24 empleyado, COVID-19 positive, Navotas City Hall, naka-lockdown

ni Lolet Abania | February 24, 2021

Isinailalim sa 5-day lockdown ang Navotas City Hall matapos na 24 empleyado ang nagpositibo sa test sa COVID-19, sabi ni Mayor Toby Tiangco.

Bukod sa main city hall, ang Navotas City Hall Annex kabilang ang NavoServe at Franchising Permits Processing Unit ay sarado mula February 23, alas-8:01 ng gabi hanggang Linggo, February 28, alas-11:59 ng gabi.

Balik-operasyon ang city hall sa Lunes, March 1.

“Kaya namin isinara is for the safety of everyone, para ma-disinfect ang lahat ng offices. Holiday naman bukas kaya we took the opportunity, parang two days lang mawawalan ng trabaho pero ang epekto ay five consecutive days,” ani Tiangco sa isang interview.

Sa isang Facebook post, iniutos ni Tiangco sa mga infected na empleyado na mag-isolate at kailangan ding sumailalim sa swab test ang kanilang mga naging close contacts.

“Sumailalim din sa swab test ang lahat ng mga empleyado ng city hall, kahit hindi po sila close contact. Nagsagawa rin tayo ng general cleaning at disinfection tuwing 3PM-5PM,” sabi ni Tiangco.

Hiniling din ng alkalde sa Sangguniang Panglungsod na magpasa ng isang ordinansa para sa pagpapalawig ng deadline ng mga bayarin hanggang March 5, 2021 na walang kaukulang penalty at surcharge.

Ice plant ng ina ni Mayor Tiangco, pinananagot sa mga namatay sa ammonia leak

ni Ronalyn Seminiano Reonico | February 4, 2021

Sasagutin ng ice plant na pagmamay-ari ng pamilya ng ina ni Navotas City Mayor Toby Tiangco ang pagpapalibing at hospital treatment ng mga biktima ng ammonia leak incident na naganap noong Miyerkules sa Navotas.

Umakyat na sa dalawa ang bilang ng mga nasawi at marami ang nasa ospital pa dahil sa naturang insidente sa T.P. Marcelo Ice Plant and Cold Storage.

Pahayag ni Tiangco, "‘Yung hospital bill at saka burial cost ay dapat sagutin ng kumpanya because ang aksidente ay nanggaling po sa kumpanya.

“I have ordered the Navotas City government and Navotas City Hospital to make accounting of all expenses. Normally, we don’t do that. Even if a private company caused a damage, that is shouldered by the city government.

"In this case I will not allow the city government to spend a single centavo, so lahat ng nagastos ng city government d'yan, kailangang bayaran ng kumpanya out of delicadeza kasi nga kamag-anak ko 'yun."

Sisiguraduhin din umano ni Tiangco na bibigyan ng mga may-ari ng ice plant ng assistance ang mga biktima.

Saad ng alkalde, "Ako'y humihingi ng paumanhin du’n sa lahat ng naperhuwisyo. Kahit po ayan ay kumpanya ng nanay ko, kailangan po silang sumunod sa lahat ng regulasyon at sisiguraduhin po nating susunod sila."

Tinatayang aabot sa 50 residente ang isinugod sa Navotas City Hospital at nasa 20 naman ang dinala sa Tondo Medical Center na nakauwi na sa kani-kanyang tahanan. Dalawampung residente naman ang nananatiling under observation sa Philippine General Hospital.

Samantala, inaalam pa rin ng awtoridad ang sanhi ng insidente.

Saad pa ni Tiangco, “What we have to determine whether there was a leak or the tank exploded. I have to get that report from the Bureau of Fire Protection.

“If there are any national government agencies who want to investigate, I welcome you and I encourage you to be the one to investigate so it will be impartial.”

Inihain na rin ang closure order sa naturang planta.

Patay sa ammonia leak sa Navotas, 2 na

ni Ronalyn Seminiano Reonico | February 4, 2021

Umakyat na sa dalawa ang bilang ng mga nasawi sa ammonia leak incident sa ice plant sa Navotas City na naganap noong Miyerkules.

Ayon kay Chief of the City Disaster Risk Reduction and Management Office Vonne Villanueva, ang pangalawang biktima ng insidente ay isang electrician at residente ng Malabon City.

Narekober ang katawan nito ngayong Huwebes nang umaga. Saad ni Villanueva, "Bale ngayong umaga nga po, nakita natin 'yung katawan po ni Mr. Joselino Nazareno, siya po ay 54 years old, empleyado po ng T.P. Marcelo.

"Kagabi, noong pumasok kami rito, tiningnan namin 'yung impact site. Siya po ay nakita ngayong umaga, nakasiksik po sa gilid po na medyo malayo po, 20 metro ang layo mula roon sa impact site.

Siguro na rin po, dahil sa kondisyon noong mga panahon ngayon, dahil malakas pa ang amoy, hindi na-search nang masinsin.”