T'wolves binalahibuhan ang Celtics, Nuggets top scorer

ni Anthony E. Servinio @Sports | November 8, 2023

Wala nang perpektong koponan sa NBA at tinalo ng Minnesota Timberwolves ang Boston Celtics sa overtime, 114-109, kahapon sa Target Center. Dahil dito, naagaw ng World Champion Denver Nuggets ang pinakamataas na kartada sa bisa ng 134-116 tagumpay sa New Orleans Pelicans.

Bumida sa overtime si Anthony Edwards sa anim na magkasunod na puntos para sa matatag na 112-105 lamang at 1:30 sa orasan. Nagtapos si Edwards na may 38 habang may 20 si Jaden McDaniels kasama ang tres na nagtakda ng dagdag 5 minuto, 101-101.

Third quarter pa lang ay triple double si Nikola Jokic at nagtapos na may 35 puntos, 14 rebound at 12 assist. Umakyat ang Nuggets sa 7-1, kalahating laro ang lamang sa 6-1 Dallas Mavericks at isa sa 5-1 Boston at Philadelphia 76ers.

Pinatunayang muli ni Joel Embiid ng 76ers kung bakit siya ang MVP at bumanat ng 48 puntos at 11 rebound sa 30 minuto lang sa 146-128 tambak sa Washington Wizards. Wagi ang Mavs sa Orlando Magic, 117-102 sa 29 ni Luka Doncic.

Naabot ni Coach Rick Carlisle ang ika-900 tagumpay sa kanyang karera sa 152-111 pagbaon ng Indiana Pacers sa San Antonio Spurs sa likod ng 23 puntos ni Tyrese Haliburton. Nagkataon na nagawa niya ito kontra sa may pinakamarami na si Coach Gregg Popovich na may 1,369.

Kahit hindi pumuntos sa huling 3:50 ay nailusot pa ng Miami Heat ang 108-107 tagumpay sa Los Angeles Lakers. May pagkakataon ang Lakers subalit nagmintis si Cam Reddish sabay ubos ng oras. Halimaw si Bam Adebayo na nagtala ng 22 puntos, 20 rebound at 10 assist. Malayo pa kay #14 Coach Carlisle, ito ang ika-707 ni kabayan Coach Erik Spoelstra at tabla na siya kay Coach John McLeod sa #19 sa listahan.

Celtics naka-5 na, Tatum espesyal sa 10,000 points

ni Anthony E. Servinio @Sports | November 6, 2023

Nag-iisa sa taas ng NBA ang Boston Celtics matapos talunin ang Brooklyn Nets, 124-114, kahapon sa Barclays Center. Ito na ang ika-lima ng Celtics at naging espesyal ang gabi para kay Jayson Tatum na itinala ang ika-10,000 puntos sa kanyang 7 taong karera.

Inabot ng 25-anyos na si Tatum ang marka sa 3-point play sa 2nd quarter na kanyang ika-16. Humataw ng todo ang Boston sa 2nd half at nagtapos siya na may 32 puntos at 11 rebound. Ang World Champion Denver Nuggets ang unang koponan na umabot ng anim na panalo nang manaig sa Chicago Bulls, 123-101. Kinapos si Nikola Jokic ng isang assist para sa triple double pero may 28 at 16 rebound.

Napigil ng Charlotte Hornets ang huling habol ng Indiana Pacers, 125-124. Sumandal ang Hornets sa siyam ng kabuuang 27 puntos ni sentro Mark Williams sa 4th quarter. Tinambakan ng bisitang Atlanta Hawks ang New Orleans Pelicans, 123-105, upang umakyat sa 4-2. Bumanat ng 22 puntos at namigay ng 12 assist si Trae Young.

Hindi pinalad si kabayan Jordan Clarkson at Utah Jazz at tinambakan ng Minnesota Timberwolves, 123-95. Walang solusyon para kay Anthony Edwards na nagsabog ng 31 puntos. Dalawang panalo na ang Houston Rockets at dinurog ang Sacramento Kings, 107-89. Bumida ng paboritong kontrabida ng 2023 FIBA World Cup Dillon Brooks na nagtala ng 26 puntos.

Nakaganti ang Orlando Magic sa Los Angeles Lakers, 120-101. Anim na Magic ang gumawa ng 10 o higit sa pangunguna ni Franz Wagner na may 26 at Paolo Banchero na may 25. Sa maagang laro, umarangkada ang Philadelphia 76ers sa ika-apat na sunod laban sa Phoenix Suns, 112-106. Double-double si MVP Joel Embiid na 26 at 11 rebound.

Buwis-buhay si Banchero nang ipanalo ang Magic vs. Jazz

ni Anthony E. Servinio @Sports | November 4, 2023

Pinipilit ni Paolo Banchero ang kanyang katawan laban sa depensa upang ihatid ang nagpapanalong puntos sa 115-113 pagtakas ng bisita Orlando Magic sa Utah Jazz sa NBA kahapon sa Delta Center. Umulit din ang bisita San Antonio Spurs sa Phoenix Suns, 132-121, sa likod ng halimaw na laro ni 7’4” rookie Victor Wembanyama.

Mag-isang itinulak ni Banchero ang Magic sa 112-105 lamang papasok sa last 2 minutes subalit sinagot ito ng dalawang free throw ni kabayan Jordan Clarkson at magkasunod na tres ni Lauri Markkanen upang maagaw ang bentahe na may 20 segundo sa orasan, 113-112. Ibinalik ni Banchero ang lamang na may 14 segundong nalalabi, 114-113, at ipinasa ng sumaksak na si Clarkson ang bola sa walang bantay na Talen Horton-Tucker na nagmintis.

Napilitang bigyan ng foul si Wendell Carter pero napilay ang kanyang kamay kaya ipinatira kay rookie Anthony Black ang free throw na nagtakda ng huling talaan. Ipinasok ni Banchero ang 10 ng kanyang 30 puntos sa huling 6 na minuto upang maging 3-2 ang Magic.

Mula sa 116-116 tabla ay rumatrat ng 10 sa 12 puntos ng Spurs si Wembanyama upang lumayo, 128-116, at inalagaan nila ito sa huling 1:36. Sa kanyang ika-5 laro sa NBA, nagtala ng bagong personal na marka na 38 puntos at 10 rebound si Wembanyama.

Maliban sa talo, nagluluksa ang Phoenix sa pagpanaw kahapon ni alamat Walter Davis sa edad na 69. Si Davis ang may pinakaraming puntos sa kasaysayan ng prangkisa na 15,666 mula 1977 hanggang 1988 at naglaro din siya sa Denver Nuggets at Portland Trail Blazers bago nagretiro noong 1992. Sa ibang laro, nanaig ang Philadelphia 76ers sa Toronto Raptors, 114-99. Sumabay din sa panalo ang New Orleans Pelicans sa Detroit Pistons, 125-116.