Walang kinalaman ang China — PCG.. Pagkamatay ng 3 Pinoy, aksidente

ni Mylene Alfonso @News | October 6, 2023

Aksidente ang pagkamatay ng tatlong mangingisdang Pilipino makaraang mabangga ng isang dayuhang commercial vessel ang sinasakyan nilang fishing boat noong Lunes ng madaling-araw sa karagatang sakop ng Agno, Pangasinan.

"As far as the initial information that we have right now, we can say na hindi naman ito talaga deliberate," pahayag ni Philippine Coast Guard Spokesman Commodore Jay Tarriela sa Bagong Pilipinas Ngayon public briefing.

"Ito ay isang aksidente. Walang kinalaman sa Tsina," wika pa ni Tarriela.

"Hindi ito nangyari sa Bajo de Masinloc. Hindi ito 'yung naglalabasang espekulasyon kahapon na baka Chinese Maritime Militia o Chinese Coast guard ang deliberately nag-ram," paglilinaw pa ng opisyal.

Aniya, batay sa testimonya ng 11 nakaligtas na mangingisda, masyadong madilim ang lugar at masama ang panahon kaya hindi sila napansin ng bumangga sa kanila na Pacific Anna Crude Oil Tanker.

Nabatid na nakipag-ugnayan na rin ang PCG sa naturang foreign vessel na may Marshall Island flag.

Petrolyo, bumaba na.. Murang bilihin, next

ni Mylene Alfonso @News | October 6, 2023

Kumpiyansa ang mga mambabatas na huhupa na ang mabilis na pagtaas ng presyo ng mga bilihin sa mga darating na buwan.

Ayon kay House Ways and Means Chair Joey Sarte Salceda, ang naitalang 6.1% inflation rate sa buwan ng Setyembre ay epekto ng mataas na presyo ng produktong petrolyo at bigas.

Ani Salceda, inaasahang huhupa na ang inflation rate ngayong Oktubre dahil sa pagbaba ng presyo ng produktong petrolyo sa pandaigdigang pamilihan at pagsunod sa rice price ceiling na ipinatupad ni Pangulong Ferdinand Marcos Jr.

Sinabi rin ni Senior Deputy Speaker at Pampanga 3rd District Rep. Aurelio 'Dong' Gonzales, Jr. na inaasahan ang pagbaba ng inflation rate sa nalalabing bahagi ng taon.

Ipinaliwanag ni Gonzales na bagama't nagawang kontrolin ng gobyerno ang presyo ng bigas, masyadong maliit ang magagawa nito sa presyo ng produktong petrolyo na inaangkat mula sa ibang bansa.

Aniya, mayroong mga ginagawang paraan ang gobyerno upang mabawasan ang epekto ng pagtaas ng presyo ng bilihin sa mga mahihirap at sektor ng transportasyon.

Naniniwala naman si House Committee on Agriculture and Food chairperson Mak Enverga na naabot na ang pinakamataas na inflation rate noong Setyembre at inaasahan na ang pagbaba nito.

Ayon sa Philippine Statistics Authority (PSA), ang inflation rate noong Setyembre ay 6.1% mas mataas kumpara sa 5.3% na naitala noong Agosto. Ang year-to-date inflation ng bansa ay nasa 6.6% na.

Toxic Halloween toys, ibinabala

ni Madel Moratillo @News | October 6, 2023

Binalaan ng isang watchdog group ang publiko lalo na ang mga bata sa mga produktong pang-Halloween na ibinebenta na ngayon sa merkado.

Inihalimbawa ni Thony Dizon, campaigner ng Ban Toxics, ang ilang produkto gaya ng mga nakakatakot na maskara, face paint at make-up, mga horror blood at pangil, baskets, mga laruan at imitation weapons, bungo at buto, at iba pang Halloween items.

Karamihan aniya sa mga ito ay walang tamang label, kaya hindi dapat ibinebenta o gamitin ng mga tao.

Paalala ni Dizon, importante na mayroong Certificate of Product Notification mula sa Food and Drug Administration ang mga produkto, alinsunod sa Republic Act 10620 o Toy and Game Safety Labeling Act.

Babala ni Dizon, ang mga laruan at produkto na hindi dumaan sa tamang proseso at hindi rehistrado ay puwedeng magdulot ng kapahamakan at epekto sa kalusagan lalo na ng mga bata, dahil sa ilang taglay na toxic na kemikal gaya ng lead.

Bukod dito, ang mga item na pang-Halloween ay may iba pang potential hazards sa mga bata tulad ng choking, sunog at pagkasugat at iba pang pinsala.

Hinikayat din ng grupo ang mga gumagawa at nagbebenta ng mga laruan na sumunod sa umiiral na health at safety regulations ng bansa.