Isumbong sa BSP.. P500K multa sa bangko na 'di tumatanggap ng National ID

ni Mylene Alfonso | May 28, 2023

Umapela si Sen. Win Gatchalian sa Bangko Sentral ng Pilipinas (BSP) na paalalahanan ang mga bangko na ang Republic Act 11055 o ang Philippine Identification System Act ay nag-uutos sa kanila na tanggapin o kilalanin ang national ID bilang sapat na patunay ng pagkakakilanlan ng taong gumagawa ng transaksyon.

Sinumang tumanggi, aniya, ay pagmumultahin ng P500,000.

Ginawa ni Gatchalian ang panawagan sa gitna ng patuloy na mga reklamo na ang ilang bangko ay tumatangging kilalanin ang national ID bilang patunay ng pagkakakilanlan dahil ang card mismo ay walang pirma ng may-ari nito.

Ayon sa senador, malinaw sa Memorandum No. M-2021-057 na ang hindi pagsama ng isang sulat-kamay na lagda bilang bahagi ng Philippine identification (PhilID) ay sinadya at kahalintulad ng national ID system sa ibang bansa tulad ng India, Singapore, Malaysia, Thailand, Vietnam, at iba pa. Layon nitong isulong ang mas higit na seguridad sa mga transaksyon sa pamamagitan ng mas malakas na paraan ng pag-verify at mas mababang panganib ng pamemeke.

Ang pagpapatunay ng pagkakakilanlan ay ginagawa sa pamamagitan ng PhilID physical security features, QR code digital verification, biometric verification, at SMS one-time password (OTP).

"Hindi na kailangan ng ibang valid ID kung ang national ID lang ang dala-dala," sabi ni Gatchalian, na binibigyang-diin na ang national ID ay isang opisyal at sapat na patunay ng pagkakakilanlan.

Hinikayat din ni Gatchalian ang publiko na isumbong sa BSP ang mga bangkong hindi tumanggap ng national ID para sa kanilang bank transactions.

National IDs, ire-release na ng administrasyong Marcos

ni Lolet Abania | June 21, 2022

Target ng administrasyong Marcos na makapag-isyu na ng mga national IDs sa mga mamamayan bago matapos ang taon, ayon kay incoming Socioeconomic Planning Secretary at National Economic and Development Authority (NEDA) chief Arsenio Balisacan ngayong Martes.

“Hopefully we can get most of these IDs either in physical form or in electronic form already available before the end of the year and that's the instruction of the President,” pahayag ni Balisacan sa CNN Philippines.

Batay sa impormasyon mula sa Philippine Statistics Authority (PSA), sinabi ni Balisacan na 92 milyong Pilipino ang eligible na makatanggap ng mga national IDs, habang giit niya, “[the incoming administration] intends to cover those before the end of the year.”

Bukod sa PSA, sinabi ni Balisacan na ang bagong administrasyon ay makikipag-ugnayan din sa Bangko Sentral ng Pilipinas (BSP) para sa pagre-release ng mga IDs. Ayon sa PSA, mahigit sa 10 milyong Philippine Identification (PhilID) cards ang nai-deliver na nationwide hanggang nitong Abril 30, 2022.

Inatasan naman ng PSA ang mga field offices upang mag-assist sa pagde-deliver ng PhilIDs sa mga registrants na matatagpuan sa mga remote areas sa buong bansa.

Binanggit din ni Balisacan ang naging pahayag ni President-elect Ferdinand “Bongbong” Marcos Jr. na ang mga national IDs ay makatutulong para matiyak ang agarang distribusyon ng assistance o ayuda sa mga mahihirap at vulnerable sectors sa gitna ng patuloy na pagtaas ng presyo ng mga bilihin.

“Yes as I said earlier, we are ramping up the implementation of our National ID system and also the digitalization in the government and with respect to the ID system, we believe that we can reduce substantially the leakage so that we can reach more people, more deserving people from the limited resources,” sabi ni Balisacan.

Para sa private at gov’t transactions.. National ID, institusyonal na ang pagtanggap — P-Du30

ni Lolet Abania | February 16, 2022

Nilagdaan ni Pangulong Rodrigo Duterte ang isang executive order para gawing institutionalize o institusyonal na ang pagtanggap ng Philippine Identification System (PhilSys) ID o National ID bilang “sufficient proof” o sapat na katibayan ng pagkakilanlan at edad sa lahat ng pribado at mga transaksyon sa gobyerno.

Sa ilalim ng Executive Order 162 ni Pangulong Duterte nakasaad na ang PhilSys, “shall be the government’s central identification platform for all citizens and resident aliens of the country.”

“An individual’s record in the PhilSys shall be considered as sufficient proof of identity and age in all public and private transactions,” pagdidiin ng Punong Ehekutibo.

Ayon sa Pangulo ito ay kinakailangan, “to improve efficiency in the delivery of social services, strengthen financial inclusion and promote ease of doing business.”

Ang mga government transactions kung saan maaaring magamit ang national ID, kabilang na ang aplikasyon para sa marriage license, student driver’s permit, enrollment ng mga estudyante, at voter’s registration, at iba pa.

Ipinag-utos din ni Pangulong Duterte sa mga pribadong establisimyento na ipaalam sa publiko ang mga guidelines sa paggamit ng national ID o mga pagbabago sa mga identification requirements.

Tinatayang nasa 55 milyong Pilipino mula sa 109 milyong indibidwal ang naka-registered na sa ilalim ng national ID system.

Habang mayroong 6 milyong ID cards ang kanila nang nai-release sa ngayon, ayon sa Philippine Statistics Authority (PSA) nitong Huwebes.