Mga preso sa Bilibid, nakakagamit ng e-wallet

ni Mylene Alfonso @News | August 9, 2023

Posibleng umabot sa P300,000 kada araw ang halaga ng kabuuang money remittance transactions sa New Bilibid Prison.

Ito ang inihayag ng isang Molly Avejar, negosyante na humahawak ng mga transaksyon sa e-wallet.

Sa isinagawang pagdinig kahapon ng Senate Committee on Justice and Human Rights sa Bilibid, sinabi ni Avejar na iba-iba ang halaga ng remittances kada araw at kadalasang mababa kapag weekend.

“Wala pong definite, your honor. Meron pong umaabot po ng P300,000 sa isang araw po. Minsan po P50,000 to P70,000,” tugon ng babaeng negosyante kay Senador Francis Tolentino, chairman ng komite.

Sinabi rin ni Avejar na naniningil siya ng tatlong porsyento mula sa kabuuang remittance at kumikita siya ng hanggang P9,000 sa isang araw.

“Hindi po ako nagbabawas sa P500 and below, hindi po ako nagbabawas. Minsan may nagpapadala P100, P200, dinadagdagan ko na lang po kasi ano pong mabibili nila sa P100, P200, your honor?” aniya pa.

Ang pera aniya ay nanggagaling mismo sa mga pamilya ng persons deprived of liberty (PDLs) o bilanggo, na tatawagan siya sa alinmang limang mobile number niya.

Matapos nito ay ibibigay niya ang mga pera sa isang pinagkakatiwalaang bilanggo, na siyang bahala sa pamamahagi nito sa mga PDL.

Dagdag pa ni Avejar, isang dating PDL sa Correctional Institution for Women (CIW), na naisip niya ang negosyo dahil sa kanyang karanasan sa CIW na isang pasilidad ng Bureau of Corrections sa Mandaluyong.

Mga preso, kawawa — BuCor.. Nasa Bilibid, puwede um-order online

ni Gina Pleñago @News | August 1, 2023

Binigyan ng pahintulot ang persons deprived of liberty (PDLs) na nakakulong sa New Bilibid Prison (NBP) sa Muntinlupa City na maka-order ng pagkain sa pamamagitan ng online delivery applications.

Ayon kay Bureau of Corrections (BuCor) Director, General Gregorio Catapang, Jr. nitong Lunes nang mapanayam ng DZBB TV, na maaari ito gamit ang laptops na itinalagang gamitin ng PDLs sa “e-dalaw”.

Lahat naman ng idedeliber na order, ibabagsak sa outpost ng NBP para rikisahin at tignan mabuti bago ipasok at ibigay sa PDLs, para maiwasang makapagpasok pa ng mga kontrabando.

Kaugnay din umano ito sa mga insidente na naisingit sa food packages ang kontrabando, kabilang ang sigarilyo na nabuko na ibinaon sa spaghetti.

Ibinulgar ni NBP Director na nadiskubre din ang isang sachet ng shabu na nakasingit sa idineliber na pagkain.

Nilinaw ni Catapang na hindi naman nila aalisin ang online delivery applications dahil nasa karapatan ng mga preso na umorder ng pagkain, na bahagi ng Mandela prison reform rules.

Binigyang-diin niya ang kahalagahan ng paggalang sa mga karapatan ng mga bilanggo, kabilang ang kanilang mga kagustuhan para sa kanilang katutubong lutuin, tulad ng Chinese o Korean food.

Aniya, nakakaawa ang kalagayan ng mga bilanggo na siksikan sa ngayon kaya binibigyan sila ng kaunting luwag tulad ng pag-order sa labas ng pagkain.

Ang NBP na dapat ay mag-accommodate lamang ng 6,000 preso ay nasa 30,000 sa kasalukuyan.

Nitong nakalipas na linggo ay iginiit ni ACT-CIS Partylist Representative Erwin Tulfo na dapat magsagawa ng inquiry sa mga natatamasang pribilehiyo ng PDLs kabilang ang pagpapadeliber ng fast food sa piitan.

Away sa Bilibid, 1 utas, 9 pa nadale

ni Gina Pleñago @News | July 27, 2023

Walang riot na nangyari sa New Bilibid Prison (NBP), ito ang iniulat kahapon ng Bureau of Corrections (BuCor).

Isang Person Deprived of Liberty (PDL) ang nasawi sa pananaksak habang 9 naman ang sugatan.

Nilinaw agad ng BuCor, na walang naganap na riot kundi alitan lamang ng dalawang miyembro ng Batang City Jail at Bahala na Gang.

Base sa inisyal na ulat na nakarating kay BuCor Director General Gregorio Catapang, Jr. ni J/Senior Inspector Angelina Bautista (Ret.), Officer-in-Charge Deputy Director for Operations at NBP Superintendent, alas-9 ng gabi nang magkaroon ng 'di pagkakaunawaan ang dalawang preso.

Agad namang naawat ang dalawa subalit ang isang PDL na 'di kasali sa away ay nagpaputok ng baril kaya nagkaroon ng panic at kaguluhan.

Nang matapos ang komosyon, isang Alvin Barba ang nadiskubreng patay dahil sa saksak ng icepick habang ang 9 na sugatan ay kinilalang sina Ampatuan Misuari, Emmanuel Carino, Makakna Iman, Marlon Cepe, Bernand Marfilla, Franklin Siquijor, Joner Moralde, Heron Supitran at Ardie Severa.

Patuloy pang inaalam kung magkaugnay ang insidente ng pamamaril sa pananaksak sa biktimang si Barba.

Patuloy na iniimbestigahan ang PDL na si Joseph Serrano para malaman kung paano

siya nagkaroon ng baril.

Sinuspinde naman ang dalaw sa Bilibid at nagsagawa ng clearing operations ang SWAT team ng BuCor sa Quadrants 1, 2, 3 at 4.