Libreng sakay sa MRT3, extended hanggang Mayo 30 – DOTr

ni Lolet Abania | April 27, 2022

Inianunsiyo ng Department of Transportation (DOTr) ngayong Miyerkules ang pagpapalawig pa nang isa buwan para sa libreng sakay ng Metro Rail Transit Line 3 (MRT3).

Sa isang advisory, ayon sa DOTr, ang mga pasahero ay patuloy na maseserbisyuhan ng free rides ng MRT3 line hanggang Mayo 30, 2022, kung saan ang operating hours ay mula alas-4:40 ng madaling-araw hanggang alas-10:00 ng gabi.

Inisyal na ipinatupad ang libreng sakay noong Marso 28 hanggang Abril 30, bilang selebrasyon ng pagkumpleto ng rehabilitasyon ng MRT3 at para mapagaan ang nararanasang hirap ng mga commuters sa gitna ng pagtaas ng presyo ng langis, at lalo na sa maraming empleyado na nagbalik sa kanilang opisina at pinagtatrabahuhan.

“To continue providing assistance to the riding public in their commuting needs, the MRT3 Management and the DOTr have decided to extend for another month the implementation of the FREE RIDE or ‘LIBRENG SAKAY’ program in MRT3,” pahayag ng DOTr.

Batay sa ahensiya, hanggang nitong Abril 26, may kabuuang 7,227,434 pasahero na ang nakinabang mula sa MRT3 free ride program.

Ayon kay DOTr Secretary Arthur Tugade, umaasa sila na ang pag-extend ng free ride program ay patuloy na magpapagaan sa pinansiyal na pasanin ng mga commuters sa gitna ng isyu sa inflation at pagtaas ng langis dahil mas maraming manggagawa na rin ang nagbalik sa kanilang on-site work.

“Gumanda at nagbago ang ridership ng MRT3. Bago magpandemya, 260,000. At bagama’t may pandemya, ‘yung ridership ay umaabot sa 280,000. At ngayon, nasa 300,000 na ang naisasakay ng MRT3 at naihahatid nang ligtas, kumportable, at walang aberya. Napapanahon na i-extend pa natin ang LIBRENG SAKAY sa MRT3 upang mas maraming Pilipino ang makinabang,” sabi ni Tugade.

MRT-3: Mas malamig at mas mabilis na tren para sa mga pasahero sa unang araw ng libreng sakay

ni Jasmin Joy Evangelista | March 28, 2022

Mas malamig at mas mabilis na tren ang mararanasan ng mga commuter sa unang araw ng libreng sakay sa Metro Rail Transit Line 3 (MRT-3) ngayong Lunes, March 28.

Nauna nang inanunsiyo ni Pangulong Rodrigo Duterte ang month-long na libreng sakay sa inagurasyon ng MRT-3 rehabilitation project.

“Today, passengers enjoy cooler, aside from faster MRT-3 rides as all train cars have also been installed with new and 100% functioning air conditioning units,” ayon sa pahayag ng MRT-3 management.

“The FREE RIDE program of MRT-3 is launched with this objective of showcasing the improved services of the rail line, in order to gain back the public confidence in our mass transportation system,” dagdag nito.

Magtatagal ang libreng sakay hanggang April 30, na naglalayong makabawas sa gastusin sa mga pasahero sa gitna ng pagtaas ng presyo ng petrolyo at mga pangunahing bilihin.

Samantala, idineploy na ng MRT-3 ang kauna-unahang four-car train set nito na kayang magsakay hanggang 1,576 na pasahero, ngayong Lunes.

Libreng sakay sa MRT3 mula Marso 28 hanggang Abril 30 — P-Du30

ni Lolet Abania | March 22, 2022

Libre ang sakay sa Metro Rail Transit Line 3 (MRT-3) mula sa Marso 28 hanggang Abril 30, 2022, ayon kay Pangulong Rodrigo Duterte ngayong Martes.

“I’d like to announce, (Department of Transportation) Secretary Art Tugade and I, we decided that the MRT-3 rides will be free from March 28 to April 30, 2022,” pahayag ni Pangulong Duterte sa ginanap na seremonya para sa completion ng MRT-3 Rehabilitation Project na pinondohan ng gobyerno ng Pilipinas at ng Japan International Cooperation Agency.

Magdiriwang naman si Pangulong Duterte ng kanyang kaarawan sa Marso 28. Ang MRT-3 ay tumatakbo mula North Avenue sa Quezon City hanggang Taft Avenue sa Pasay City.

“I am pleased to join you today for the timely rehabilitation completion ceremony of the MRT-3. It is proof that we are keeping our momentum in improving our national road system, which aims to deliver quality service to the Filipino people, and respond to the emergence of the new normal,” ani P-Duterte.

Pinasalamatan din ng Pangulo ang Japanese government sa kanilang ibinigay na assistance para sa proyekto. “Our train system would not have returned to its original high grade design condition without the technical competencies and professional aid of our service providers from Sumitomo Corp. and Mitsubishi Heavy Industries,” saad ng Punong Ehekutibo.

“With the joint efforts of these companies and the DOTr, we’ve increased our train speed from 25 km/ hour to 60[km]/hour, while the time interval between train arrivals has improved to 8 to 10 minutes,” sabi ng Pangulo.

Mula sa 12 hanggang 15 operating train units kada araw, ayon kay Pangulong Duterte mayroon nang 18 hanggang 22 train units na available sa ngayon. “This progress will decrease, if not altogether, stop the number of unloading incidents in our stations,” dagdag pa niya.

Kabilang din sa nakumpletong rehabilitation project ay ang upgraded signaling, communications at CCTV systems, repair ng lahat ng station escalators at elevators, at ang matagumpay na instalasyon ng air conditioning units sa loob ng mga tren.