Bangka, nabangga ng foreign vessel.. 3 Pinoy, patay sa WPS

ni Mylene Alfonso @News | October 5, 2023

Patay ang tatlong mangingisdang Pilipino makaraang mabangga ng isang dayuhang commercial vessel ang sinasakyan nilang fishing boat noong Lunes ng madaling-araw sa Scarborough Shoal o Bajo de Masinloc.

Batay sa ulat ng Philippine Coast Guard (PCG), alas-4:20 ng madaling-araw noong Lunes nang mangyari ang insidente.

Nabatid na nakadaong ang bangkang FFB Dearyn, sa layong 85 nautical miles northwest ng Scarborough Shoal nang bigla na lang itong banggain ng isang barko, na nagresulta sa paglubog nito.

Tatlo umano ang kumpirmadong namatay na sina Dexter Laundensia, 40-anyos, boat captain; Romeo Mejico, 38, at Benedick Uladandria, 62, pawang mga residente ng Bgy. Calapandayan sa Subic, Zambales na dinala na sa Bgy. Cato, sa Infanta, Pangasinan.

Nagawa umano ng mga survivor na makaalis sa lugar, gamit ang walong service boats.

Sinabi ni PCG spokesperson Rear Admiral Armand Balilo na maaaring natutulog ang mga mangingisda nang mangyari ang insidente kaya hindi nila nakita ang barko.

Nagsasagawa na umano ng imbestigasyon ang PCG para matukoy ang uri at laki ng barkong bumangga sa fishing boat ng mga mangingisda, gayundin kung saang bansa ito nagmula.

Tiniyak ni Balilo na magbibigay ng tulong ang PCG sa pamilya ng mga biktimang namatay.

Nagsuka, nagdugo ang utak.. Grade 5, maingay, sinampal ni titser, patay

ni Benjamin Chavez / Levi Gonzales @News | October 4, 2023

Nagsuka at sumakit ang ulo at mata ng estudyanteng sinampal umano ng kanyang guro sa Antipolo at namatay ilang araw matapos ang insidente.

Sa pahayag ni Elena Minggoy, ina ng Grade 5 student na si Francis Jay Gumikib, nagsumbong sa kanya ang anak matapos ang umano'y pananampal ng guro sa Peñafrancia Elementary School.

Ayon sa ulat, nasampal ang 14-anyos dahil umano sa pag-iingay pero ayon sa ina, "hindi naman siya kasama sa maingay kasi nagte-test siya, nagsumbong lang po siya". "Noong binalikan siya ni teacher, hinatak siya sa kuwelyo ng uniform tapos sinabunutan po.

Pagkatapos ng sabunot, sinampal po siya," dagdag ng ginang.

“Tapos nagkuwento 'yung anak ko noong sinampal siya, 'Ma, para akong nabingi sa sampal ma. Sabi ng anak ko, 'Ang sakit ng tainga ko, Ma.'"

Nang tanungin kung malakas ang umano'y pagsampal ng guro, sabi ni Minggoy, "Hindi po magsusumbong nang paulit-ulit kung hindi malakas 'yon." Isang beses lang umanong sinampal ang kanyang anak.

Nakapasok pa umano ng 3 araw ang bata pero, pag-uwi nito mula sa paaralan noong Martes, Setyembre 26, bigla na lang umano itong nagsuka, nahilo at nakaramdam ng pananakit ng ulo.

Dinala sa Amang Rodriguez Medical Center ang biktima at na-comatose ito hanggang sa binawian ng buhay.

Ayon sa doktor, may nangyaring pagdurugo sa utak ng bata.

Samantala, nakipag-ugnayan na umano sa pamilya ang Department of Education matapos ang umano'y pananampal ng guro.

Bumuo na ng fact-finding investigation team ang Department of Education- Antipolo, para alamin ang pangyayari.

Depensa naman teacher sa mga pulis, hindi niya sinampal ang bata kundi tinapik lang ang pisngi.

DA, DTI at DILG, nakabantay.. Presyo ng bigas, 'di na tataas

ni Mylene Alfonso @News | October 4, 2023

Inanunsyo ng mga opisyal ng Department of Agriculture (DA) na tumaas ang produksyon ng bigas kung saan nakakuha ang bansa ng 52 araw na suplay ng bigas sa pagtatapos ng Setyembre.

Ito ang iniharap ni DA Undersecretary Mercedita Sombilla kay Pangulong Ferdinand Marcos, Jr. sa isang sectoral meeting sa Malacañang para talakayin ang mga indikasyon na magiging batayan sa pagtataas ng price ceiling sa bigas na ipinataw sa ilalim ng Executive Order (EO) No. 39.

Sa kanilang presentasyon, tinukoy ng DA ang mga indikasyon na maghuhudyat ng pagtaas ng price cap, katulad ng pagbaba ng presyo ng bigas sa domestic market, pagtaas ng supply ng bigas at mga paborableng panlabas na salik tulad ng pagbaba ng presyo ng bigas sa buong mundo, at iba pa.

Sa press briefing ng Palasyo, sinabi ni DA-Bureau of Plant Industry (BPI) Director Gerald Glenn Panganiban na natugunan na ang lahat ng mga parameter kabilang na ang masaganang suplay at ang pagbaba ng presyo gayundin ang pagbaba ng presyo ng bigas sa mundo.

Sa pagtatapos ng Oktubre, sa puspusang pag-aani, ang supply ay katumbas ng 74 na araw.

Bumaba na rin ang presyo ng bigas malapit sa price ceiling na may average na presyo ng regular milled rice na humigit-kumulang P41.91 kada kilo at para sa well-milled na bigas ay P45.95.

"Kaya 'yun at inaasahan na magkaroon ng collaborations ang DA at DTI (Department of Trade and Industry) para mas ma-monitor at ma-survey ang mga presyo para hindi... muli, tumaas nang husto," pahayag ni Panganiban.

“So, iyon ang ginagawa namin at nakikipagtulungan kami sa lahat ng ahensya ng gobyerno – hindi lang ang DA kundi pati na rin ang DTI at DILG (Department of Interior and Local Government) para ipatupad ang anumang hakbang at guidelines na magagawa namin para ang mga mamimili at, siyempre, ang ating mga stakeholder, ang mga magsasaka, na nakinabang din (ito),” banggit pa ng opisyal.