Terminal 4 ng NAIA, balik-operasyon na — MIAA

ni Lolet Abania | March 28, 2022

Binuksan na ulit ang Terminal 4 ng Ninoy Aquino International Airport (NAIA) matapos ang halos dalawang taon na isinara ito sanhi ng pandemya ng COVID-19 ngayong Lunes, ayon sa Manila International Airport Authority (MIAA).

Dahil sa limitado ang mga flights noong mga nakaraang taon kasabay ng pagpapatupad ng mga travel restrictions, ipinatigil naman ang operasyon ng Terminal 4 ng NAIA.

Subalit nang lumuwag ang mga restriksyon habang isinailalim na rin sa Alert Level 1 ang National Capital Region (NCR), muling nag-operate ang naturang terminal, kung saan napuno ito ng mga biyahero ngayong araw.

“’Yung T3 (Terminal 3) po ay napupuno dahil lahat ng mga domestic flight ay nanggagaling dito bago natin isinarado, ay inilipat natin sa T3,” pahayag ng general manager ng MIAA na si Ed Monreal.

Gayunman, kahit na isinara ang Terminal 4 sa mga flights operation, nagamit naman ito bilang COVID-19 vaccination site.

Flights ng NAIA, suspended dahil sa Bagyong Rolly

ni Lolet Abania | November 1, 2020

Suspendido ang lahat ng uri ng flight operations sa Ninoy Aquino International Airport (NAIA) mula alas-10 ng umaga ng November 1 hanggang alas-10 ng umaga ng November 2, ayon sa Manila International Airport Authority (MIAA).

Itinigil ang operasyon ng mga flights dahil sa banta ng Bagyong Rolly, na inaasahang matinding tatama sa Metro Manila ngayong Linggo hanggang bukas nang umaga ng Lunes.

Inabisuhan na rin ng MIAA ang mga air travelers na isasara ang NAIA Terminals at lahat ng pasahero ay hindi na dapat pang pumunta sa NAIA.

Gayundin, pinapayuhan ang mga pasahero na agad makipag-ugnayan sa kanilang airlines para maisaayos ang kanilang bagong flight schedule. Bibigyang prayoridad ang mga travellers na may scheduled flights subali’t na-postpone kapag nagbukas na ang NAIA sa November 2.

Ang mga apektadong biyahe ng 24-oras na pagsasara nito ang paglalaanan ng slot upang hindi gaanong maantala ang travel plans ng mga pasahero.

Samantala, ang flag carrier na Philippine Airlines (PAL) at ang budget carrier na Cebu Pacific ay nagkansela na rin ng kanilang international at domestic flights dahil sa Bagyong Rolly.