Taas-pasahe sa LRT at MRT, ‘di tuloy

ni Mylene Alfonso | April 12, 2023

Ipinagpaliban ni Pangulong Ferdinand Marcos, Jr., ang pagpapatupad sa pagtaas ng pamasahe para sa Light Rail Transit (LRT) lines 1 at 2.

Ito ang inanunsyo ng Department of Transportation (DOTr) makaraang aprubahan ng ahensya ang fare hike sa LRT 1 at 2.

Base aniya sa direktiba ni Pangulong Marcos, pag-aralan muna ang magiging epekto sa mga pasahero bago ipatupad ang taas-pasahe.

“In compliance with the President’s instruction, we will thoroughly study how a fare hike today will impact on passengers of our three rail lines in Metro Manila,” pahayag ni

Bautista sa press briefing sa Malacañang matapos ang isinagawang pulong kasama ang

Pangulo at ibang miyembro ng gabinete.

Sinabi ni Bautista na magtataas sana ng boarding fee ng P2.29 at 21 centavos para sa bawat kilometro ang inaprubahang rate.

Bukod dito, ipinagpaliban din aniya ang petisyon sa pagtaas ng pamasahe para sa MRT-3 dahil hindi umano nakasunod sa mga requirements at procedure.

Idinagdag ni Bautista na gagamitin sana ang malilikom na pondo para sa technical capability, services at facilities ang dalawang linya ng tren.

Dagdag-pasahe ng MRT-LRT, aprub sa SC

ni Madel Moratillo | April 2, 2023

Pinagtibay ng Supreme Court (SC) ang pagtataas ng pasahe ng Light Rail Transit (LRT) at Metro Rail Transit (MRT) lines noong 2014.

Ayon sa SC, nakasunod sa notice at hearing requirements ang noo’y Department of Transportation and Communication bago ipinatupad ang fare adjustment taliwas sa iginigiit ng petitioners.

Ang Notice of Public Consultation ay nai-publish umano noong Enero 20 at 27, 2011 sa dalawang pahayagan.

Habang noong Pebrero 4 at 5, 2011, naman isinagawa ang public consultations.

Noong 2013, muling nag-publish ang DOTC ng bagong notice para sa public consultation na itinakda noong Disyembre 12, 2013.

Para sa Korte Suprema, resonable rin ang fare hike na ipinatupad noong Disyembre 20, 2014.

Kinikilala rin ng SC ang rate-fixing power ng DOTC para magtaas ng pasahe sa MRT-3, LRT-1, at LRT-2 na ibinigay ng Kongreso.

Lalaki, nag-bomb joke sa MRT, arestado

ni BRT | March 24, 2023

Isang 25-anyos na lalaki ang inaresto matapos mag-bomb joke sa MRT Shaw Boulevard Station sa Mandaluyong.

Inireklamo ang lalaki ng MRT matapos umanong magbiro na may bomba ang kanyang kasama kaya hindi sila makausad sa pila papasok ng istasyon ng tren.

Sa bisa ng Presidential Decree No. 1727 o Anti-Bomb Joke Law, bawal ang mga naturang biro sa mga pampublikong lugar gaya ng mga airport, pier, at istasyon ng bus at tren dahil maaari itong pagmulan ng kaguluhan.

Ang parusa sa nasabing biro ay pagkakakulong umanong aabot sa 5 taon at multa na hindi hihigit sa P40,000.

Aminado umano ang lalaki sa kanyang nagawa.