55 M Pinoy, nakarehistro na sa national ID — PSA

ni Lolet Abania | February 10, 2022

Nasa tinatayang 55 milyong Pilipino na ang nakarehistro para sa National ID system ng bansa, ayon sa Philippine Statistics Authority (PSA).

“Meron na kaming nairehistro as of Feb. 4 na about 55 million na,” sabi ni PSA Assistant Secretary Rosalinda Bautista sa isang interview ngayong Huwebes.

Gayunman, batay sa latest data ng PSA ay nasa 6 milyon na mga Philippine Identification cards ang nai-release pa lang sa ngayon.

Ayon sa ahensiya, magkakaroon ng mga delays o pagkaantala sa delivery ng mga PhilID cards.

“’Yun po ngayon ang aming challenge. Right now, ang nakikita po namin na based du’n sa capacity ng PHLPost (Philippine Postal Corporation) ay minimum po ng 6 na buwan,” paliwanag ni Bautista, na isa ring deputy national statistician ng Philippine Identification System Registry Office.

Samantala, target ng PSA na makapagrehistro ng 90 milyong Pilipino para sa National ID system sa pagtatapos ng 2022.

Matatandaang noong Oktubre 2020, nagsimula ang 3-step PhilSys registration process ng national ID, kung saan prayoridad ang mga low-income households mula sa 32 mga lalawigan.

Ang Step 1 ay pagbibigay ng demographic information habang ang Step 2 ay pagba-validate ng mga supporting documents at pagkuha ng biometric information.

Ang huling step ay pag-iisyu na ng PhilSys Number at ang delivery ng PhilID cards.

2.2 M Pinoy, nakatanggap na ng national ID cards — PSA

ni Lolet Abania | October 14, 2021

Umabot na sa mahigit 2 milyon na national ID cards ang naipamahagi ng gobyerno sa ngayon, ayon sa Philippine Statistics Authority (PSA).

“Pagdating sa nakatanggap na ng ID, ang report ng PHLPost (Philippine Postal Corporation) as of September 30 ay meron ng 2.2 million Filipinos na nakatanggap na ng PhilID,” ani PSA Assistant Secretary Rosalinda Bautista sa Laging Handa briefing ngayong Huwebes.

Nasa 43.2 milyong Pilipino naman ang nakapag-register para sa national ID system (Step 1).

Ibig sabihin nito na ang isang indibidwal ay dumaan na o nag-register online via register.philsys.gov.ph at napunan ang online application form na naglalaman ng personal na impormasyon nito gaya ng full name, address, petsa ng kapanganakan at iba pa.

Ayon pa kay Bautista, para naman sa Step 2 o ang capturing ng biometric information, gayundin ang beripikasyon ng mga personal details ng mga indibidwal na unang ibinigay via online registration o Step 1, umabot na sa 34.99 milyong Pilipino ang nakumpleto na ang proseso at naghihintay na lamang na mai-release ang kanilang national ID cards.

Target ng gobyerno na makapag-enlist ng tinatayang 50 milyong Pilipino para sa national ID bago matapos ang taon, kung saan ayon sa National Economic and Development Authority, ito ay kinakailangan para epektibong ma-identify ang benepisyaryo sa social protection programs at mapalawak ang paggamit ng electronic payments na magpapaangat sa digital economy ng bansa.

1.7 M Pinoy may national ID cards na — PSA

ni Lolet Abania | September 15, 2021

Umabot na sa 1.7 milyong national ID cards ang naipamahagi ng gobyerno sa mga Pilipino, ayon sa Philippine Statistics Authority (PSA) ngayong Miyerkules.

Sa Laging Handa press briefing, sinabi ni PSA Assistant Secretary Rosalinda Bautista na ang naturang datos ay nai-record ng ahensiya hanggang nitong Setyembre 10.

Ayon pa sa PSA, nasa 42 milyong Pilipino ang nakapag-register na para makakuha ng national ID. Kapag registered na ibig sabihin nito, ang isang indibidwal ay rehistrado na online via register.philsys.gov.ph at napunan o naibigay na sa online application form ang kailangang personal na impormasyon gaya ng buong pangalan, address, petsa ng kapanganakan, at iba pa.

Matapos naman ang online registration o ang Step 1, ang isang aplikante ay makatatanggap ng text message at email mula sa PSA ng kanyang appointment schedule para sa capturing o pagkuha ng biometric information gaya ng iris scans, fingerprint scans, at front-facing photograph, gayundin ang beripikasyon ng personal na detalye ng indibidwal na unang ginawa sa pamamagitan ng online registration o Step 2.

Lahat ng nag-a-apply para sa national ID ay bibigyan ng pagkakataon na magbukas ng kanilang bank account sa Landbank na pinamamahalaan ng gobyerno. Sinabi naman ni Bautista na dahil sa national ID program, nakapagbigay ito ng pagkakataon sa 5 milyong Pilipino na makapagbukas ng Landbank account.

Samantala, target ng gobyerno na makapagtala ng tinatayang 50 milyong Pinoy para sa national ID bago matapos ang taon na ayon sa National Economic Development Authority ay kinakailangan upang epektibong matukoy ang mga benepisyaryo para sa social protection programs at mas lumawak pa ang paggamit ng electronic payments habang mapapaunlad nito ang digital economy ng bansa.