P6.8 milyon ng shabu, nasabat sa 2 tulak sa Lanao del Norte

ni Mary Gutierrez Almirañez | March 14, 2021

Nagsanib-puwersa ang Philippine Drug Enforcement Agency-Northern Mindanao, National Bureau of Investigation (NBI) at mga pulis sa isinagawang buy-bust operations sa bayan ng Pantar, Lanao del Norte kung saan nasabat ang mahigit P6.8 milyong halaga ng shabu mula sa dalawang tulak kaninang umaga, Marso 14.

Ayon sa ulat, ang suspek ay isang lalaki na hinihinalang internally-displaced person mula sa Marawi siege at isang 21-anyos na babaeng estudyante.

Kilala umano ang mga ito bilang batikan sa pagbebenta ng droga sa nasabing lugar.

Kaugnay nito, nasabat din ang 10 gramo ng shabu na nagkakahalaga ng P68,000 sa hiwalay na operasyon sa Barangay Hinaplonan sa Iligan City kung saan anim ang inaresto. Kasong paglabag sa Comprehensive Dangerous Drugs Act of 2002 ang haharapin ng mga suspek.

Ex-NBI Chief Gierran, palit kay Morales sa PhilHealth

ni Lolet Abania | August 31, 2020

Itinalaga na ni Pangulong Rodrigo Duterte si dating National Bureau of Investigation (NBI) Chief Dante Gierran na maging bagong presidente at chief executive officer ng Philippine Health Insurance Corporation (PhilHealth).

Ito ang kinumpirma ni Health Secretary Francisco Duque III ngayong araw. Papalitan ni Gierran si dating PhilHealth Chief at Retired General Ricardo Morales na nagbitiw sa puwesto noong August 26.

Pinagpahinga ni Pangulong Duterte si Morales sa trabaho dahil sa kondisyon ng kalusugan nito na nakikipaglaban sa cancer. Samantala, kareretiro lamang ni Gierran sa posisyon nito sa NBI noong Pebrero matapos na umabot sa mandatory retirement sa edad na 65.

Gayunman, ang pagseserbisyo ni Gierran sa NBI ay hindi nagtapos na walang kontrobersiya, dahil tulad ni Edgar Matobato, isang self-confessed na dating miyembro ng Davao Death Squad, iniuugnay ang opisyal sa pagpatay umano sa isang lalaki noong 2007 sa pamamagitan ng pagpapakain sa mga buwaya.

Subalit, mariin itong itinanggi ni Gierran.