Libreng sakay sa MRT3, extended hanggang Hunyo 30 — DOTr

ni Lolet Abania | May 25, 2022

Inanunsiyo ng Department of Transportation (DOTr) ang pagpapalawig ng isa pang buwan ng libreng sakay sa Metro Rail Transit Line 3 (MRT3) ngayong Miyerkules.

Sa isang virtual press briefing, sinabi ni MRT3 general manager Mike Capati na ang mga pasahero ng railway line ay patuloy na masisiyahan dahil sa serbisyong free rides na hanggang Hunyo 30, anumang oras ng kanilang operating hours mula alas-4:40 ng umaga hanggang alas-10:10 ng gabi.

Matatandaang unang ipinatupad ang libreng sakay noong Marso 28 hanggang Abril 30 kasabay ng selebrasyon ng pagkumpleto ng rehabilitasyon ng MRT3. Na-extend pa ito hanggang katapusan naman ng Mayo upang makatulong na mabawasan ang financial burden ng mga commuters sa gitna ng pagtaas ng presyo ng petrolyo.

Ang pagpapalawig ng free rides ng MRT3 ayon kay Capati, “aims to continue helping commuters ease their financial burden amid inflation and rising fuel prices.” “This will allow the MRT3 to further test its capacity and performance in accommodating up to or more than 350,000 passengers,” saad pa niya.

Binanggit naman ni Capati na nakapag-record ang railway line ng 15,730,872 total ridership mula Marso 28 hanggang Mayo 24, na may average weekly ridership na 315,334. Nai-record din ng MRT3, ang kanilang pinakamataas na ridership na umabot sa 351,592 noong Mayo 20.

Ayon pa kay Capati, naka-set na ang four-car CKD trains na kayang mag-accommodate ng hanggang 1,576 pasahero na kanilang ide-deploy para madagdagan ang kapasidad nito, kumpara sa karaniwang three-car train sets lamang.

Mga bagon ng MRT-3, muling nadagdagan

ni Zel Fernandez | May 6, 2022

Umabot na sa 52 bagong overhaul na mga bagon ang magagamit sa linya ng MRT-3, matapos makapag-deploy muli ng isa pa nitong unang linggo ng Mayo.

Kasunod nito ay 20 na lamang umano sa kabuuang 72 bagon ang nakatakdang i-overhaul ng MRT-3, kung saan pinapalitan ng mga bagong piyesa ang mga depektibong components ng mga tren.

Gayundin, ang mga air conditioning system sa lahat ng mga bagon ng MRT-3 ay napalitan na ng mga bagong units.

Sa kasalukuyan, tinatayang nasa 21 CKD train sets na binubuo ng 18 three-car train sets at tatlong four-car train sets na ang kayang mapatakbo ng MRT-3.

Libreng Sakay ng MRT-3, higit 8 milyong pasahero na ang naserbisyuhan

ni Zel Fernandez | May 2, 2022

Batay sa datos, umabot na umano sa 8,472,637 pasahero ang naserbisyuhan ng Libreng Sakay ng MRT-3 mula Marso 28 hanggang Abril 30 ngayong taon.

Sa kasalukuyang tala ng Department of Transportation (DOTr), sa pagitan ng mga nabanggit na petsa ay tinatayang nasa average na 309,013 mga pasahero ang nakikinabang sa free ride program ng MRT-3 mula Lunes hanggang Biyernes.

Kaugnay nito, sinasabing tumaas ang bilang ng mga mananakay ng MRT-3 nang 27.8% mula sa 241,800 na naitalang weekly average mula noong Marso 1-27, 2022 bago inilunsad ang programang Libreng Sakay ng MRT-3.

Gayundin, naitala naman umano ang pinakamataas na single-day ridership na umabot sa 335,993 pasahero noong Abril 8.

Samantala, matatandaang nag-anunsiyo na ang DOTr noong nakaraang Miyerkules, na pinahaba pa ng gobyerno ang free-ride program ng Metro Rail Transit Line 3 (MRT-3) na tuluy-tuloy pang mapapakinabangan ng mga pasahero hanggang Mayo 30.