Ammonia leak at sunog sa Navotas, 1 patay, 24 naospital

ni Maeng Santos | June 21, 2023

Isang binatilyo na may comorbidities ang nasawi habang 24 iba pa ang naospital matapos makaranas ng hirap sa paghinga dahil sa pagtagas ng ammonia sa isang cold storage facility sa Navotas City, kamakalawa ng gabi.

Alas-10:50 ng Lunes ng gabi nang maganap ang insidente ng ammonia leak sa Icy Point Cold Storage sa Bgy. Northbay Boulevard North kaya agad na lumikas ang mga residenteng nakatira malapit sa lugar habang alas-12:06 naman ng hatinggabi nang sinundan ng pagsiklab ng sunog sa kalapit na mga kabahayan.

Agad rumesponde sa naturang lugar ang City DRRMO-Joint Rescue Team, BFP-Navotas, at mga fire volunteer para pagtulungan na mapigilan ang pagtagas ng ammonia at apulahin ang apoy.

Nagtungo rin sa lugar si Cong. Toby Tiangco, kasama si Vice Mayor Tito Sanchez at Chief NCDRRMO Vonne Villanueva para i-monitor ang insidente at magbigay ng tulong sa apektadong mga pamilya.

Ayon sa Navotas City Public Information Office, ala-1:42 ng Martes ng madaling-araw nang ma-secure ng joint rescue team ang control valve para tumigil ang pagtagas ng ammonia habang ala-1:57 ng madaling-araw nang idineklarang fireout ng BFP ang sunog.

Matapos nito, nag-uwian na sa kani-kanilang bahay ang mga residente habang isinugod naman ang 24 katao, kabilang ang 11 menor-de-edad sa Navotas City Hospital (NCH) at Tondo Medical Center (TMC).

Isinugod din sa MCU hospital ang 16-anyos na binatilyo subalit, namatay din ito kalaunan dahil sa kakapusan ng hininga dulot ng ammonia inhalation habang ayon sa huling ulat ay dalawang pasyente na lang ang nanatili sa NCH.

Iniutos naman ng Pamahalaang Lungsod ng Navotas sa pamumuno ni Mayor John Rey Tiangco ang pansamantalang pagsasara ng Icy Point Cold Storage habang nakabinbin ang imbestigasyon na isasagawa ng BFP-Navotas, City Health Office, Sanidad, City Environment & Natural Resources Office, at Business Permits and Licensing Office.

Nagtalaga rin ang pamahalaang lungsod ng mga health workers at naka-standby na ambulansya sa lugar para magbigay ng agarang pangangalagang medikal, kung kinakailangan.

Red Cross magsasagawa ng mobile vaccination sa mga bedridden sa Navotas

ni Jasmin Joy Evangelista | March 7, 2022

Nakatakdang magsagawa ng limang araw na mobile vaccination ang Red Cross para sa mga bedridden sa Navotas simula ngayong araw, March 7.

Layon ng programang ito na makapagbigay ng bakuna kontra- COVID-19 sa mga residente lalo na sa mga bedridden at sa mga nahihirapang umalis ng bahay.

Ito ay bukas sa lahat ng residente o empleyado ng Navotas.

Unang pupuntahan ng PRC vaccination bus ang Bagumbayan North, ang North Bay Blvd., North, at Bangkulasi Nuestro Senior sa Marso 8, NBBS Proper sa Marso 9, NBBS Dagat-Dagatan sa Marso 10, at NBBS Kaunlaran at San Rafael Village sa Marso 11.

Puwede ang walk in pero pinapayuhan na magpalista sa kanilang barangay o health center ang mga nais magpabakuna.

Ammonia, tumagas mula sa ice plant sa Navotas – BFP

ni Lolet Abania | December 18, 2021

Nagkaroon ng pagtagas ng ammonia sa isang ice plant sa North Bay Boulevard, Navotas City ngayong Sabado.

Batay sa inisyal na report, agad na rumesponde ang mga kawani ng Bureau of Fire Protection (BFP) ng lugar at naagapan ang pagtagas pa ng ammonia sa Magsimpan Ice Plant, sa Navotas City.

Ayon sa BFP, isang mechanical failure sa cooling system ng nasabing ice plant ang naging dahilan anila ng bahagyang ammonia leak.

Nakatakda naman ang cooling system nito na isailalim sa isang maintenance checkup ngayon buwan.

Inatasan na rin ng BFP ang pamunuan ng ice plant na magkaroon ng contingency plan para sa anumang beripikasyon.

Wala namang naiulat ang mga awtoridad na napinsala sa mga residente at crew ng ice plant dahil sa insidente.