57 lugar sa NCR, isinailalim sa granular lockdown

ni Lolet Abania | September 17, 2021

Umabot na sa 57 lugar ang isinailalim sa granular lockdown sa National Capital Region isang araw matapos ang pilot implementation nito, pahayag ng Department of the Interior and Local Government (DILG).

“Based on the report given to us by the NCRPO, we have 57 areas in the National Capital Region currently under granular lockdowns,” ani DILG Undersecretary Jonathan Malaya sa Laging Handa public briefing ngayong Biyernes.

“Almost all LGUs here in Metro Manila have granular lockdowns.”

Gayunman, hindi tinukoy partikular ni Malaya ang mga lugar na naka-lockdown sa NCR.

“Doon sa sinasabing issue tungkol sa warning, nasa kamay na po ‘yan ng mga local government units kung anong klaseng warning ang kanilang gagawin,” sabi ng kalihim.

“We will leave it now to the discretion of the local government units kung sila ba ay biglang magla-lockdown lamang o magbibigay sila ng advanced warning,” paliwanag pa ni Malaya.

Binigyang-diin ni Malaya na ang mga lugar na isinailalim sa granular lockdowns ay iyong nasa critical nodes, kung saan itinuturing na may clustering ng mga kaso at active transmission ng COVID-19.

Subalit, apela ng mga residente na magkaroon naman muna ng notice o abiso mula sa kanilang lokal na pamahalaan bago ipatupad ang granular lockdown sa partikular na lugar upang magkaroon din sila ng pagkakataon na makapaghanda.

Samantala, sa hiwalay na panayam kay Malaya, sinabi nitong ang pagpapatupad ng Alert Level 4 sa Metro Manila sa ngayon ay maituturing aniyang “good” o mabuti.

Mga LGU sa NCR, nagsimula na rin ang registration para sa Covid vaccine ng 12-17 anyos

ni Jasmin Joy Evangelista | September 14, 2021

Matapos magbukas ng Maynila ng registration sa COVID-19 vaccine para sa mga kabataang edad 12-17, nagsunuran na rin ang iba pang LGU sa NCR.

Nag-anunsyo ang Mandaluyong City government nitong Linggo na puwede nang i-rehistro ng mga magulang o guardian ang mga kabataang residente na pasok sa naturang age group sa website ng MandaVax.

Online din ang registration sa Makati City, pero para sa mga walang gadget o internet, may umiikot na jeep kung saan puwedeng magpalista.

Bukas na rin ang registration para sa mga batang edad 12 hanggang 17 sa Taguig City, sa pamamagitan ng pag-scan sa QR code o sa trace.taguig.gov.ph.

Sa lungsod ng Caloocan, inilunsad nitong weekend ang online profiling kung saan pwedeng magpalista ang mga edad 12 hanggang 17 na interesadong magpabakuna. Bisitahin lang ang link na bit.ly/Caloocan_profiling17.

Muncovac naman ang link ng registration para sa mga taga-Muntinlupa City.

Sa Quezon City, nakikipag-ugnayan din ang lokal na pamahalaan sa mga paaralan at barangay para makakuha ng masterlist ng mga edad 12 hanggang 17 anyos.

Ayon sa mga mayor, isinagawa na nila ang registration upang sa sandaling may go signal na sa pagbabakuna sa nasabing age bracket ay mayroon na silang listahan.

Ayon kay National Task Force against COVID-19 deputy chief implementer Vince Dizon, nag-aantay pa sila ng rekomendasyon kung kailan pwedeng simulan ang pagbabakuna kontra COVID ng mga bata.

MECQ pa rin sa NCR

ni Lolet Abania | September 7, 2021

Mananatili sa modified enhanced community quarantine (MECQ) ang National Capital Region (NCR), habang ipinagpaliban din ang pilot implementation ng general community quarantine (GCQ) with alert level system ng Inter-Agency Task Force (IATF), ayon sa Malacañang.

Sa isang statement ngayong Lunes nang gabi ni Presidential Spokesman Harry Roque, nasa ilalim pa rin ng MECQ ang Metro Manila hanggang Setyembre 15 o hanggang ipatupad ang pilot GCQ with alert level system.

Ipinagbabawal pa rin ang indoor at al-fresco dine-in services, gayundin ang personal care services kabilang dito ang mga beauty salons, beauty parlors at nail spas.

Papayagan ang mga religious services subalit dapat isagawa sa pamamagitan ng online video recording at mananatili pa rin itong virtual.

Ang mga miyembro ng pamilya lamang ang papayagan para sa necrological services, burol, inurnment at libing basta hindi ito namatay dahil sa COVID-19. Gayunman, ang naturang miyembro ng pamilya ay kinakailangang magpakita ng patunay ng kanilang kaugnayan sa namatay at dapat na sumunod sa minimum public health standards.