Red Tide Alert

ni Mai Ancheta @News | October 8, 2023

Positibo sa red tide toxin ang ilang baybaying dagat sa Visayas at Mindanao.

Ito ang inihayag ng Bureau of Fisheries and Aquatic Resources (BFAR) bilang babala sa mga residenteng nakatira sa mga lugar na nakitaan ng kontaminasyon.

Kabilang sa mga baybaying kontaminado ng red tide toxins ang Sapian Bay, Roxas City, President Roxas, Panay at Pilar sa lalawigan ng Capiz.

Hindi rin ligtas kainin ang mga shellfish sa Gigantes Islands at bayan ng Carles sa Iloilo, gayundin sa Dauis at Tagbilaran sa Bohol.

Kontaminado rin ng red tide ang Dumanquillas Bay sa Zamboanga del sur kaya pinaalalahanan ng BFAR ang mga residente ng lugar na iwasan muna ang pagkain ng tahong, talaba at iba pang uri ng shellfish gayundin ang alamang upang masiguro ang kaligtasan.

Pero nilinaw ng BFAR na ligtas kainin ang isda, pusit, hipon at talangka basta alisin ang mga laman-loob at lutuing mabuti ang mga ito.

25 Pinoy, ginawang scammer sa Cambodia

ni Gina Pleñago @News | October 8, 2023

Tinatayang nasa 25 Pinoy na biktima ng human trafficking at illegal recruitment ang nailigtas sa Cambodia.

Batay sa mga awtoridad, sila ay nagtatrabaho bilang mga scammer sa isang crypto farm.

Agad na sinimulang hanapin ng mga opisyal ng Philippine Embassy ang mga manggagawa matapos humingi ng tulong ang ilan sa mga ito dahil sa hindi pagbabayad ng kanilang mga amo.

Sa tulong ng impormante natunton ang kanilang kinaroroonan.

Batay kay Consul General Emma Sarne, lahat ng naligtas na mga Pilipino ay walang Overseas Employment Contract (OEC) at hindi dumaan sa legal na proseso.

Sinabi ni Sarne na nakalabas sila ng bansa na nagpapanggap na mga turista.

Sa ngayon, ang naturang mga biktima ay nasa government facility na sa Cambodia at kasalukuyan nang nagsasagawa ang mga awtoridad ng imbestigasyon at pakikipagtulungan sa Cambodian government.

Pura Luka, laya sa P72K piyansa

ni Mai Ancheta @News | October 8, 2023

Laya na pansamantala ang drag queen na si Pura Luka Vega matapos makapagpiyansa nitong Sabado. Si Vega o Amadeus Fernando Pagante sa tunay na buhay ay inaresto ng mga operatiba ng Manila Police District noong Miyerkules dahil sa kasong isinampa ng Hijos del Nazareno dahil umano sa paglapastangan sa Poong Nazareno sa isang drag show.

Itinakda ng korte ang P72,000 na piyansa para sa pansamantalang paglaya ng drag queen. Naaprubahan ang motion for bail ni Pura Luka noong Biyernes subalit, hindi agad nakalabas ng kulungan dahil naabutan ng pagsasara ng korte ang pagproseso sa pansamantalang paglaya nito.

Ang kaso laban kay Pura Luka ay nag-ugat sa panggagaya nito sa Nazareno habang kinakanta at sinasayaw ang bersiyon nito ng "Ama Namin" na ikinagalit at ikinainsulto ng mga deboto ng Nazareno.