Ingram at Jackson, dagdag sa American team ng FIBA

ni Anthony E. Servinio @Sports | June 7, 2023

Idagdag ang mga pangalan nina 2023 Defensive Player of the Year Jaren Jackson Jr. ng Memphis Grizzlies at Brandon Ingram ng New Orleans Pelicans sa mga magiging bahagi ng Team USA sa FIBA World Cup ngayong Agosto rito sa Pilipinas.

Dahil dito, walo na ang kasapi ng koponan na sisikaping bawiin ang tropeo na huli nilang napagwagian noong 2014 sa Espanya. Malaking bagay ang depensa ng 6’11” Jackson upang magtala ng kartadang 51-31 ang Grizzlies. Tinapos ng 6’8” Ingram ang kampanya ng Pelicans na may 24.7 puntos bawat laro, pinakamataas sa 7 taon sa NBA.

Sasamahan nila ang mga naunang nagpahayag na mga 2023 All-Star Anthony Edwards ng Minnesota Timberwolves at Tyrese Haliburton ng Indiana Pacers. Kasama rin sa listahan sina Jalen Brunson ng New York Knicks, Mikal Bridges ng Brooklyn Nets, Bobby Portis ng Milwaukee Bucks at Austin Reaves ng Los Angeles Lakers.

Makakarating na si Brunson sa Pilipinas kung saan naglaro bilang import ng Ginebra ang kanyang ama na si Rick Brunson noong 1998. Tiyak na dudumugin si Reaves na bumango ang pangalan nitong nakalipas na taon para sa Lakers na isa sa pinakasikat na koponan sa buong mundo.

Maliban sa mga Amerikano ay makakapanood ang mga Filipino ng NBA player sa iba pang koponan na dadalaw dito. Pangunahin dito ang mga dating MVP na sina Nikola Jokic ng Denver Nuggets at Serbia at Giannis Antetokounmpo ng Bucks at Gresya.

Sa mga makakalaro ng Gilas Pilipinas, nandiyan sina 2023 Rookie of the Year Paolo Banchero ng Orlando Magic at Simone Fontecchio ng Utah Jazz para sa Italya at Bruno Fernando ng Atlanta Hawks at Angola.

Pagaganahin ni Butler ang opensa vs. Jokic

ni Anthony E. Servinio @Sports | June 5, 2023

Laro ngayong Lunes - Ball Arena

8:00 a.m. Miami vs. Denver

Manipis na hangin ang isang malaking magdidikta sa takbo ng 2023 NBA Finals. Nakita ito sa Game One noong Biyernes kung saan nagwagi ang Denver Nuggets sa bisitang Miami Heat, 104-93, subalit mahaba pa rin ang seryeng best-seven na magtutuloy ngayong araw sa Ball Arena para sa Game 2 simula 8:00 ng umaga.

Ang lungsod ng Denver ay mahigit 1,600 metro o isang milya ang taas mula sa dagat kaya ito nabansagang “Mile High City”. Bunga ng kakaibang klima, mas kaunti ang oxygen kaya mas mabilis mapagod kahit ang mga beterano ng Nuggets at lalo na sa kanilang mga naging bisita.

Sa huli, malaking suliranin para sa naghahabol na Heat ay kung paano pigilin si Nikola Jokic na sa tangkad na 6’11” ay taglay ang katangian ng isang point guard. Ang trabaho na bantayan siya ay nakasalalay kay 6’9” Bam Adebayo at hindi ginamit ni kabayan Coach Erik Spoelstra ang iba niyang beteranong malaki tulad nina 6’8” Kevin Love at 6’8” Udonis Haslem habang pitong minuto lang si 6’11” Cody Zeller.

Kakalimutan ni Jimmy Butler ang kanyang inilaro sa Game One at kailangan na mahanap muli ang kanyang opensa sabay ang matinding trabaho na bantayan si Jamal Murray at tumulong din kontra kay Jokic. Bumanat si Murray ng 18 ng kanyang 26 puntos sa first half at itulak ang Denver sa 59-42 lamang.

Samantala, kahit nasisante kamakailan ay nakahanap agad ng bagong trabaho ang mga coach na sina Nick Nurse sa Philadelphia 76ers at Monty Williams sa Detroit Pistons.

Ang hamon sa mga bagong coach ay tumagal gaya ng mga coach sa Finals. Si Coach Michael Malone ng Nuggets ay nasa kanyang ika-walong taon habang si Coach Spoelstra ng Heat ay 15 taon na sa koponan.

Kai Sotto, nasa mini camp ng Jazz para makapasok sa NBA

ni Gerard Arce @Sports | June 1, 2023

Hindi magpapaawat sa pagtupad ng kanyang pangarap si 7-foot-3 Filipino stalwart Kai Zachary Sotto para makapasok sa premyadong liga ng National Basketball Association (NBA).

Ito’y kasunod ng panibagong post sa kanyang Instagram story na nagpapakita ng tanawin ng Salt Lake City sa Utah, kung saan naglalaro ang kapwa kababayan na si Filipino-American Jordan Clarkson.

Nakatakdang sumabak sa isang minicamp ang 21-anyos mula Hiroshima Dragonflies sa Japan B.League kasama ang ibang free agents at international prospects kahapon at bagyong araw (oras sa Pilipinas).

Kasalukuyang nagbabalasa ng line-up ang Utah Jazz at naghahanap ng big man, kung saan tinatarget rin nila ang serbisyo ni Deandre Ayton ng Phoenix Suns sa isang trade, habang mayroon na ring mahusay na big man ang Jazz sa katauhan ni Walker Kessler, na napabilang sa All-Rookie Team.

Ayon sa inilabas ng The Salt Lake Tribune, nasa proseso umano ang Jazz ng rebuilding at naghahanap ng mga manlalarong maaaring kumuha ng mga mababakanteng puwesto, gayundin ang pagsandal sa kanilang picks sa 2023 NBA Draft picks sa first round kabilang ang No. 9, 16 at 28. “No less than Justin Zanik [general manager] noted that there could be a lot of change coming this offseason. There are key guys with player options who could decide not to return. There are three draft picks in hand. And with a haul of picks owed to them down the road, there’s the possibility of making some big trades,” ayon sa inilathala ni Eric Walden nitong Lunes (oras sa Amerika).

Pagdating naman kay Sotto, nabigo itong mapili ng anumang koponan sa nagdaang 2022 NBA Draft, upang maging free agent ito at undrafted, dahilan para bumalik sa dating koponan sa Australian NBL.