Bicol Airport, binulabog ng bomb threat

ni Mai Ancheta @News | October 3, 2023

Naantala ang biyahe ng mga eroplano sa Daraga Albay nitong Lunes ng umaga dahil sa bomb threat.

Ayon sa Civil Aviation Authority of the Philippines (CAAP), naganap ang insidente alas-10:45 ng umaga makaraang mayroong mag-iwan ng papel sa comfort room ng Cebu Pacific Airlines flight 5J326 na nagsasabing mayroong bomba sa eroplano habang nasa runway na.

Agad na isinara ang runway at ibinalik sa arrival area ang mga pasahero at ginawa ang pag-inspeksyon sa mga bagahe at hand-carry ng mga pasahero.

Dahil dito, naantala ang paglapag ng limang eroplano at pag-alis ng limang iba pang flights.

Naibalik ang operasyon ng paliparan pasado alas-2 ng hapon matapos walang makitang bomba ang mga awtoridad.

Kasama sa mga nag-inspeksyon bukod sa CAAP personnel ay ang mga tauhan ng Philippine National Police Aviation Security Group.

Bitay, ibabalik kontra droga

ni Madel Moratillo @News | October 3, 2023

Muling binuhay ni Surigao del Norte 2nd District Rep. Robert Ace Barbers ang panawagan sa pagbabalik ng death penalty sa bansa.

Kasunod ito ng pagkakadiskubre sa bilyun-bilyong pisong halaga ng shabu na nasabat sa Subic, Zambales. Ang shipment ay mayroon umanong Thai markings na may mga kasamang chicharon at dog food.

Sa panayam sa telebisyon, sinabi ni Barbers na isinusulong niya ang pagbuhay sa death penalty sa drug cases mula pa noong 11th Congress. Pero aminado ang mambabatas na

isang paraan lang ang death penalty dahil ang dapat ay magkaroon aniya ng reporma sa law enforcers unit.

Ang death penalty ay una nang na-abolish noong 2006

Mga guro, may P1K bonus sa Teacher's Day

ni Madel Moratillo @News | October 3, 2023

May P900 milyong pondo ang nakapaloob sa 2023 General Appropriations Law para sa World Teachers’ Day Incentive Benefit ng mga guro ngayong taon.

Ayon kay Quezon City 4th District Rep. Marvin Rillo, dapat tumanggap ng P1,000 insentibo ang may 900K public school teachers.

Ayon kay Rillo, para sa 2024 may P912 milyon namang inilaan ang gobyerno.

Ang World Teachers’ Day ay isang international day na idineklara ng United Nations Educational, Scientific and Cultural Organization (UNESCO) at ipinagdiriwang ito tuwing Oktubre 5.

Ito ay pagkilala sa mga guro at kanilang mahalagang papel sa development ng mga bata.

Kasabay nito, isinulong ni Rillo ang pagpasa ng panukala na layong itaas ng 36 percent ang starting pay ng public school teachers.

Sa ilalim nito ay tataas sa P36,619 (Salary Grade 15) ang entry-level monthly pay ng public school teachers mula sa kasalukuyang P27,000 (Salary Grade 11).

Nakasaad din sa panukala ang gawing fix sa P16,000 ang minimum monthly pay ng lahat ng non-teaching personnel ng DepEd.