayari sa bansa kung hindi magsasalita at lalaban ang taumbayan kontra-korupsiyon sa ilalim ng pamumuno ni Pangulong Ferdinand “Bongbong” Marcos Jr.

Kaugnay nito, binigyang-diin din ni Roque na tama lamang na magalit ang publiko at nararapat na ganapin ang rally sa harap mismo ng bahay ng mga korup.