Bilang ng motorcycle taxi na papasada, walang limit — PCC

ni Mylene Alfonso | May 26, 2023

Walang plano ang Philippine Competition Commission (PCC) na magpataw ng cap sa bilang ng motorcycle taxi na papayagang bumiyahe sa bansa.

Makakahikayat din umano ito ng marami pang players na pumasok sa lumalaking motorcycle taxi industry sa bansa bukod sa makikinabang dito ang mga komyuter.

Ang mga puntong ito ay ipinarating ng kinatawan ng PCC sa joint hearing ng Senate committee on public services at local government na tumalakay sa panukalang i-regulate at gawing legal ang motorcycles-for-hire para matiyak na sila ay ligtas, epektibo at abot-kayang uri ng pampublikong transportasyon.

Nang tanuning ni Senate Committee on Public Services Chairperson Grace Poe ang posibleng pagpasok ng Grab Philippines sa motorcycle taxi industry, sinabi ni PCC Executive Director Kenneth Tane na: “In terms of market situation, more players would be better for consumers.”

“If we are going to apply competition principles, no cap would be better given that it would benefit the consumers,” dagdag pa niya.

Ayon kay Poe, hindi dapat magtakda ng limitasyon kung papayagan ang iba pang kumpanya tulad ng ginagawa ng Grab sa Thailand at iba pang bansa para sa mas malayang kompetisyon.

“In terms of slots, there is no cap for motorcycles in the countries we operate,” sabi ni Grab Senior Executive Vice President Lim Yew Heng, na nakabase sa Singapore.

Habal-habal, join sa pilot study ng motorcycle taxi

ni Jeff Tumbado | May 25, 2023

Hihikayatin ng Motorcycle Taxi Technical Working Group (MC Taxi-TWG) ang mga "habal-habal" operator, partikular na sa mga probinsya, na sumali sa pilot study na isinasagawa para sa MC Taxi.

Ito ay dahil sakaling maging ganap na batas ang panukala para gawing legal ang motorcycle taxi sa bansa, mas mababantayan at maaaring makatanggap ng mga benepisyo mula sa programa ang mga kalahok nito.

“Once they are part of the program, they will be regulated and will be trained in the aspects of proper operations, particularly in improving their driving skills through more advanced driver training once they become part of the program. That way, they can operate safely and securely, which will ultimately benefit the riding public,” pahayag ni Atty. Paul Austria, Secretariat ng MC Taxi-TWG.

Ang plano na ito ng TWG ay alinsunod sa panukala ni Sen. Raffy Tulfo sa gitna ng pagdinig ng Senate Committee on Public Services na pinangunahan ni Senador Grace Poe.

Sa kabilang banda, sinabi ni MC-TWG Chairperson Atty. Teofilo Guadiz III, na siya ring Chairperson ng Land Transportation Franchising and Regulatory Board (LTFRB), na titingnan din ng TWG kung kinakailangan pang palawakin ang lugar kung saan isinasagawa ang pilot study para sa mga MC Taxi.

Pag-aaralan din ng TWG ang posibilidad na magdagdag ng kalahok sa naturang pilot study at ng bilang ng mga rider na nakalaan para sa tatlong Transport Network Companies (TNCs) na kasama sa pag-aaral.

Kabilang sa mga TNC na lumahok sa pilot study ang Angkas, JoyRide at Move It.

Istayl kolorum, 'di gumagamit ng app para mas mataas ang singil.. Angkas at Joyride drivers, buking

ni Mylene Alfonso | May 15, 2023

Patuloy na dumarami ang reklamong natatanggap ng motorcycle taxi na Angkas dahil sa umano'y overcharging ng mga rider sa mga commuter na naghahabol ng oras sa kanilang mga pupuntahan.

Nabatid na hindi na nasusunod ang fare matrix na ipinalabas ng Land Transportation Franchising and Regulatory Board (LTFRB) na siyang guidelines para sa pagbibigay ng tamang pasahe sa mga nagnanais na sumakay sa motorcycle taxi.

Nakapaloob sa fare matrix na ipinalabas noong Enero 27, 2020 ng LTFRB na sa Metro Manila, P50 para sa unang 2km; P10 hanggang 7km; P15 sa mga susunod pang kilometro habang sa Metro Cebu/ Cagayan De Oro, P20 sa unang 2km; P16 hanggang 8km at P20 sa mga susunod pang kilometro.

Ayon sa mga reklamo ng commuter na ibinahagi sa social media, ang mistulang naging kolorum at habal-habal ang mga motorcycle taxi na binigyan ng prangkisa dahil sumusunod sa guidelines ng LTFRB.

Partikular na reklamong tinukoy ang hindi na paggamit ng apps kung saan, kinokontrata na lamang ng mga rider ang kanilang pasahero lalo na sa gabi na kung saan ay 5 hanggang 10 beses ang taas ng singil.

“Grabe ang modus ng mga Angka at Joyrider drivers. Mag-aabang sila sa mga exit ng mall/establishment. Nakabukas 'yung app nila kaya nakikita nila kung sino nagbu-book pero hindi nila ina-accept. Instead, lalapit sila as habal tapos aalukin nila ng mas mahal na pamasahe kaysa sa app,” isa lang ito sa reklamong ipinost sa social media.

Gayundin, nanawagan sa social media ang Angkas, Habal, Joyride riders and passengers group na kung saan ay humihingi sila ng proteksiyon sa pamunuan ng motorcycle taxi na i-orient ang ibang riders na maging marespeto dahil sa hindi na nasusunod ang fare matrix ng LTFRB kung kaya’t hindi na nila alam kung ano ang latest Angkas rate.