'Pag nag-sorry, lumuhod sa Poong Nazareno.. Kaso kay Pura Luka, iaatras

ni Mai Ancheta @News | October 7, 2023

Handang iurong ng Hijos del Nazareno ang kaso laban kay Drag Queen Pura Luka Vega o Amadeus Fernando Pagente kung haharap ito sa Poong Nazareno at hihingi ng tawad sa ginawang paglapastangan.

Ito ang inihayag ni Alex Irasga, adviser ng grupo matapos arestuhin ng mga operatiba ng Manila Police District ang drag queen nitong Miyerkules sa Sta. Cruz, Manila.

Sinabi ni Irasga na kailangan lamang kilalanin ni Pura Luka Vega ang kanyang pagkakamali at paglapastangan sa Poong Nazareno at pagkatapos nito ay iuurong ang kaso laban sa kanya.

Handa aniya nitong samahan si Vega sa simbahan ng Quiapo at samahang lumuhod sa Poong Nazareno kung sakaling magbago ang isip nito.

"'Pag natapos niyang magpiyansa, gusto niyang matapos ang problema niya sa Maynila, kontakin niya ako, sasamahan ko siya sa simbahan ng Quiapo, sa aming mga pari at sasamahan ko siyang lumuhod sa harap ng Señor. At kami ho ay tapos na. After nu'n, pupunta kami sa city hall para bawiin 'yung aming kaso," ani Irasga.

Kailangan aniyang makita ng publiko na nagsisi at humingi ng tawad ang drag queen sa ginawang paglapastangan sa Poong Nazareno.

"Kailangang magsimula ang pagpapatawad sa pagkilala na may pagkakamali siyang ginawa at 'yun ay 'yung napakataas na antas ng paglapastangan sa ating Panginoon," dagdag ni Irasga.

Si Pura Luka ay kinasuhan ng grupo dahil sa drag performance nito kung saan ginaya ang Poong Nazareno habang sumasayaw sa remix version ng dasal na "Ama Namin".

Hirit ni Marcos sa publiko.. Mga sangkot sa smuggling at hoarding, isumbong

ni Mylene Alfonso @News | October 7, 2023

Hinimok ni Pangulong Ferdinand Marcos, Jr., ang publiko na isumbong ang sinuman na malalaman nila na sangkot sa smuggling at hoarding ng mga agricultural products.

"Mga kababayan, gaano man kalaki ang kanilang sindikato… wala pong binatbat 'yan sa nagkakaisa nating lakas," ani Marcos sa isinagawang pamamahagi ng bigas sa Capiz.

"Kaya kung may nalalaman po kayong sangkot sa ganitong transaksyon, 'wag po kayong matakot na magsuplong," saad ni Marcos.

Una nang binigyan ng warning ni Marcos ang mga smuggler na hahabulin ng gobyerno ang malalaking sindikato na sangkot sa pananabotahe ng ekonomiya.

"Makilahok sa pagbabantay sa ating lipunan. Marami pa rin po tayong malalaking nakakapanloko ng kapwa. Tunay po na nakakagalit ang mga smuggler at hoarder na 'yan," ayon kay Marcos.

Ayon pa sa Pangulo, inaamyendahan na ng mga mambabatas para gawing kasong kriminal at bigatan ang parusa sa agricultural hoarding at smuggling.

Nabatid na inaprubahan na ng House of Representatives sa ikatlo at pinal na pagbasa ang bill na pabigatin ang parusa ng Anti-Agricultural Smuggling law.

Habang ilang agricultural group naman ang nagsulong sa paglikha ng special court na tututok lamang sa mga kaso ng smuggling.

Tambay, konti na lang — P-BBM

ni Mylene Alfonso @News | October 7, 2023

Binigyang-diin ng National Economic Development Authority (NEDA) ang pangako ng administrasyong Marcos na lumikha ng mas maraming trabaho para sa mga Pilipino.

Ito ay matapos maitala ng Philippine Statistics Authority (PSA) ang 4.4% na unemployment rate sa buwan ng Agosto na mas mababa kumpara sa 4.8% na naitala noong Hulyo.

Ayon kay NEDA Sec. Arsenio Balisacan, patuloy ang pagsisikap ng pamahalaan na mapalago ang ekonomiya ng bansa na magreresulta sa mas maraming trabaho.

Pinagaganda rin ng pamahalaan ang business climate ng bansa para makahikayat ng maraming investor o mamumuhunan.

Tinukoy ni Balisacan ang pag-apruba ng Senado sa public, private partnership act, at dahil sa national innovation agenda and strategy document 2023 to 2032, inaasahan ang mas masiglang oportunidad sa Philippine labor market.

Una nang inanunsyo ng PSA na bahagyang nabawasan ang bilang ng mga walang trabaho noong Agosto.

Sa talaan, umabot sa 2.21 milyon kumpara noong Hulyo na naitala sa 2.27 milyon.

Ayon kay Undersecretary Claire Dennis Mapa, National Statistician at chief ng PSA, mas mababa rin ang nasabing bilang sa naitalang 2.68 milyon na walang trabaho noong Agosto ng nakaraang taon.

Naitala naman sa 4.4% ang unemployment rate.

Samantala, nadagdagan naman ang bilang ng may trabaho nitong Agosto na umabot sa 48.7 milyon mula sa 44.63 milyon noong Hulyo. Ito ay mas mataas pa sa 47.87 milyon na may trabaho noong Agosto noong nakaraang taon.