Heat kampeon sa East, Nuggets ready sa final

ni Anthony E. Servinio @Sports | May 31, 2023

Laro sa Biyernes – Ball Arena

8:30 a.m. Miami vs. Denver

Magtiwala kay kabayan Coach Erik Spoelstra. Pasok ang bisitang Miami Heat sa 2023 NBA Finals matapos durugin ang Boston Celtics, 103-84, sa Game 7 ng Eastern Conference Finals kahapon sa TD Garden.

Matapos ang masaklap na 103-104 talo sa Game 6, nanindigan si Coach Spoelstra na kukunin nila ang serye at hindi niya binigo ang mga tagahanga. Humugot ang Heat ng lakas kay Jimmy Butler na may 28 puntos at Caleb Martin na may 26 at 10 rebound para makapasok ang prangkisa sa Finals sa ika-7 pagkakataon at ika-9 sa gabay ni Coach Spoelstra.

Sa unang hawak ng Celtics sa bola ay natapilok si Jayson Tatum matapos tapakan ang paa ni Gabe Vincent. Naglaro pa rin si Tatum subalit apektado ang diskarte at isang free throw lang ang nagawa sa buong first quarter at lumamang ang Miami, 22-15.

Walang nakapigil sa arangkada ng Miami at lumaki sa 23 ang agwat sa 4th quarter, 96-73, at 5:33 sa orasan matapos ang magkasunod na buslo nina Duncan Robinson at Butler. Iginawad sa Heat ang Bob Cousy Trophy bilang kampeon ng East at si Butler ang tumanggap ng Larry Bird Trophy bilang MVP ng serye.

Sinikap ni Jaylen Brown na buhayin ang Boston sa kanyang 19 puntos at sinundan ng bayani ng Game Six na si Derrick Brown na may 18. Tiniis ni Tatum ang sakit at nag-ambag ng 14 puntos at 11 rebound.

Naghihintay na sa Miami ang Denver Nuggets sa Game 1 at 2 ngayong Hunyo 2 at 5 sa Ball Arena. Lilipat ang seryeng best-of-seven sa Kaseya Center para sa Game 3 at 4 sa Hunyo 8 at 10.

Buhay pa ang Celtics, nanalo, Melo retired, Lebron balak din

ni Anthony E. Servinio / MC @Sports | May 25, 2023

Nagawa pang buhayin ng Boston Celtics ang kanilang kontensiyon sa Eastern Conference finals nang magwagi sa 116-99 laban sa Miami Heat kahapon upang maampat ang series deficit sa 3-1.

Sumigla ang dugo ni Jayson Tatum sa Celtics sa bisa ng nagawa niyang 33 points, 11 rebounds at assists, habang ang ibang 5 players ay nagtala ng dobleng pigura sa tikas ni Joe Mazzulla.

Matapos ang 128-102 win ng Miami Heat noong Linggo, nahaharap na sana ang Celtics sa posibilidad na matigbak na rin sa 4-0 pero dahil nanaig sila kahapon ay pag-iibayuhin pa nila ang susunod na pressure sa Miami sa pagbabalik nila sa Boston.

At dahil wala pang team sa NBA history ang nagawang makabalikwas sa 3-0 na pagkaiwan at ipanalo ang best-of-seven playoff series, nagpatuloy ang Boston sa kanilang tiwala na kaya nilang makabangon at abutin ang Finals habang nakaabang na ang Denver Nuggets.

Samantala, nagbabalak-balak na rin si LeBron James na magretiro sa pagba-basketball matapos na mawalis ang matigpas ang Los Angeles Lakers sa NBA playoffs ng matikas na Denver Nuggets noong Martes.

Iniuliat ng ESPN na nag-iisip-isip na ang 38-anyos na si LBJ na lisanin na ang sport na sinarhan na ng pintuan matapos ang 20th season niya sa liga.

Sa isang hiwalay na tweet ni Chris Haynes, ang reporter ng TNT broadcaster na "under consideration" na aniya ang pagreretiro ni James.

Pero nauna rito, nagpahayag na rin si Carmelo Anthony, isa sa premier scorers sa kasaysayan ng NBA at three-time Olympic gold medalist ng opisyal na pagreretiro sa basketball.

Naging emosyonal ang anunsiyo na ito ni Anthony sa kanyang social media accounts, at aniya, "the time has come for me to say goodbye" sa laro matapos ang 19 seasons sa NBA.

"I'm excited about what the future holds for me," dagdag ng 38-anyos na si Anthony, na siyang third overall pick sa pamosong 2003 NBA Rookie Draft ng Denver Nuggets.

Hawks dinagit ang Celtics, Knicks, 'di pinaporma ang Cavs

ni Anthony E. Servinio @Sports | April 23, 2023

Umiwas sa walis ang Atlanta Hawks at binigo ang bisitang Boston Celtics, 130-122, sa NBA Playoffs kahapon sa State Farm Arena. Tinambakan naman ng New York Knicks ang paboritong Cleveland Cavaliers, 99-79, para sa 2-1 lamang sa kanilang serye.

Sa oras ng kagipitan, kumapit ang Hawks sa kanilang bituin Trae Young na nagbagsak ng 32 puntos at siyam na assist at wakasan ang dalawang sunod na panalo ng Boston sa seryeng best-of-seven. Tumulong si Dejounte Murray sa kanyang 25 puntos.

Depensa ang susi ng Knicks na nag-resulta ng 21 puntos para kay Jalen Brunson. Nag-ambag ng 19 si RJ Barrett.

Samantala, sinisante ng Toronto Raptors si Coach Nick Nurse matapos ang limang taon.

Nagtala siya ng kartadang 390-227 at sa kanyang unang sabak sa koponan at ginabayan ang Raptors patungo sa 2019 NBA World Championship.

Kahit wala na sa NBA ay tuloy pa rin ang paghawak ni Coach Nurse sa Team Canada na lalahok sa 2023 FIBA World Cup sa Agosto. Ang Canada ay maaaring mabuo ng 12 manlalaro ng NBA subalit sa Indonesia sila maglalaro ng group stage at tutuloy lang sa Pilipinas kung papasok sila sa knockout playoffs.