NANCY BINAY | Bulgar Online 42/125

Philippine Salt Industry Development Act, pasado na

BULGAR

ni Nancy Binay @Be Nice Tayo | September 14, 2023

Malapit nang maisabatas ang isang panukala na naglalayong palaguin ang industriya ng asin sa bansa.

Ito ay pagkatapos ipasa sa third and final reading ng Senado ang Senate Bill No. 2243 o ang Philippine Salt Industry Development Act. Isa tayo sa principal author ng panukalang ito.

☻☻☻

Layunin ng batas na ito na lumikha ng Philippine Salt Industry Development Roadmap (PSIDR) at ang inter-agency Philippine Salt Industry Development Council na magpapatupad ng mga programa para sa pag-unlad at pangangasiwa ng Philippine salt industry.

Maglalatag ang Roadmap ng short-, medium-, at long-term development plan para mapalaki ang produksyon ng asin, paramihin ang mga salt-producing area, at sa kalaunan ay gawing net exporter ng asin ang bansa.

☻☻☻

Ayon sa mga eksperto, inaangkat ng Pilipinas ang 90% ng pangangailangan nito sa asin — isang nakalulungkot na kabalintunaan dahil isa tayo sa may pinakamahabang coastline sa buong mundo.

Nasa 550,000 metric tons ng asin ang inaangkat natin, kaya malaking katipiran para sa bansa kung kaya nating palakasin ang produksyon ng asin.

Tinataya ring nasa 100,000 trabaho ang malilikha sa mga kanayunan sa pagpapaunlad ng industriya ng asin.

☻☻☻

Pirma na lang ni Pangulong Ferdinand Marcos, Jr. ang kailangan upang lubos na maging batas ang Philippine Salt Industry Development bill, sapagkat naipasa na rin ng House of Representatives ang bersyon nila ng panukala.

Ngunit unang hakbang pa lang ang pagkakaroon ng batas.

Marami pa tayong kailangang gawin upang muling mabuhay ang salt industry, kasama na ang pagsiguro na maayos na ipapatupad ang mga probisyon ng batas.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang halaga ang kalusugan, at huwag kalilimutang magdasal. Malalagpasan din natin ito.

Be Safe. Be Well. Be Nice!

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US! Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Industriya ng kawayan payabungin, suportahan

BULGAR

ni Nancy Binay @Be Nice Tayo | September 10, 2023

Ipinagdiriwang natin tuwing Setyembre ng bawat taon ang Philippine Bamboo Month batay sa Proclamation No. 1401 na nilagdaan ni dating Pangulong Rodrigo Duterte.

Ayon sa proklamasyon na ito, pamumunuan ng Philippine Bamboo Industry Development Council (PBIDC) ang pagdiriwang ng Philippine Bamboo Month at tukuyin ang mga programa, proyekto, at aktibidad para sa taunang pagdiriwang nito.

Sa mga hindi nakakaalam, ang PBIDC ay nilikha noong 2010 sa bisa ng Executive Order No. 879 upang isulong ang pagbuo ng mga produktong kawayan kasama na rin ang pagpapayabong ng access nito sa merkado upang mapanatili at mapalakas ang industriya ng kawayan sa bansa.

Bukod sa PBIDC, hinihimok ang lahat ng iba pang ahensya at instrumentalidad ng pambansang pamahalaan, kabilang ang mga korporasyong pag-aari o kontrolado ng pamahalaan at mga unibersidad at kolehiyo ng estado na suportahan ang pagdiriwang na ito.

☻☻☻

Napapanahon ang pagdiriwang na ito dahil malaki ang maaaring maging ambag ng kawayan sa paglago ng ating ekonomiya pati na rin sa paglaban sa mga masasamang epekto ng climate change at ang unti-unting pag-ubos ng ating likas na yaman.

Sa isang pagdinig sa Senado, sinabi ni Department of Trade and Industry (DTI) Regional Director Leah Ocampo na inaasahang tataas sa $88.43 bilyon ang bamboo market value sa taong 2030.

Ito na rin ang isa sa mga dahilan kung bakit kasama ang industriya ng kawayan sa mga right priority industry clusters ng DTI.

Ayon sa tala ng DTI as of 2022, nagtala ang bamboo industry ng P89.2 milyon na investment at P143 milyon naman sa domestic sales.

Nakatulong din ang industriya na ito para makalikha ng 10,898 na trabaho, 5,012 micro, small and medium industries, at 92 community-based enterprises.

Isa ang kawayan sa mga halaman na likas at saganang matatagpuan sa ating bansa.

Marami sa ating mga kalapit bansa ang nauna nang nag-invest sa industriyang ito at napapanahon na para magkaroon din tayo ng isang national program na pagyayabungin ang industriya ng kawayan sa bansa.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

Bentahan ng fake meds online, kalat na

BULGAR

ni Nancy Binay @Be Nice Tayo | September 7, 2023

Malaki talaga ang problema natin pagdating sa ilegal at pekeng gamot.

Sa ngayon, tinatalakay natin dito sa Senado ang online component ng illegal transactions dahil nga maraming fake at illegal health & wellness products ang ibinebenta sa internet.

Nakakalungkot din dahil mga kilalang celebrities ang endorsers kaya maraming naeengganyo.

Nakababahala na ang paglipana nito, lalo pa’t marami rin tayong nababalitaan na ibinebentang mga beauty and wellness products na walang approval ng Food and Drug Administration, na madaling bilhin online at sa multi-level groups kahit walang prescription mula sa mga doktor.

☻☻☻

Nangako ang FDA na palalakasin pa lalo ang crackdown nila sa mga unregistered na produkto at counterfeit na gamot.

Maglulunsad daw ito ng “Oplan Katharos,” kasama ang National Bureau of Investigation at Criminal Investigation and Detection Group ng Philippine National Police bilang pagtugon sa problemang ito.

Mahalagang mabigyan ng karampatang suporta ang programang ito upang maprotektahan ang ating mga kababayan sa banta ng mga pekeng gamot.

Kung seryoso talaga tayong masugpo ang illegal at organized criminal activities, siguro naman mas tama nating gamitin ang intel funds dito — para matukoy natin ang mga network at source ng mga ilegal na produktong ito.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

. .

Philippine Salt Industry Development Act, pasado na

Industriya ng kawayan payabungin, suportahan

Bentahan ng fake meds online, kalat na

RECOMMENDED