Thunder diretso sa West Final, Lakers inilaglag

ni Anthony E. Servinio @Sports | May 13, 2026

Photo: Dilat na dilat sa pag-uunahan na makakuha ng bola sina Oklahoma City Thunder guard Shai Gilgeous-Alexander (2) at Los Angeles Lakers forward LeBron James (23) sa second half ng 2026 NBA Playoffs. (Jayne Kamin-Oncea-Imagn Images)

Laro ngayong Miyerkules - Frost Bank

8:00 AM Minnesota vs. SA

Winakasan ng World Champion Oklahoma City Thunder ang kampanya ng Los Angeles Lakers, 115-110 at tumuloy sa Western Conference Finals ng 2026 NBA Playoffs kahapon sa Crypto.com Arena. Sa East, buhay na buhay ang Cleveland Cavaliers sa 112-103 panalo sa bisitang Detroit Pistons .

Sa gitgitang katapusan, isinalpak ni Chet Holmgren ang bola upang ibalik ang lamang sa OKC na may 33 segundong nalalabi, 111-110. Biglang nagmintis ang Lakers na nagbunga ng mga paniguradong free throw nina MVP Shai Gilgeous-Alexander at Ajay Mitchell para isara ng maaga ang seryeng best-of-seven, 4-0.

Nagtapos na may 35 puntos si SGA habang 28 si Mitchell. Nagdagdag ng 16 si Holmgren.

Nahanap ni Donovan Mitchell ang kanyang shooting at umapoy para sa 39 ng kanyang 43 sa huling dalawang quarter at pinantay ng Cavs ang serye, 2-2. Kasama rito ang puntos na nagtayo ng 98-77 agwat sa huling 9 na minuto at kinapos ng panahon ang paghabol ng Pistons.

Sumuporta si James Harden na may 24 at 11 assist at Evan Mobley na may 17 para sundan ang 116-109 tagumpay sa Game 3. Nagtala ng 24 si reserba Caris LeVert para sa Detroit.

Babasagin ng San Antonio Spurs at bisitang Minnesota Timberwolves ang kanilang 2-2 tabla sa kabilang West Semifinals ngayong Miyerkules. May mahabang pahinga ang OKC bago malaman ang kanilang sunod na makakalaro sa dalawang koponan.

East finalist ang Knicks, pantay ang T'wolves, 2-2

ni Anthony E. Servinio @Sports | May 12, 2026

Photo: Binubundol ni New York Knicks' Karl-Anthony Towns, (kaliwa) si Philadelphia 76ers' Joel Embiid sa laro nilang ito sa NBA basketball playoff series kahapon. (AP/Matt Slocum)

Laro ngayong Martes

8:00 AM Detroit vs. Cleveland

10:30 AM OKC vs. LA Lakers

Winalis ng New York Knicks ang malamyang Philadelphia 76ers, 144-114 at pumasok sa Eastern Conference Finals ng 2026 NBA Playoffs kahapon sa Xfinity Mobile Arena. Pinantay sa 2-2 ng Minnesota Timberwolves ang kanilang serye sa San Antonio Spurs, 114-109.

Ibinalik ni kabayan Dylan Harper ang lamang sa Spurs, 101-100, pero sinagot ito ng mga shoot ni Rudy Gobert at Anthony Edwards para maagaw ang T-Wolves ang bentahe na may 2 minutong nalalabi, 107-101. Siniguro ng free throw ni Ayo Dosunmu at pandiin na buslo ni Naz Reid ang resulta sa gitna nga pagpalag nina Harper at Julian Champagnie.

Uminit para sa 36 si Edwards. Sumuporta si Reid na may 15 at Jaden McDaniels na may 14.

Malaking dagok sa Spurs ang pagpapalabas kay Victor Wembanyama sa pangalawang quarter nang masiko niya sa bandang balikat si Reid. Sinikap buhatin ang koponan nina Harper at De'Aaron Fox na parehong may 24.

Puro Knicks ang nagsulat ng kuwento sa 43 puntos sa unang quarter pa lang. Umabot ang agwat sa 128-84 matapos ang limang sunod na puntos ni Jose Alvarado at "nagpahinga" na ang NYK sa nalalabing 9 na minuto.

Unang quarter pa lang ay doble-pigura na sila at nagtapos na may 25 si Miles McBride at 22 si Jalen Brunson kahit umupo sila sa buong huling quarter. Tig-17 sina Mikal Bridges at Karl-Anthony Towns para wakasan ang seryeng best-of-seven, 4-0.

Ito ang pangalawang sunod na taon na pasok ang Knicks sa East Finals. Habang naghihintay ng kalaro ay may panahon silang magpahinga lalo na si OG Anunoby na napilay ang singit, dahilan na lumiban siya sa huling dalawang laro.

Isang panalo pa sa OKC, SGA kumilos, Cavaliers nakaalpas

ni Anthony E. Servinio @Sports | May 11, 2026

Photo: Oklahoma City Thunder - FB

Laro ngayong Lunes

3:30 AM NY vs. Philadelphia

7:30 AM SA vs. Minnesota

Malinis pa rin ang World Champion Oklahoma City Thunder ngayong 2026 NBA Playoffs matapos humabol at talunin ang Los Angeles Lakers, 131-108, kahapon sa Crypto.com Arena.  Nabuhay ang kampanya ng Cleveland Cavaliers sa 116-109 pagpigil sa Detroit Pistons.

Lamang ang Lakers sa simula ng pangatlong quarter, 59-57, subalit nagising ang Thunder at nag-ingay.  

Pumasok na ang mga tira nina Ajay Mitchell at MVP Shai Gilgeous-Alexander at lumaki ang kanilang bentahe sa 124-97 sa three-points ni Isaiah Joe at tatlong minuto sa orasan.

Pitong OKC ang may 10 o higit sa pangunguna ni Mitchell na may 14 at SGA na may 23.  Nanguna sa Lakers sina Rui Hachimura na may 21 at LeBron James na may 19.

Isa na lang ang kailangan ng Thunder para walisin ang seryeng best-of-seven.  Tinalo nila ang Phoenix Suns, 4-0, sa Round One.

Sinayang ng Cavs ang 65-38 lamang sa unang minuto ng pangatlong quarter.  Tumabla ang laro, 104-104, sa tres ni Duncan Robinson pero nabawi agad ng Cleveland ang bentahe sa mga buslo nina Max Strus at James Harden, 108-104, at 1:29 sa orasan.

Tinuldukan ni Donovan Mitchell ang kanyang 35 sa tatlong free para manigurado at itakda ang huling talaan. Nag-ambag ng 19 si Harden.

Samantala, pumirma ng bagong kontrata si Coach Steve Kerr para manatili sa Golden State Warriors hanggang 2027-28. Sa kanyang gabay mula 2014 ay apat ang kampeonato ng GSW (2015, 2017-18, 2022) subalit nahulog sa Play-In ngayong taon at umingay ang bulong na papalitan siya kasabay sa pagpaso sa kasalukuyang kontrata.