ni Mylene Alfonso @News | September 26, 2023
![](https://static.wixstatic.com/media/2551ae_60bd2fdf60a34189a004394baddd51b2~mv2.jpg/v1/fill/w_118,h_71,al_c,q_80,usm_0.66_1.00_0.01,blur_2,enc_auto/2551ae_60bd2fdf60a34189a004394baddd51b2~mv2.jpg)
Inirekomenda ni Sen. Ronald “Bato” Dela Rosa ang pagpapatigil sa pag-imprenta ng national ID o Philippine Identification (PhilID) card.
Sa pagdinig ng budget ng National Economic and Development Authority, iminungkahi ni Finance Committee Vice Chairman Dela Rosa na ihinto na ng Philippine Statistics Authority ang pag-imprenta upang makatipid.
"Siguro puwede natin i-stop ‘yun then we’ll go digital. Maka-save pa ng pera ang gobyerno. Lahat naman ng Pilipino, may cellphone. Maka-save pa tayo ng pera kung hindi natin i-print ang remaining," diin ni Dela Rosa.
Bagama't tinitignan din ng PSA ang paglilipat sa mga digital ID, ipinunto ni National Statistician Undersecretary Claire Dennis Mapa na mas gusto pa rin ng mga Pilipino na magkaroon ng nahahawakang ID card.
Sa panukalang 2024 National Expenditure Program ng NEDA, P8.94 bilyon o 73% ng budget ng NEDA ang inilalaan sa PSA bilang attached agency nito. Nasa P1.61 bilyon ang nakalaan sa Philippine Identification System dahil layunin ng PSA na mairehistro sa kanilang system ang kabuuang 101M Pilipino sa susunod na taon.
Nabatid na target ng PSA na makapag-imprenta ng 92 milyong PhilID sa Setyembre 2024.