Matapos masunog ang train coach... MRT 3, balik-operasyon na

ni Lolet Abania | October 10, 2021

Balik na ang operasyon ng Metro Rail Transit-Line 3 (MRT3) ngayong Linggo ng umaga matapos ang naganap na sunog sa isang istasyon nito, kagabi.

“The MRT-3 resumed its full operations today, with 17 trains running, from North Avenue station to Taft Avenue station (both bounds),” pahayag sa Twitter ng pamunuan ng MRT3 pasado alas-6:00 ng umaga ngayong araw.

Tatlong babae ang nasugatan matapos na sumiklab ang apoy mula sa isang train coach sa may Guadalupe station sa EDSA nitong Sabado ng gabi.

Ayon sa MRT 3 management, nagsimula ang sunog bandang alas-9:12 ng gabi habang naapula ang apoy ng alas-9:51 ng gabi.

Pahayag pa ng MRT3, “The women sustained bruises in their legs after jumping off the train to the mainline tracks.”

Agad namang nilimitahan ang biyahe nitong Sabado na mula North Avenue hanggang Shaw Boulevard lamang dahil sa insidente.

Gayunman, alas- 9:30 ng umaga ngayong Linggo, 18 trains ang nag-o-operate na sa buong linya nito.

Foreigner, hubo’t hubad na nagtatakbo sa riles ng MRT-3, arestado

ni Lolet Abania | August 12, 2021

Isang dayuhang lalaki ang inaresto ng mga awtoridad matapos na maghubo’t hubad at bumaba ng platform saka nagtatakbo sa riles ng MRT-3 ngayong Huwebes nang umaga.

Ayon kay Assistant Secretary Eymard Eje, OIC General Manager ng MRT-3, alas-5:35 ng umaga habang nag-iinspeksiyon ang mga security personnel sa mga pasahero ng MRT-3 sa Boni Station, kabilang na ang foreigner, bigla itong naghubad at tumalon pababa ng platform saka nagtatakbo sa riles patungo sa Shaw Boulevard Station.

Agad na hinabol ng apat na security staff ng Boni Station ang dayuhang lalaki at itinimbre na rin sa mga security personnel sa Shaw Boulevard Station.

Alas-5:42 ng umaga nakorner at nahuli ang foreigner saka ibinalik sa Boni Station para sa karagdagang imbestigasyon.

Dinala na ang dayuhang lalaki sa Mandaluyong Police Station habang inihahanda na ang isasampang reklamong Alarm and Scandal laban dito.

Libreng sakay sa MRT, LRT at PNR sa mga bakunado… Public transport, tuloy kahit ECQ

ni Lolet Abania | August 2, 2021

Mananatili ang mga pampublikong transportasyon sa National Capital Region sa kabila ng pagsasailalim sa enhanced community quarantine (ECQ) mula Agosto 6 hanggang 20.

Ayon kay Department of Transportation (DoTr) Assistant Secretary Goddes Libiran, inirekomenda ng pamunuan ng ahensiya na manatili ang kasalukuyang supply at kapasidad ng public transport sa capital region sa gitna ng mas mahigpit na lockdown.

Gayunman, sinabi ni Libiran na may restriksiyon para sa mga pasahero na mas mahigpit na ipapatupad upang masigurong ang mga authorized persons outside of their residence (APOR) lamang ang papayagang sumakay sa mga public transport na mandato ng Inter-Agency Task Force (IATF).

“But, whatever the decision of IATF will be, we will abide,” ani Libiran. Matatandaan na nu'ng unang ipinatupad ang ECQ sa NCR noong Marso 16 hanggang Mayo 14, 2020, ipinagbawal ang pampublikong transportasyon.

Nang isailalim uli ang NCR sa ECQ noong Marso 29 hanggang Abril 11, 2021, ang mga empleyado sa essential at non-essential sectors ay pinayagan na mag-report physically sa trabaho at mayroong public transportation sa limitadong kapasidad lamang.

Ang Metro Manila ay isasailalim uli sa ECQ mula Agosto 6 hanggang 20 dahil sa banta ng Delta COVID-19 variant. Samantala, anianunsiyo ni DOTr Secretary Arthur Tugade ngayong Lunes na ang mga nabakunahan na APOR kontra-COVID-19 ay libre ang sakay sa Metro Rail Transit 3 (MRT-3), Light Rail Transit 2 (LRT-2) at the Philippine National Railways (PNR) mula Agosto 6 hanggang 20.

Sa inilabas na statement ni Tugade, kailangan lamang ng mga APORs na iprisinta ang kanilang vaccination cards kung fully vaccinated na o kahit nakatanggap pa lamang ng unang dose para ma-avail ang libreng sakay.

“Ang inisyatibong ito ay napagkasunduan ng buong Kagawaran ng Transportasyon upang makatulong sa pagpapanatili ng kalusugan at kaligtasan ng ating mga kababayan, at upang matulungan ang gobyerno na mahikayat ang ating mga kababayan na magpabakuna,” ani Tugade.